ភ្នំពេញ ៖ អាជ្ញាធរខណ្ឌមានជ័យ បានបញ្ជាក់ថា កម្មកររោងចក្រកាត់ដេរ Din Han ចំនួន១៨នាក់ទៀត បានរកឃើញ មានផ្ទុកជំងឺកូវីដ១៩ ដែលធ្វើឱ្យចំនួនកម្មករសរុបឆ្លងឆ្លងមេរោគកូវីដ១៩ កើនឡើងដល់៦៨នាក់ គិតត្រឹមថ្ងៃព្រហស្បតិ៍នេះ។
លោក ឌី រ័ត្នខេមរុណ អភិបាលរងខណ្ឌមានជ័យ មានប្រសាសន៍ប្រាប់ នៅព្រឹកថ្ងៃទី៩ មេសា ឆ្នាំ២០២១នេះថា រោងចក្រកាត់ដេរ ឌីន ហាន មានទីតាំងស្ថិតនៅផ្លូវឌួងងៀប២ ភូមិថ្មី សង្កាត់ស្ទឹងមានជ័យទី៣ ខណ្ឌមានជ័យ រាជធានីភ្នំពេញ មានកម្មករសរុប២០០០នាក់ បានមកយកសំណាកគ្រប់ចំនួនហើយ។
លោកបញ្ជាក់ថា ចំពោះកម្មករដែលបានប៉ះពាល់ផ្ទះនឹងអ្នកផ្ទុកជំងឺកូវីដ១៩ ត្រូវបានគេយកទៅធ្វើចត្តាឡីស័ក នៅមណ្ឌលចត្តាឡីស័ក និងចំពោះកម្មករដែលប៉ះពាល់ដោយប្រយោល គឺតម្រូវឱ្យធ្វើចត្តាឡីស័ក ខ្លួនឯង នៅផ្ទះរៀងខ្លួន រយៈពេល១៤ថ្ងៃ។
សូមបញ្ជាក់ថា រោងចក្រកាត់ដេរ Din Han បានរកឃើញមានការឆ្លងជំងឺកូវីដ១៩ កាលពីថ្ងៃទី៧ ដោយមានកម្មករចំនួន៥០នាក់ បានរកឃើញមានផ្ទុកជំងឺកូវីដ១៩។
ទាក់ទងបញ្ហាខាងលើនេះ ឯកឧត្តម ឃួង ស្រេង អភិបាលរាជធានីភ្នំពេញ បានអំពាវនាវដល់កម្មករនិយោជិតទាំងអស់ដែលបម្រើការនៅរោងចក្រ ឌីន ហាន ត្រូវមកយកសំណាកដើម្បីពិនិត្យជាបន្ទាន់។ ជាមួយគ្នានេះ ឯកឧត្តម ក៏បានអំពាវនាវដល់បងប្អូនសាច់ញាតិ ឬមិត្តភ័ក្ដិរបស់កម្មករនិយោជិតទាំងនោះ ត្រូវជួយណែនាំឲ្យធ្វើចត្តាឡីស័ក (នៅដាច់ដោយឡែក) រយៈពេល ១៤ថ្ងៃ តាមចំនួនកំណត់ ហើយបើធ្វើមិនបានត្រឹមត្រូវទេ នឹងទទួលទោសពិន័យតាមច្បាប់ ជាក់ជាមិនខាន៕
អត្ថបទ ឈិត បូរ៉ាវី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
