ភ្នំពេញ៖ ឯកឧត្តមវេជ្ជបណ្ឌិត ងី មានហេង ប្រធានមនី្ទរសុខាភិបាល រាជធានីភ្នំពេញ ប្រាប់BTV ព័ត៌មាន នាថ្ងៃទី១២ខែតុលានេះថា ប្រជាពលរដ្ឋរស់នៅក្នុងមូលដ្ឋានរាជធានីភ្នំពេញ គិតត្រឹមល្ងាច​ម្សិលមិញ​ថ្ងៃទី១១ ខែតុលា ឆ្នាំ២០២២ អាយុចាប់ពី១៨ឆ្នាំឡើង ​បានមកចាក់វ៉ាក់សាំងបង្ការជំងឺកូវីដ-១៩ ដូសជំរុញទី៤ ​បានចំនួន ១,១៦២,៣៤៣នាក់ ស្មើនឹង ៨២.២៧ភាគរយ នៃក្រុមគោលដៅ ១,៤លាននាក់។

ឯកឧត្តមវេជ្ជបណ្ឌិត ងី មានហេង បានបន្តថា បច្ចុប្បន្នមូលដ្ឋានសុខាភិបាល នៅតាមមនី្ទរពេទ្យ​បង្អែក ​និងមណ្ឌលសុខភាពទាំង៤៣ទីតាំង​ ក្នុងរាជធានីភ្នំពេញ កំពុងមមាញឹកចាក់វ៉ាក់សាំងជូន​បងប្អូនប្រជាពលរដ្ឋក្មេង ចាស់ ប្រុស ស្រី ជាធម្មតា។

គ្រូពេទ្យនៃការិយាល័យសុខាភិបាល ស្រុកប្រតិបតិ្ត នៃមនី្ទរសុខាភិបាលរាជធានីភ្នំពេញ ក៏កំពុងបន្ត​បេសកកម្មយ៉ាងសកម្ម ​ចុះចាក់វ៉ាក់សាំងតាមសហគមន៍​ ខ្នងផ្ទះប្រជាពលរដ្ឋ ​តំបន់ប្រជុំជន​រោងចក្រ​ដើម្បីចាក់វ៉ាក់សាំងកូវីដ-១៩ ​ជូនប្រជាពលរដ្ឋ ដែលពិបាកក្នុងការធ្វើដំណើរមកកាន់​មណ្ឌល​សុខភាព​ និងមនី្ទរពេទ្យបង្អែក ​ដើម្បីទទួលយកវ៉ាក់សាំងបង្ការការពារជំងឺ។ ​ដោយឡែក​សម្រាប់​ប្រជាពលរដ្ឋចាក់វ៉ាក់សាំងដូសទី៥ ​បានចំនួន ១៨៧,២២៦នាក់ ស្មើនឹង១៣.២៥%។

បងប្អូនប្រជាពលរដ្ឋ ​និងអាណាព្យាបាលបាននាំកូនមកចាក់វ៉ាក់សាំងកូវីដ-១៩ ពីក្រុមការងារ​គ្រូពេទ្យ​នៃមនី្ទរពេទ្យបង្អែករាជធានីភ្នំពេញ ​បានលើកឡើងស្រដៀងគ្នាថា ការចាក់វ៉ាក់សាំង​បង្ការជំងឺកូវីដ-១៩ ពិតជាមានសារៈសំខាន់ខ្លាំងណាស់ ​សម្រាប់ការពារសុខភាព។

ជាមួយគ្នានោះដែរ ប្រធានមនី្ទរពេទ្យបង្អែករាជធានីភ្នំពេញ​ លោកវេជ្ជបណ្ឌិត នេត សុវិរៈ បានបញ្ជាក់ថា ​ដើម្បីការពារសុខភាពនៅក្នុង​សហគមន៍​របស់​យើងឲ្យបានល្អ​រឹងម៉ាំ សូម​បងប្អូន​ប្រជាពលរដ្ឋ​រស់នៅក្នុងសហគមន៍ដែលមិនទាន់បានទទួលវ៉ាក់សាំង​បង្ការជំងឺកូវីដ-១៩ ដូស​មូលដ្ឋាន​ពេញលេញ ​ឬក៏ដល់ពេលមកទទួលវ៉ាក់សាំងដូសជំរុញហើយនោះ ​សូមអញ្ជើញ​មក​ទទួល​វ៉ាក់សាំងនៅមនី្ទរពេទ្យបង្អែករាជធានីភ្នំពេញ ​ឬក៏មនី្ទរពេទ្យ ​មណ្ឌលសុខភាពទូទាំងប្រទេស ដែល​បើកដំណើរការចាក់វ៉ាក់សាំងបង្ការជំងឺកូវីដ-១៩ជូន​ និងសូមឲ្យបងប្អូនប្រជាពលរដ្ឋទាំងអស់ កុំមាន​ការធ្វេសប្រហែស​ ត្រូវពង្រឹងឡើងវិញនូវវិធានការការពារ ​គឺ៣កុំ ៣ការពារ របស់សម្តេច​អគ្គមហា​សេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា និងវិធានការរបស់​ក្រសួង​សុខាបាល ដែលបានដាក់ចេញ៕អត្ថបទ រដ្ឋា