ត្បូងឃ្មុំ៖ ក្រោយមានភ្លៀងធ្លាក់ជាបន្តបន្ទាប់នៅចុងរដូវវស្សានេះ បានធ្វើឱ្យជន់លិចផ្លូវជាច្រើនខ្សែ បង្កការខូច ខាតផងដែរ បង្កការលំបាកដល់ការធ្វើដំណើរយ៉ាងខ្លាំង ។ ឯកឧត្តម ជាម ច័ន្ទសោភ័ណ អភិបាលខេត្តត្បូងឃ្មុំ កាលពីថ្ងៃទី១១ ខែតុលាម្សិលមិញ បានដឹកនាំមន្ត្រីជំនាញពាក់ព័ន្ធ ចុះពិនិត្យវាយតម្លៃផ្លូវ១ខ្សែ ​ក្នុងភូមិសាស្ត្រឃុំគងជ័យ ស្រុកអូររាំងឪ ដើម្បីធ្វើការជួសជុលឡើងវិញនៅរដូវប្រាំង។

ក្រោយពេលចុះពិនិត្យផ្លូវ ឯកឧត្តម ជាម ច័ន្ទសោភ័ណ បានឱ្យដឹងថា ជាជំហានដំបូង រដ្ឋបាលខេត្ត នឹងធ្វើការចាក់ថ្មបំពេញតាមទីតាំង ​ដែលរងការខូចខាតខ្លាំង ​ដើម្បីសម្រួលដល់ការធ្វើដំណើរ របស់ ប្រជាពលរដ្ឋជាបណ្តោះអាសន្នសិន។ ជំហានបន្ត នឹងឱ្យមន្ទីជំនាញ ដូចជាមន្ទីរសាធារណការ និងដឹកជញ្ជូន មន្ទីអភិវឌ្ឍន៍ជនបទ សិក្សាលម្អិតដើម្បីដាក់សំណើទៅក្រសួងជួសជុលឡើងវិញ ។

ឯកឧត្តម ​បានឱ្យដឹងទៀតថា ​មកដល់ពេលនេះ មិនទាន់មានរបាយការណ៍លម្អិតនៅឡើយទេ បញ្ជាក់ថា​តើផ្លូវប៉ុន្មានខ្សែក្នុងខេត្តត្បូងឃ្មុំ ​រងការខូចខាត ព្រោះភ្លៀងនៅបន្តធ្លាក់ស្ទើររាល់ថ្ងៃ​នៅ​ឡើយ ហើយទឹកទន្លេមេគង្គ ​ក៏នៅមិនទាន់ស្រកអស់នៅឡើយដែរ។ ​តែទោះជាយ៉ាងណា ផ្លូវដែល​រងការខូចខាត រដ្ឋបាលខេត្ត ​នឹងចាក់ថ្មបំពេញជាបណ្តោះអាសន្នសិន ដើម្បីកុំឱ្យរាំងស្ទះដល់ការ​ធ្វើ​ដំណើរប្រចាំថ្ងៃរបស់ ប្រជាពលរដ្ឋ ។

លោក គី ដាណារិទ្ធ ប្រធានមន្ទីសាធារណការ និងដឹកជញ្ជូន ខេត្តត្បូងឃ្មុំ ​បានឱ្យដឹងថា ផ្លូវជា ច្រើនខ្សែ ពិតជារងការខូចខាតដោយសារលិចទឹក ​ហើយនៅពេលដាច់ទឹកភ្លៀង មន្ទីរ នឹងសិក្សា​លម្អិត ដើម្បីជួសជុលឡើងវិញ ​តែផ្លូវភាគច្រើន ​ដែលរងការខូចខាត​គឺជាគម្រោង​របស់​មន្ទីអភិវឌ្ឍន៍​ជនបទ ។

លោក អាន ស៊ីណា ប្រធានមន្ទីអភិវឌ្ឍន៍ជនបទខេត្តត្បូងឃ្មុំ ​បានបញ្ជាក់ថា ​ជំហានដំបូងនេះ មន្ទីរ នឹងចុះពិនិត្យមើលតាមទីតាំងដែលរងការខូចខាត ​ថាត្រូវធ្វើយ៉ាងម៉េច ដើម្បីជំហានបន្ទាប់​ចាក់​កម្ទេចថ្មជា ​បណ្តោះអាសន្នសិន ​ខណៈផ្លូវ ដែលចុះពិនិត្យនេះ ​រងការខូចខាតខ្លាំង ប្រមាណ ១៥គីឡូម៉ែត្រ៕អត្ថបទ៖ ថុង សីហា