កែប៖ អាជ្ញាធរក្រុងកែបបញ្ជាក់ថា ក្រុងកំពុងរៀបចំសណ្តាប់ធ្នាប់ការលក់ដូររបស់អាជីវករមួយចំនួន នៅតាមតំបន់ឆ្នេរកែប ដែលបានរំលោភយកកន្លែងសាធារណៈ​ ទៅប្រកបរបរ ឬបម្រើឲ្យអាជីវកម្ម​ផ្ទាល់ខ្លួន ដូចជា ធ្វើខ្ចុះ សំយ៉ាប ដាក់ឆ័ត្រ កៅអ៊ី ក្រាលកន្ទេលជួលឲ្យភ្ញៀវ លក់ដូរនៅលើចិញ្ចើមផ្លូវ និងការដេញចាប់ ភ្ញៀវប្រសេកប្រសាចជាដើម។

អភិបាលក្រុងកែបទើបចូលកាន់តំណែងថ្មីលោក ខេង យ័ន បានប្រាប់ឲ្យដឹងថា ​កន្លងមក ដោយ សារភ្ញៀវទេសចរទៅកម្សាន្តនៅតំបន់ឆ្នេរកែបច្រើន​ ធ្វើឲ្យអាជីវករមួយចំនួនឆ្លៀតឱកាសវាទទី យកកន្លែង ​សាធារណៈដាក់តាំងលក់ដូរ​ ឬជួលឲ្យភ្ញៀវអង្គុយលេង ​មានដូចជា សង់ខ្ចុះ ដាក់ឆ័ត្រ ក្រាលកន្ទេល ដាក់ កៅអ៊ី ជួលកន្លែងអង្គុយនៅលើផ្លូវធ្វើដំណើរតាមតំបន់ឆ្នេរ ​ធ្វើឲ្យផ្លូវចង្អៀត កកស្ទះ ​គ្មានសណ្តាប់ធ្នាប់ ​ហើយពេលខ្លះបង្កឲ្យមានបាតុភាពមិនល្អដល់ភ្ញៀវទេសចរ រហូត​លេចចេញ​នូវពាក្យរិះគន់ពីស្រទាប់មហាជន។

បច្ចុប្បន្នរដ្ឋបាលក្រុងបានប្រាប់ឲ្យអាជីវករ បញ្ឈប់​រាល់សកម្មភាពអវិជ្ជមានទាំងនោះ​ ​ហើយ​អាជីវករ ដែល​សង់សំយ៉ាប និងខ្ចុះលើទីសាធារណៈ​ ក៏ត្រូវរុះរើឲ្យបានមុនថ្ងៃទី១៤​ ខែតុលា នេះ។

ក្រៅពីព្យាយាមលុបបំបាត់ការលក់ដូរ ​ការជួលឆ័ត្រ ជួលកន្ទេល ជួលកៅអ៊ី លើចិញ្ចឹមផ្លូវ និងទីសាធារណៈតាមតំបន់ឆ្នេរ ​លោកអភិបាលក្រុង ​ក៏ស្នើដល់អាជីករម្ចាស់អាហារដ្ឋាន ត្រូវឈប់​ដេញ​ចាប់ភ្ញៀវ ព្រោះសកម្មភាពទាំងនេះ ​មិនសមរម្យទេ ថែមទាំងអាចបង្កឲ្យមានគ្រោះថ្នាក់ដល់​ខ្លួនឯង​ ហើយបាត់បង់ ​សណ្តាប់ធ្នាប់ថែមទៀតផង ។

តាមការបញ្ជាក់របស់លោកអភិបាលក្រុងកែប ​បានឲ្យដឹងថា អាជីករ ​ដែលធ្វើ​សកម្មភាព​មិន​សមរម្យ ហើយរឹងរូសខ្លាំង​ មានចំនួន​២០គ្រួសារ​ ហើយបច្ចុប្បន្ន ​អាជីវករក្នុងចំណោមនោះ ​បានរុះរើជា បណ្តើរៗហើយ ៕អត្ថបទ៖ អន សារឹម