ភ្នំពេញ ៖ ឯកឧត្តម សាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល បានអនុញ្ញាតឲ្យឯកឧត្តម Nguyen Huy Tang ឯកអគ្គរដ្ឋទូតវិសាមញ្ញ និងពេញសមត្ថភាព នៃសាធារណរដ្ឋសង្គម​និយមវៀតណាម ប្រចាំព្រះរាជាណាចក្រកម្ពុជា ចូលជួបសំដែងការគួរសម និងពិភាក្សាការងារ នារសៀលថ្ងៃទី១១ ខែតុលា ឆ្នាំ២០២២ នៅទីសី្តការក្រសួង។

​ជាកិច្ចចាប់ផ្តើម ឯកឧត្តមរដ្ឋមន្ត្រី បានសំដែងការអបអរសាទរចំពោះឯកឧត្តម Nguyen Huy Tang ដែលត្រូវបានតែងតាំងជាឯកអគ្គរដ្ឋទូតថ្មី និងបានថ្លែងអំណរគុណដល់ភាគីវៀតណាម ចំពោះកិច្ចសហការលើវិស័យសុខាភិបាលរវាងប្រទេសទាំងពីរ ជាពិសេសក្នុងកាលៈទេសៈ នៃការប្រយុទ្ធ នឹងការរីករាលដាលជំងឺកូវីដ-១៩។ ឯកឧត្តម សាស្រ្តាចារ្យ ម៉ម ប៊ុនហេង ក៏បានថ្លែងអំណរគុណដល់រដ្ឋាភិបាល និងប្រជាជនវៀតណាម ដែលបានផ្ដល់ជំនួយបន្ទាន់សម្រាប់ ឆ្លើយតប នឹងការរីករាលដាលជំងឺកូវីដ-១៩ មួយចំនួនដូចជា៖ ថវិកាចំនួន២០ម៉ឺនដុល្លារអាមេរិក, ម៉ាស់ចំនួន០២លាន, ម៉ាស់N95 ចំនួន៣០ម៉ឺន និងម៉ាស៊ីនជំនួយដកដង្ហើមចំនួន៨០០គ្រឿង។ ក្នុងក្របខណ្ឌកិច្ចសហប្រតិបត្តិការទ្វេភាគី ក៏ត្រូវបានពង្រឹង និងពង្រីកផងដែរ ដូចជា៖ ការផ្លាស់ប្តូរបច្ចេកទេស ព័ត៌មាន បទពិសោធន៍ ការបណ្តុះបណ្តាលធនធានមនុស្ស ការពិនិត្យ និងព្យាបាលអ្នកជំងឺក្រីក្រដោយឥតគិតថ្លៃ។ បង្កើនការទប់ស្កាត់ជំងឺឆ្លងកាចសាហាវនៅតាមព្រំដែន នៃប្រទេស ទាំងពីរ រួមមានជំងឺកូវីដ-១៩ H1N1 អេបូឡា ជំងឺផ្លូវដង្ហើមជ្ឈឹមបូព៌ា ជំងឺហ្សីកា និងជំងឺឆ្លងផ្សេងៗទៀត និងជំងឺដែល បណ្ដាលមកពីចំណីអាហារមានជាតិគីមីពុល ការងារ​ត្រួតពិនិត្យផលិតផលថ្នាំជក់ ព្រមទាំងបង្ក្រាបការជួញដូរឱសថក្លែង ក្លាយ ឬខុសច្បាប់។

ជាមួយគ្នានោះដែរ ឯកឧត្តម ឯកអគ្គរដ្ឋទូតវៀតណាម បានសម្តែងនូវការអបអរសាទរ​ដល់​រាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ ប្រកបដោយគតិបណ្ឌិតរបស់​សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្តី នៃព្រះរាជាណាចក្រកម្ពុជា ដែលគ្រប់គ្រងការរាលដាលនៃជំងឺកូវីដ-១៩ បានយ៉ាងល្អប្រសើរ ជំរុញឱ្យកម្ពុជា​អាច​បើកដំណើរការប្រទេសឡើងវិញ ទាំងសេដ្ឋកិច្ច និងសង្គម តាំងពីខែវិច្ឆិកា ឆ្នាំ២០២១។ ឯកឧត្តមឯកអគ្គរដ្ឋទូត ក៏បានថ្លែងអំណរគុណដល់រាជរដ្ឋាភិបាលកម្ពុជា ដែលបានចាក់វ៉ាកសាំងកូវីដ-១៩ ជូនដល់មន្ត្រីការទូតវៀតណាមទាំងអស់ និងប្រជាជនវៀតណាម ដែលកំពុងរស់នៅកម្ពុជាដោយឥតគិតថ្លៃ។ លើសពីនេះឯកឧត្តមឯកអគ្គរដ្ឋទូត ក៏បានថ្លែងអំណរគុណដល់រាជរដ្ឋាភិបាលកម្ពុជា ដែលបានផ្ដល់ជំនួយបន្ទាន់សម្រាប់ឆ្លើយតប នឹងការរីករាលដាលជំងឺកូវីដ-១៩ មួយចំនួនដូចជា៖ វ៉ាក់សាំងកូវីដ-១៩ ចំនួន២០ម៉ឺនដូស ថវិកាចំនួន២០ម៉ឺនដុល្លារអាមេរិក ម៉ាស់ធម្មតាចំនួន០១លាន ម៉ាសវេជ្ជសាស្ត្រ (N95) ចំនួន១០ម៉ឺន ព្រមទាំងម៉ាស៊ីនផលិតអុកស៊ីសែន ចំនួន១០០គ្រឿង។ ឯកឧត្តមឯកអគ្គរដ្ឋទូត ក៏បានប្តេជ្ញាបន្តពង្រឹង និងពង្រីកកិច្ចសហប្រតិបត្តិការរវាងប្រទេសទាំងពីរ ជាពិសេសវិស័យសុខាភិបាល។

ជាការឆ្លើយតប ឯកឧត្តមរដ្ឋមន្ត្រី បានគាំទ្រចំពោះកិច្ចសហប្រតិបត្តិការ ការរឹតចំណងមិត្តភាព និងសាមគ្គីភាព ជាប្រពៃណីរវាងប្រទេសទាំងពីរកម្ពុជា-វៀតណាម៕ អត្ថបទ ៖ រដ្ឋា