កំពង់ឆ្នាំង៖ នៅថ្ងៃទី១២ ខែតុលា ឆ្នាំ២០២២នេះ ឯកឧត្តម ស៊ុន សុវណ្ណារិទ្ធិ អភិបាល​ខេត្ត​កំពង់ឆ្នាំង បានជំរុញអោយលោក លោកស្រីជាមេឃុំចៅសង្កាត់ទាំង៧១ ត្រូវយក​ចិត្ត​ទុក​ដាក់​ស្រង់​ស្ថិតិ​កុមា​រ​ទាំង​អស់នៅក្នុងមូលដ្ឋានរបស់ខ្លួនដែលមិនទាន់បានចូលរៀន ដោយសារ​តែ​ឪពុកម្តាយ​ធ្វើ​ការ​នៅ​រោងចក្រ ធ្វើការនៅភ្នំពេញ ឬធ្វើការនៅក្រៅប្រទេស អោយ​ឯកឧត្ត​ម​បាន​ដឹង​ក្នុង​រយៈពេល១សប្តាហ៍ទៀត។ ឯកឧត្តមបានថ្លែងបែបនេះ នៅក្នុងពិធីប្រកាសលោក ឈួន ចាន់ណា អភិបាលរងស្រុក ឡើងកាន់តំណែងអភិបាលស្រុកសាមគ្គីមានជ័យ ហើយលោក វន ស៊ីផា អតីតអភិបាលស្រុកសាមគ្គីមានជ័យ ផ្ទេរទៅកាន់ជាអភិបាលស្រុកកំពង់ត្រឡាច ខេត្តកំពង់ឆ្នាំង។

 ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានថ្លែងថា៖ ដោយសារនៅ​ក្នុង​ពេលថ្មី​ៗ​កន្លង​មកនេះ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បា​ន​អោយ​គ្រប់​មូលដ្ឋាននៅទូទាំងប្រទេស យកចិត្តទុកដាក់ចំពោះកុមារតូចៗដែលពុំបានចូលរៀន ដោយសារ​តែ​ឪពុក​ម្តាយ​បានចំណាកស្រុកទៅធ្វើការនៅតាមរោងចក្រ ធ្វើការងារនៅភ្នំពេញ ឬក៏ធ្វើការនៅ​ប្រទេស​ក្រៅ ហើយបានផ្ញើកូនតូចៗអោយរស់នៅជាមួយម្តាយឪពុកចាស់ៗ ឬផ្ញើរនឹង​បងប្អូន​ជា​ដើម អោយពួកគេបានចូលរៀនទាំងអស់គ្នាវិញ។ ដូចនេះនៅក្នុងខេត្តកំពង់ឆ្នាំង សូម​អោយ​អាជ្ញាធរ​ឃុំ​សង្កាត់​ទាំង៧១ឃុំសង្កាត់ យកចិត្តទុកដាក់ចាត់ចែង​ស្រង់​ឈ្មោះ​កុមារ​ទាំងអស់​ដែល​មិន​បាន​ចូលរៀនដោយសារមូលហេតុដូចខាងលើ មកអោយឯកឧត្តម​យ៉ាង​ឆាប់​តាមរយៈ​អភិបា​លស្រុ​ក​ក្រុង និងសហការជាមួយមន្ទីរអប់រំយុវជន និងកីឡាខេត្តក្នុងរយៈពេល១សប្តាហ៍ទៀត។

សូមបញ្ជាក់ជូនថា កុមារតូចៗនៅតាមមូលដ្ឋាន​ដែល​មាន​ឪពុកម្តាយ​បាន​ទៅ​ធ្វើ​ការងារ​នៅ​តាម​រោង​ចក្រ ទៅធ្វើការនៅទីក្រុងភ្នំពេញ ឬទៅធ្វើការនៅក្រៅប្រទេស មានមួយ​ចំនួន​បាន​ចូលរៀន​ជា​ធម្មតា រីឯមួយចំនួនទៀតមិនបានចូលរៀននោះឡើយ ដែលករណីនេះ ធ្វើអោយ​កុមារ​ទាំង​អស់​នោះ​ក្លាយ​ជាមនុស្សមិនចេះអក្សរ មិនអាចធ្វើអ្វីបាននោះឡើយ។ ក្រោយពីសម្តេចតេជោ ហ៊ុន សែន នាយករដ្ឋមន្ត្រី បានប្រកាសក្នុងពិធី​ប្រគ​ល់​សញ្ញាប័ត្រ​ជូន​និសិត្ស​នៅ​សកលវិទ្យាល័យ​ភ្នំពេញ​អន្តរជាតិ កាលពីថ្ងៃទី១១ ខែតុលា ឆ្នាំ២០២២ រួចភ្លាម ឯកឧត្តម ស៊ុន សុវណ្ណារិទ្ធិ អភិបាល​ខេត្តកំពង់ឆ្នាំង បានដាក់ចេញនូវវិធានការស្រង់ស្ថិតិនៅថ្ងៃនេះ ដោយអោយ​អាជ្ញាធរ​មូលដ្ឋាន ស្រង់ឈ្មោះកុមារដែលជាកូនៗរបស់ប្រជាពលរដ្ឋដែលពួកគាត់ធ្វើសំណង់ ទាំងប្តី​ទាំង​ប្រពន្ធ ដូច្នេះត្រូវរក​សាលា​រៀន​ដែល​នៅ​ក្បែរៗ​ការដ្ឋាន​សំណង់​នោះ​អោយ​កុមារ​បាន​ទទួល​ការអ​ប់​រំផ​ង​។ ហុង វាស្នា