ភ្នំពេញ៖ អគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ (ក.ប.ប.) នៃក្រសួងពាណិជ្ជកម្ម បានសហការជាមួយសភាពាណិជ្ជកម្មកម្ពុជា ដើម្បីរៀបចំសិក្ខាសាលាផ្សព្វផ្សាយច្បាប់ស្ដីពីការប្រកួតប្រជែង និងច្បាប់ស្ដីពីកិច្ចការពារអ្នកប្រើប្រាស់។

នៅក្នុងអង្គសិក្ខាសាលា កាលពីព្រឹកថ្ងៃទី១២ ខែតុលា ឆ្នាំ២០២២នេះ នៅសភាពាណិជ្ជកម្មកម្ពុជា ឯកឧត្ដម ផាន អូន ​បានមានប្រសាសន៍ថា គោលបំណងនៃការរៀបចំសិក្ខាសាលានេះ គឺ​ដើម្បី​បញ្ជ្រាបការ​យល់ដឹងផ្នែកច្បាប់ចៀសវាង​អនុវត្ត​ខុស​ជាយថាហេតុដោយធុរជន​ សិទ្ធិអំណាច​របស់​មន្រ្តី​ស៊ើបអង្កេត ​សិទ្ធិរបស់​អ្នកប្រើប្រាស់​ និងកាតព្វកិច្ចរបស់ធុរជន​។

សិក្ខាសាលានេះ ​គឺជាវេទិកាយ៉ាងសំខាន់មួយ ក្នុងគោលបំណងជំរុញ លើកកម្ពស់កិច្ចការពារ​អ្នក​ប្រើប្រាស់​ និងកិច្ចការប្រកួតប្រជែង ​ព្រមទាំងចែករំលែកនូវបទពិសោធន៍ល្អៗទៅវិញទៅមក និង​ពិភាក្សាបញ្ហាថ្មីៗ ដែលបាននឹងកំពុងកើតមានឡើងពាក់ព័ន្ធដល់ការអនុវត្តច្បាប់​ស្ដីពីការ​ប្រកួតប្រជែង ​និងច្បាប់ស្ដីពីកិច្ចការពារអ្នកប្រើប្រាស់កន្លងមក។

ទន្ទឹមនឹងការអនុវត្តច្បាប់ទាំងពីរនេះ​ អគ្គនាយកដ្ឋាន ក.ប.ប. ក៏ផ្តោតសំខាន់លើការបញ្ជ្រាប​វប្បធម៌​នៃការប្រកួតប្រជែងដោយស្មើភាព ​និងការការពារអ្នកប្រើប្រាស់ ​តាមរយៈការផ្សព្វផ្សាយ ក៏ដូចជា​ការជំរុញការយល់ដឹង ​ដល់ភាគីពាក់ព័ន្ធរួមមាន សហគមន៍ពាណិជ្ជកម្ម ​ស្ថាប័នរដ្ឋ ស្ថាប័នឯកជន ប្រព័ន្ធតុលាការ ដៃគូអភិវឌ្ឍន៍ ​បណ្តាញផ្សព្វផ្សាយ និងសាធារណជនទូទៅ ​លើបទប្បញ្ញត្តិនៃច្បាប់ និងការទទួលខុសត្រូវរួមគ្នា ​ដើម្បីធានាថា​ស្ថាប័នទាំងនោះមើលឃើញពីផល​ប្រយោជន៍​នៃការ​ប្រកួតប្រជែង និងការការពារអ្នកប្រើប្រាស់ នៅក្នុងការអភិវឌ្ឍសេដ្ឋកិច្ចជាតិ។

ក្នុងឱកាសនេះ អគ្គនាយកសភាពាណិជ្ជកម្មកម្ពុជា ​ឯកឧត្ដមឧកញ៉ា ងួន ម៉េងតិច បានណែនាំឱ្យ​អង្គសិក្ខា​សាលាទាំងមូល សូមយកចិត្តទុកដាក់ស្តាប់នូវមាត្រាសំខាន់ៗ​នៃច្បាប់ទាំងនេះ ​ព្រោះថា ប្រៀប​បានដូចជារបងដ៏រឹងមាំមួយ ​ដែលអាចជួយឱ្យអ្នកកំពុងប្រកបរបរទទួលទាន​ដោយស្មោះត្រង់ និងសុចរិត​ទទួលបាននូវការគាំពារពីសំណាក់រាជរដ្ឋាភិបាល ​ក៏ដូចជាអគ្គនាយកដ្ឋាន ក.ប.ប ក្នុង​ការប្រកបអាជីវកម្មរបស់ខ្លួនដោយមិនមានភាពភ័យខ្លាច និងឈ្នះនូវគូរប្រកួតប្រជែង ដែល​មិនស្មោះត្រង់ណាមួយ៕អត្ថបទ៖ ឈិត បូរ៉ាវី