ភ្នំពេញ៖ ក្រសួងការងារ និងបណ្តុះបណ្តាលវិជ្ជាជីវៈ លើកឡើងថា ការនាំចេញវិស័យកាត់ដេរ មានសំលៀកបំពាក់ ស្បែកជើង និងផលិតផលធ្វើដំណើររបស់កម្ពុជា នឹងមានកំណើនក្នុងរង្វង់១០ភាគរយ នៅត្រឹមដំណាច់ ឆ្នាំ២០២២នេះ។
ឯកឧត្ដម ហេង សួរ រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ បានលើកឡើងថា នៅត្រីមាសទី៤ ឆ្នាំ២០២២នេះ ការនាំចេញវិស័យឧស្សាហកម្មកាត់ដេរ អាចនឹងរងផលប៉ះពាល់ដោយសារវិបត្តិសង្គ្រាមរវាង រុស្ស៉ីនិងអ៊ុយក្រែនដែលធ្វើឱ្យអត្រាអតិផរណា នៅអាមេរិក និងអឺរ៉ុបមានការកើនឡើងខ្លាំង ដោយការចំណាយរបស់ពលរដ្ឋនៅទីនោះ ផ្តោតសំខាន់ទៅលើ ប្រេងឥន្ធនៈ ថាមពល និងអគ្គិសនី។ ដូច្នេះហើយ ទើបធ្វើឱ្យមានការកាត់បន្ថយការប្រើប្រាស់សំលៀកបំពាក់ បន្ថយការបញ្ជាទិញពីម្ចាស់ម៉ាកនានា។
លើកឡើងក្នុងសន្និសីទសារព័ត៌មានស្ដីពី សមិទ្ធផលសម្រេចបានរយៈពេល ៥ឆ្នាំកន្លងមក (២០១៨-២០២២) របស់ក្រសួងការងារ និងបណ្ដុះបណ្ដាលវិជ្ជាជីវៈ នៅថ្ងៃទី១២ ខែតុលានេះ ឯកឧត្តម រដ្ឋលេខាធិការ បានមាន ប្រសាសន៍ថា បើធៀបនឹងឆ្នាំ កំណើននៃការនាំចេញវិស័យកាត់ដេរ អាចធ្លាក់ចុះ ក្រោម ១០ភាគរយ ប៉ុន្តែបើគិតត្រឹមត្រីមាសទី១ រហូតដល់ទី៣ កំណើននាំចេញនេះធ្លាក់ចុះលើស ១០ភាគរយ។
ជាមួយគ្នានេះ ឯកឧត្តម ហេង សួរ បានបញ្ជាក់ថា ជុំវិញការនាំចេញនេះដែរ ក្រសួងការងារ បានជួបនឹងដៃគូ ពាក់ព័ន្ធ រួមទាំងម្ចាស់ម៉ាកដែលជាអ្នកបញ្ជាទិញដោយពួកគេប្តេជ្ញាថា នឹងបញ្ជាទិញឱ្យបានជាអតិប្បរមា បើធៀបនឹងប្រទេសដទៃ ដោយសារកម្ពុជាមានផែនការជាក់លាក់អំពីការអភិវឌ្ឍវិស័យកាត់ដេរសម្លៀកបំពាក់ ស្បែកជើង និងកាបូប។
សូមជម្រាបជូនថា គិតមកទល់បច្ចុប្បន្ននេះ សហគ្រាស រោងចក្រកាត់ដេរសរុបនៅប្រទេសកម្ពុជាមានចំនួន ប្រមាណជិត១ ៣០០រោងចក្រ បានកំពុងដំណើរការ និងបង្កើតការងារដល់កម្មករនិយោជិតប្រមាណ ៨៣ម៉ឺននាក់ ក្នុងនោះដោយប្រយោលមានចំនួនប្រមាណជិត ១លាននាក់ សរុបទាំងមូលជិត ២លាននាក់ ទទួលបានផល ប្រយោជន៍ពីវិស័យនេះ៕ អត្ថបទ៖ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
