បន្ទាយមានជ័យ៖ នៅរសៀលថ្ងៃទី១១ ខែតុលា ឆ្នាំ២០២២ ឯកឧត្តម អ៊ុំ រាត្រី អភិបាលខេត្តបន្ទាយមានជ័យ ​និងជាប្រធានលេខាធិការដ្ឋាន​គ្រប់គ្រងគ្រោះមហន្តរាយបានអញ្ជេីញចុះចែកអំណោយ​ជូនប្រជាពលរដ្ឋរងគ្រោះ​ដោយទឹកជំនន់ជិត៦០០គ្រួសារក្នុងស្រុកមង្គលបុរី។

ក្នុងពិធីចុះចែកអំណោយនាថ្ងៃនេះ ឯកឧត្តម អ៊ុំ រាត្រី បានពាំនាំនូវការផ្តាំផ្ញេីសួរសុខទុក្ខពីសម្តេចតេជោ ហ៊ុន សែន​នាយករដ្ឋមន្រ្តី និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ជូនចំពោះបងប្អូនជនរួមជាតិ ដែលរងគ្រោះដោយទឹកជំនន់ពេលនេះ ហេីយទោះជាទឹកបន្តស្រកទៅវិញ​ជាបណ្តើរក៏សម្តេច​ទាំងពីរនៅ​តែបន្តយកចិត្តទុកដាក់​ខ្ពស់ចំពោះទុក្ខលំបាករបស់បងប្អូនជានិច្ច។

ក្នុងនាមសេនាធិការសម្តេចតេជោ ហ៊ុន សែន នាយករដ្ឋមន្រ្តី និងជាប្រធានគណ:កម្មាធិការ​ជាតិគ្រប់គ្រង​គ្រោះមហន្តរាយ លេខាធិការដ្ឋានគ្រប់គ្រោះមហន្តរាយខេត្ត បាននឹងកំពុងតាមដាន​យ៉ាងយកចិត្ត​ទុកដាក់​ខ្ពស់បំផុតលើបាតុភាពធម្មជាតិថ្មីនេះទន្ទឹមគ្នានេះ ​ឯកឧត្តម អ៊ុំ​ រាត្រី បានអំពាវនាវទៅ​អាជ្ញាធរ និងកងកម្លាំង​ទាំង៣ឱ្យត្រៀមលក្ខណៈសម្បត្តិ ២៤ម៉ោង ចេញជួយសង្គ្រោះប្រជាពលរដ្ឋក្នុងករណីមានការលិចធ្ងន់ធ្ងរ។

ជាមួយនឹងការអំពាវនាវទៅកាន់អាជ្ញាធរ ឯកឧត្តម អ៊ុំ​ រាត្រី ក៏បានអំពាវនាវដល់ប្រជាពលរដ្ឋ​នៅតាម​តំបន់ប្រឈមការជន់លិច ឱ្យត្រៀមលក្ខណៈសម្បត្តិជម្លៀស​ទៅកាន់ទីទួលសុវត្ថិភាព និងលើកដាក់​ទ្រព្យសម្បត្តិទាំងឡាយនៅទីខ្ពស់បញ្ចៀសការលិចលង់។ បន្ថែមលេីសពីនេះ ឯកឧត្តមទេសរដ្ឋមន្ត្រី ក៏បានណែនាំដល់ប្រជាពលរដ្ឋប្រញាប់​ទាក់ទងទៅអាជ្ញាធរជាបន្ទាន់នៅពេលផ្ទះសម្បែង​ខ្លួនរងការគំរាមពីជំនន់ទឹកភ្លៀង​ជាពិសេសត្រូវប្រយ័ត្នប្រយែង​កូនចៅតូចៗមិនឱ្យលេងទឹក អាចប្រឈមនឹងគ្រោះថ្នាក់លង់ទឹក៕ អត្ថបទ៖ សេក ឧត្តម