សៀមរាប៖ វត្តអារាមដ៏មានវ័យចំណាស់មួយ ដែលមានឈ្មោះថា វត្តបារាយណ៍មហានទីរតនារាម ហៅវត្តស្វាយរមៀត នៅក្បែរបារាយណ៍ទឹកថ្លាខាងលិច ស្ថិតនៅសង្កាត់ទឹកវិលក្រុងសៀមរាប ត្រូវបានអ្នកទេសចរជាតិ និងអន្តរជាតិ ចាប់អារម្មណ៍ទៅទស្សនាប្រមាណ ១០០នាក់ ដើម្បីសិក្សាស្វែងយល់ពីទំនៀមទម្លាប់ប្រពៃណីខ្មែរ។
លោក ហ្វីលីប កៅ ប្រធានសមាគមក្លឹបទេសចរណ៍សៀមរាប(STC) បានដឹកនាំក្រុមអ្នកទេសចរឱ្យដឹងថា ក្នុងពេលដែលរាជរដ្ឋាភិបាលកម្ពុជា បានបើកប្រទេសពេញលេញឡើងវិញ ភ្ញៀវទេសចរហូរចូលមកទស្សនាកម្ពុជា ជាបន្តបន្ទាប់ ជាពិសេសនៅខេត្តសៀមរាប។
លោកថា បច្ចុប្បន្ននេះ ព្រលានយន្តហោះអន្តរជាតិសៀមរាបទទួលបានជើងហោះហើរពី១០ទៅ១២ជើងក្នុង១ថ្ងៃ ។លោកញ្ជាក់ថា៖សមាគមក្លឹបទេសចរណ៍សៀមរាប បានសហការជាមួយព្រះចៅអធិការវត្តបុរាណៗមួយចំនួនក្នុងក្រុងសៀមរាបតាំងពីឆ្នាំ២០១៨មក ប៉ុន្តែបានអាក់ខានសកម្មភាពទៅវិញដោយសារតែការឆ្លងរីករាលដាលជាសកលនៃជំងឺកូវីដ-១៩។
ការរើសវត្ដជាគោលដៅទេសចរណ៍ក្នុងគោលបំណងក្នុងការទាក់ទាញភ្ញៀវឱ្យមកទស្សនាវត្តបុរាណៗផង ដើម្បីចូលរួមលើកស្ទួយវិស័យព្រះពុទ្ធសាសនា។ ជាមួយគ្នានោះ អ្នកទេសចរទៅទស្សនាវត្ដអារាម នឹងជួយបង្កើតមុខរបរបន្ថែមដល់ប្រជាសហគមន៍ ក្រៅពីទស្សនាតំបន់ប្រាសាទនានា។បន្ថែមលើពីនោះ ក៍៏ចង់បង្ហាញអ្នកទេសចរណ៍ បានមកស្វែងយល់និងឃើញជាក់ស្តែង នូវទិដ្ឋភាពសកម្មភាពរស់នៅប្រចាំថ្ងៃរបស់ ព្រះសង្ឃ ប្រជាពលរដ្ឋ ជាមួយនឹងប្រពៃណីវប្បធម៌ទំនៀមទម្លាប់ និងដើម្បីលើកកម្ពស់វិស័យទេសចរណ៍សហគមន៍ក្នុងខេត្តនេះ ខណៈដែលវត្តបុរាណក៍ជាគោលដៅទេសចរណ៍សហគមន៍ក្រៅប្រាសាទនិងជាផលផិតផលទេសចរណ៍ថ្មីមួយអាចជួយបង្កើនចំណូលដល់បងប្អូនប្រជាពលរដ្ឋនៅតាមសហគមន៍មូលដ្ឋាន។
ប្រធានសមាគមក្លឹបទេសចរណ៍សៀមរាបរូបនេះ ក៏បានបង្ហាញឱ្យដឹងពីសក្តានុពលនៃ តំបន់សៀមរាបក្រៅពីប្រាសាទ មានដូចជា វត្តបុរាណ ផ្ទះសំណាក់ស្នាក់សាមញ្ញបែបបុរាណ ភោជនីយដ្ឋានក្នុងស្រុក សុទ្ធតែចំណែកមួយជួយផ្តល់ភាពកក់ក្តៅពេញចិត្តរបស់ភ្ញៀវ និងអាចបន្ថែមការស្នាក់នៅយូរផងដែរ ដោយសារពួកគាត់មានឱកាសអាចស្វែងយល់ អំពីជីវិតក្រៅប្រាសាទនិងជីវិតជាក់ស្តែងជាច្រើនលាយឡំគ្នាយ៉ាងសម្បូរបែប ហើយទទួលបានបទពិសោធន៍ជាក់ស្តែងពីកម្ពុជា ។សកម្មភាពទេសចរទាំងនេះនឹងផ្តល់ផលប្រយោជន៍ដល់ប្រជាជននៅមូលដ្ឋានជាក់ជាមិនខាន។លោកបានសម្តែងនូវកិច្ចសហការល្អៗជាមួយព្រះចៅអធិការវត្តស្វាយរមៀត ដែលព្រះអង្គពុំបានតម្រូវឱ្យអ្នកទេសចរណ៍ឬសមាគមន៍បង់ប្រាក់អ្វីឡើយ៕ អត្ថបទ៖ សាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
