ភ្នំពេញ៖ រាជរដ្ឋាភិបាលកម្ពុជា តាមរយៈក្រសួងផែនការ បានប្រកាសផ្សព្វផ្សាយ ដាក់​អោយ​ប្រើប្រាស់​នីតិវិធីកំណត់​អត្តសញ្ញាណ​គ្រួសារ​ក្រីក្រថ្មី និងការពង្រីកវិសាលភាព​គ្របដណ្តប់​ដល់គ្រួសារងាយរងហានិភ័យ​ ដែលរាជរដ្ឋាភិបាលនឹងត្រូវបន្តផ្តល់ប្រាក់ឧបត្ថម្ភ ឬបណ្ណសមធម៌​ជូន​ដល់ពួកគាត់ ​ខណៈអត្តសញ្ញាណកម្មជន ​ក្រីក្រទាំងនោះត្រូវបានពិនិត្យយ៉ាង​ម៉ត់ចត់​ជាមួយ​ដៃគូ​ជាម្ចាស់ជំនួយ។

នៅក្នុងពិធីប្រកាសផ្សព្វផ្សាយ ​ដាក់អោយប្រើប្រាស់នីតិវិធីកំណត់អត្តសញ្ញាណគ្រួសារក្រីក្រថ្មី និង​ការពង្រីក​វិសាលភាព​គ្របដណ្តប់​ដល់​គ្រួសារ​ងាយរងហានិភ័យ នាថ្ងៃទី១២ ខែតុលា​ ឆ្នាំ២០២២នេះ ដែល​មាន​ប្រទេស ​និង​ដៃគូ​ជា​ម្ចាស់ជំនួយចូលរួម​ផងនោះ​ឯកឧត្តម ឆាយ ថន បានលើកឡើងថា នាពេល ​បច្ចុប្បន្នប្រទេសកម្ពុជាមានគ្រួសារក្រីក្រប្រមាណ​ ៧សែនគ្រួសារ ប្រហែល ២,៨លាននាក់ ហើយពួកគាត់​ ត្រូវបានរាជរដ្ឋាភិបាលផ្តល់​ប្រាប់​ឧបត្ថម្ភជាប្រចាំ ដោយរាជរដ្ឋាភិបាលមិន​បណ្តែត​បណ្តោយ​ឲ្យ​ពួកគាត់ ​ក្រ​រហូតដល់ធ្លាក់ខ្លួនដុនដាបនោះឡើយ។

បើតាមឯកឧត្តម ​ឆាយ ថន បានបញ្ជាក់បន្ថែមទៀតថា ​ការប្រកាស​ផ្សព្វផ្សាយ​ដាក់ឱ្យប្រើប្រាស់​នូវ​នីតិវិធីថ្មី​ ស្តីពីអត្តសញ្ញាណកម្មគ្រួសារក្រីក្រ ​និងការពង្រីកវិសាលភាពគ្របដណ្តប់ដល់​គ្រួសារ​ងាយរង​ហានិភ័យ​នេះ ​គឺមានសារៈសំខាន់​ខ្លាំងណាស់​ដោយ​​ត្រូវបានកំណត់​អត្តសញ្ញាណជន​ក្រីក្រ​ពិត​ប្រាដកតាម​ រយៈប្រព័ន្ធ​បញ្ចេកវិទ្យា​ទំនើប​ និង​ច្បាស់លាស់​ដោយ​មាន​ការចូលរួម​ត្រួត​ពិនិត្យ​ពីសំណាក់​ប្រទេស ​និងដៃគូជាម្ចាស់ជំនួយដែរនោះ៕ អត្ថបទ៖ បាន ចក់