ភ្នំពេញ ៖ ឯកឧត្តម សោម សុគន្ធ រដ្ឋលេខាធិការប្រចាំការ តំណាងលោកជំទាវ បណ្ឌិតសភាចារ្យ ភឿង សកុណា រដ្ឋមន្រី្តក្រសួងវប្បធម៌ និងវិចិត្រសិល្បៈ បានអញ្ជើញប្រគល់វិញ្ញាបនបត្របញ្ជាក់ការសិក្សាជូនសិក្ខាកាម ចំនួន១៥នាក់ ​​នៅក្នុងគម្រោង “ក្រឡេកមើលទន្លេមេគង្គ​​ការចូលរួមរបស់យុវជន​ក្នុងសហគមន៍តាមរយៈភាពយន្តឯកសារ” នាល្ងាចថ្ងៃទី១២ ខែតុលា ឆ្នាំ២០២២ នៅមជ្ឈមណ្ឌលធនធានសោតទស្សន៍បុប្ផាណា។

​គម្រោងនេះ អនុវត្តដោយមជ្ឈមណ្ឌលធនធានសោតទស្សន៍បុប្ផាណា ដោយមានការគាំទ្រពីអង្គការ BBC Media Action ក្រោមការគាំទ្រផ្នែកហិរញ្ញវត្ថុពីទីភ្នាក់ងារកិច្ចសហប្រតិបត្តិការអភិវឌ្ឍ ន៍អន្តរជាតិរបស់ប្រទេសស៊ុយអែត(SIDA ) និងទីភ្នាក់ងារស្វីសសម្រាប់ការអភិវឌ្ឍនិង សហប្រតិបត្តិការ(SDC), និងមានការអញ្ជើញចូលរួមពីសំណាក់លោកស្រី ជេម៉ា ហេយ៍មេន (Gemma_Hayman) នាយិកាប្រចាំ ប្រទេសនៃអង្គការប៊ីប៊ីស៊ី មេឌា អ៊ែកសិន(BBC Media Action)​លោក ម៉ាកខឹស ប៊រលី (Markus Bürli) នាយកទីភ្នាក់ងារស្វីស លោកស្រី ខាមីឡា ម៉ុនស៊ីន អុតុសុន (Mrs. Camilla Mansine Ottosson) ប្រធានការិយាល័យនៃស្ថានទូតស៊ុយអែត​ប្រចាំនៅរាជធានីភ្នំពេញ។

បើតាមលោក ជា សុភាព នាយកប្រតិបត្តិមជ្ឈមណ្ឌលធនធានសោតទស្សន៍បុប្ផាណា បានឲ្យដឹងថា គោលបំណងសំខាន់របស់គម្រោងនេះ គឺផ្តល់ការបណ្តុះបណ្តាលជំនាញបច្ចេកទេស និងជំនាញទន់ដល់យុវជនកម្ពុជា ដើម្បីឱ្យពួកគេចេះសម្របខ្លួនជាមួយប្រជាជននៅតាមសហគមន៍ ដែលធ្វើឱ្យពួកគេអាចស្វែងយល់អំពីបរិស្ថាន ជីវភាពរស់នៅ និងវប្បធម៌របស់ប្រជាជនកម្ពុជាដែលរស់នៅអាស្រ័យផលទៅលើទន្លេមេគង្គ។ គោលបំណងសំខាន់មួយទៀត គឺផ្សព្វផ្សាយភាពយន្តឯកសារដែលផលិតដោយយុវជនជ័យលាភីទាំង១៥រូបនៅក្នុងគម្រោងនេះ ដើម្បីជំរុញ និងបង្កើនការចូលរួមរបស់យុវជនជាច្រើនផ្សេងទៀតនៅក្នុងសហគមន៍ ដើម្បីចូលរួមអភិវឌ្ឍសហគមន៍របស់ខ្លួន ប្រកបដោយចីរភាព។

សិក្ខាកាម បានសិក្សាពីដំណើរការនៃការផលិតភាពយន្តទាំងផ្នែកទ្រឹស្ដី និងការអនុវត្តជាក់ស្ដែង នៅគ្រប់ដំណាក់កាល នៃការផលិតភាពយន្តឯកសារ ដែលរួមានដំណាក់កាលមុនផលិត(Pre-Production) ដំណាក់កាលផលិត(Production) និងដំណាក់កាលក្រោយផលិត(Post-Production)។ បន្ថែមពីនេះ មជ្ឈមណ្ឌលបុប្ផាណា ក៏បានអញ្ជើញអ្នកជំនាញមកពីស្ថាប័នរដ្ឋ សង្គមស៊ីវិល និងអ្នកស្រាវជ្រាវឯករាជ្យ ដែលមានដូចជាអង្គការWWF កម្មវិធី អភិបាលកិច្ចទន្លេមេគង្គនៃអង្គការអុកស្វាម វេទិកាអង្គការមិនមែនរដ្ឋាភិបាលស្ដីពីកម្ពុជា(NGO Forum on Cambodia) គម្រោងអច្ឆរិយភាពរបស់ទន្លេមេគង្គ និងរដ្ឋបាលជលផល ដើម្បីមកធ្វើបទបង្ហាញអំពីសក្តានុពលនិង កត្តាប្រឈមនានារបស់ទន្លេមេគង្គដល់សិក្ខាកាមរបស់គម្រោង។

ជាមួយគ្នានោះដែរ ឯកឧត្តម សោម សុគន្ធ សូមសម្តែងនូវការត្រេកអរកោតសសរសើរ និងវាយតម្លៃខ្ពស់ចំពោះគំនិតផ្ដួចផ្ដើម​របស់មជ្ឈមណ្ឌលធនធានសោត​ទស្សន៍​បុប្ផាណា​ អង្គការ BBC Media Action ទីភ្នាក់ងារកិច្ចសហប្រតិបត្តិ ការអភិវឌ្ឍន៍អន្តរជាតិរបស់ប្រទេសស៊ុយអែត (SIDA) និងទីភ្នាក់ងារស្វីសសម្រាប់ការអភិវឌ្ឍនិងសហ ប្រតិបត្តិការ(SDC) ក្នុងការបង្កើតឱ្យមានគម្រោងនេះឡើង ដែលឆ្លុះបញ្ចាំងពីការយកចិត្តទុកដាក់ខ្ពស់ក្នុងការ កសាងសមត្ថភាពរបស់យុវជនកម្ពុជា ឲ្យចូលរួមចំណែកផ្សព្វផ្សាយពីវប្បធម៌របស់សហគមន៍តាមដងទន្លេមេគង្គ របៀបរបបនៃការរស់នៅ​របស់​មនុស្សដែល​បន្តអនុវត្តពី​ជំនាន់​មួយទៅជំនាន់មួយ និង ការបង្ហាញពីទន្លេ ដែល ជាប្រភពនៃវប្បធម៌ដ៏សំខាន់នៅក្នុងប្រវត្តិសាស្ត្ររបស់មនុស្សជាតិ តាមរយៈការផលិតភាពយន្តឯកសារ។

ឆ្លៀតឱកាសនេះ ឯកឧត្តម សោម សុគន្ធ ក៏បានផ្ដាំផ្ញើ និងលើកទឹកចិត្តដល់ក្មួយៗ​ដែល​ជាសិក្ខាកាម​ទាំងអស់​ដែល​បាន​បញ្ចប់ការសិក្សា​ដោយ​ជោគជ័យនៅ​ក្នុងវគ្គបណ្តុះបណ្តាល​ត្រូវខិតខំអភិវឌ្ឍសមត្ថភាពជំនាញរបស់ខ្លួន ក៏ដូចជាបន្ត​ផលិតឯកសារសោតទស្សន៍ ដើម្បីចូលរួមថែរក្សានិងលើកកម្ពស់វប្បធម៌ ប្រពៃណី ទំនៀមទម្លាប់នៅក្នុងប្រទេសកម្ពុជា។ ការផលិត និងផ្សព្វផ្សាយភាពយន្តឯកសារ ពិតជាបានដើរតួនាទីយ៉ាងសំខាន់ក្នុងការចូលរួម​អនុវត្តកម្មវិធីនយោបាយ​របស់រាជរដ្ឋាភិបាល​ពិសេសគោលនយោបាយ​ជាតិស្ដីពីវិស័យវប្បធម៌ឲ្យ​សម្រេចបានជោគជ័យ ព្រោះការផ្សព្វផ្សាយ​នេះ​បាន​រួមចំណែកដល់ការការពារ ថែរក្សាកេរ្ដិ៍ដំណែល វប្បធម៌និងការពង្រឹងអត្តសញ្ញាណជាតិ៕​អត្ថបទ ៖ រដ្ឋា