កំពង់ឆ្នាំង៖ ដោយទទួលបានការណែនាំពីឯកឧត្តម ស៊ុន សុវណ្ណារិទ្ធិ អភិបាលនៃ​គណៈអភិបាលខេត្តកំពង់ឆ្នាំង នៅរសៀលថ្ងៃទី១២ ខែតុលា ឆ្នាំ២០២២នេះ លោក សាន់ យូ អភិបាលរងខេត្ត បានដឹកនាំក្រុមការងារ មានអភិបាលស្រុកកំពង់លែង បានចុះសួរសុខទុក្ខ និងនាំយកអំណោយរបស់ឯកឧត្តមអភិបាលខេត្ត ជូនប្រជាពលរដ្ឋ ១៣គ្រួសារ នៅឃុំផ្លូវទូក ស្រុកកំពង់លែង ដែលបានរងគ្រោះដោយខ្យល់ព្យុះធ្វើឲ្យលំនៅដ្ឋាន​របស់គាត់ត្រូវលិចចូលក្នុងទឹក​ទាំងស្រុង ក្នុងនោះមានភូមិថ្នល់ឈើទាល០៨ គ្រួសារ ភូមិពាមខ្នង៥គ្រួសារ ។

ក្នុងឱកាសសំណេះសំណាលនោះអភិបាលរងខេត្តបានដាក់ចេញនូវវិធានការបន្ទាន់ ដោយត្រៀមកម្លាំងនគរបាល ប្រជាការពារ និងយោធាប្រមាណជា ២០នាក់ និងមធ្យោបាយផ្សេងៗ ដើម្បីត្រួតពិនិត្យនិងប្រចាំការនៅក្នុងឃុំផ្លូវទូក ដើម្បីសង្គ្រោះពលរដ្ឋ ក្នុងហេតុការណ៍ខ្យល់ព្យុះមកដល់ ។ទន្ទឹមនោះក៏បានរៀបចំនៅទីទួលសុវត្ថិភាពមួយចំនួនថែមទៀត រួមទាំងគ្រូពេទ្យផងដែរ។

តាមការបញ្ជាក់របស់លោក ប៉ាត់ គន មេឃុំផ្លូវទូក ឲ្យដឹងថា : ដោយសារឆ្នាំនេះ​ស្ថានភាពទឹក​ទន្លេសាបឡើងខ្លាំង បានធ្វើឲ្យលំនៅដ្ឋានរបស់ប្រជាពលរដ្ឋ ក្នុងឃុំផ្លូវទូកចំនួន១៥៨ គ្រួសាររង​ផលប៉ះពាល់ ក្នុងនោះលំនៅដ្ឋាន១៧គ្រួសារ ត្រូវបានរងគ្រោះលិច​ក្នុងទឹកទាំងស្រុង​ដោយសារ​ខ្យល់ព្យុះ។ ប្រសិនបើទឹកទន្លេសាបនៅតែបន្តឡើង ហើយបើមានករណីខ្យល់ព្យុះទៀត លំនៅឋានពលរដ្ឋមួយ​ចំនួន​ទៀត ដែលសង់ទាប និងមានស្ថានភាពមិនរឹងមាំ អាចនឹងត្រូវលិចបន្តទៀត៕ អត្ថបទ ៖ ហុង វាស្នា