ភ្នំពេញ ៖ ប្រធានស្ថានតំណាងមូលនិធិរូបិយវត្ថុអន្តរជាតិ ថ្លែងឲ្យដឹងថា មូលនិធិរូបិយវត្ថុអន្តរជាតិ នឹងជួយគាំទ្រដល់កម្ពុជា តាមរយៈការបន្តកិច្ចសហប្រតិបត្តិការ និងក្របខណ្ឌនៃកិច្ចសហប្រតិបត្តិការពិសេស នៃមូលនិធិហិរញ្ញប្បទានរហ័ស ដែលអាចជាជម្រើសមួយបន្ថែមសម្រាប់កម្ពុជាក្នុងការបំពេញកង្វះខាតហិរញ្ញប្បទាន សម្រាប់ផែនការស្តារសេដ្ឋកិច្ច ក្រោយវិបត្តិជំងឺកូវីដ–១៩។
លោក Yasuhisa Ojima ប្រធានស្ថានតំណាងមូលនិធិរូបិយវត្ថុអន្តរជាតិ (IMF) ប្រចាំកម្ពុជា លើកឡើងនៅក្នុងជំនួបពិភាក្សាការងារ ជាមួយឯកឧត្តមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ នៅថ្ងៃ ១៩ ខែ តុលា ឆ្នាំ ២០២០ នេះថា កម្ពុជាពិតជាទទួលបានជោគជ័យក្នុងការប្រយុទ្ធប្រឆាំង និងគ្រប់គ្រងបានល្អប្រសើរ នូវការរីករាលដាលនៃជំងឺកូវីដ–១៩ ពិសេសប្រសិទ្ធភាពនៃការអនុវត្តនូវវិធានការមុតស្រួចថ្មីៗនានា ក្រោមក្របខណ្ឌយុទ្ធសាស្ត្រស្តារសេដ្ឋកិច្ចឡើងវិញ ក្រោយវិបត្តិជំងឺកូវីដ ១៩ និងកម្មវិធីគាំពារសង្គមជាដើម ។
សម្រាប់បញ្ហានេះ, លោកសូមគាំទ្រលើស្មារតីប្រុងប្រយ័ត្នខ្ពស់របស់រាជរដ្ឋាភិបាល តាមរយៈការបន្តតាមដានការប្រែប្រួលស្ថានការម៉ាក្រូសេដ្ឋកិច្ច និងបានលើកទឹកចិត្តឱ្យបន្តកិច្ចសហការជាមួយធនាគារជាតិនៃកម្ពុជា ក្នុងការឃ្លាំមើលការប្រែប្រួលនៃស្ថានភាពសេដ្ឋកិច្ច ទាំងកម្រិតសកល និងតំបន់ ។ ចំណែកពាក់ព័ន្ធការងារជាមួយ IMF លោក បានអះអាងថា មូលនិធិរូបិយវត្ថុអន្តរជាតិ នឹងបន្តជួយគាំទ្រកម្ពុជា តាមរយៈការបន្តកិច្ចសហប្រតិបត្តិការជាប្រពៃណីកន្លងមក និងបានគូសបញ្ជាក់ពីក្របខណ្ឌនៃកិច្ចសហប្រតិបត្តិការពិសេស នៃមូលនិធិហិរញ្ញប្បទានរហ័ស ដែលអាចជាជម្រើសមួយបន្ថែមសម្រាប់កម្ពុជា ក្នុងការបំពេញកង្វះខាតហិរញ្ញប្បទាន សម្រាប់ផែនការស្តារសេដ្ឋកិច្ចក្រោយវិបត្តិជំងឺកូវីដ–១៩ ។
ក្នុងជំនួបនេះ, ឯកឧត្តមឧបនាយករដ្ឋមន្ត្រី អូន ព័ន្ធមុនីរ័ត្ន បានថ្លែងនូវអំណរគុណ ចំពោះមូលនិធិរូបិយវត្ថុអន្តរជាតិ ដែលជានិច្ចជាកាល រួមជាមួយដៃគូអភិវឌ្ឍន៍ផ្សេងទៀត បានបន្តរួមសុខទុក្ខជាមួយកម្ពុជា ជាពិសេសក្នុងកាលៈទេសៈដ៏លំបាក កំពុងបង្កឡើងដោយវិបត្តិជំងឺកូវីដ–១៩នេះជាដើម ។ មូលនិធិរូបិយវត្ថុអន្តរជាតិ មានតួនាទីសំខាន់ក្នុងការបន្តតាមដាន និងវាយតម្លៃការវិវត្តសេដ្ឋកិច្ចសកល, តំបន់ និងកម្ពុជា, និងផ្ដល់ការសិក្សាផ្សេងៗ ដែលអាចជាធាតុចូលសម្រាប់កម្ពុជា ក្នុងការបន្តរៀបចំវិធានការពាក់ព័ន្ធ ដើម្បីធានាស្ថិរភាពម៉ាក្រូសេដ្ឋកិច្ច និងហិរញ្ញវត្ថុកម្ពុជា និងការរៀបចំនូវវិធានការគោលនយោបាយសម្រាប់ស្ដារ និងជំរុញកំណើនសេដ្ឋកិច្ចកម្ពុជា ។
ឯកឧត្តម បន្តថា ទោះបីជាកម្ពុជាត្រូវបានវាយតម្លៃ និងទទួលស្គាល់ថា ជាប្រទេសមួយក្នុងចំណោមប្រទេសដែលគ្រប់គ្រងស្ថានភាពជំងឺកូវីដ–១៩ បានល្អប្រសើរក៏ដោយ, រាជរដ្ឋាភិបាលកម្ពុជា នៅបន្តតាមដានការវិវត្តនៃជំងឺនេះដោយយកចិត្តទុកដាក់ខ្ពស់ជានិច្ច រួមជាមួយការចាត់វិធានការមុតស្រួចក្នុងការគាំទ្រលំនឹងសេដ្ឋកិច្ច និងជីវភាពប្រជាជន ។ ឈរលើមូលដ្ឋាននេះ សកម្មភាពសេដ្ឋកិច្ចកម្ពុជា អាចបន្តមានប្រក្រតីភាពល្អ ខណៈស្ថានភាពសារពើពន្ធ ជាពិសេសផ្នែកចំណូលពន្ធនឹងមានភាពប្រសើរជាងការរំពឹងទុក ដែលនេះ ជាបច្ច័យល្អសម្រាប់ការអនុវត្តថវិកាឆ្នាំ ២០២១ ដោយអនុញ្ញាតឱ្យមានលំហថវិកាធំ និងការប្រើប្រាស់ប្រាក់សន្សំរបស់រាជរដ្ឋាភិបាលតិចជាងការរំពឹងទុក ៕
អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
