ភ្នំពេញ៖ ស្ត្រីត្រូវបានចាត់ទុកជាភ្នាក់ងារនៃការផ្លាស់ប្តូរ និងកម្លាំងផ្លាស់ប្តូរក្នុងការស្តារសេដ្ឋកិច្ច និងការបង្កើតភាពធន់យូរអង្វែងក្នុងជីវិត និងជីវភាពរស់នៅរបស់គ្រួសារ សហគមន៍ និងសង្គមជាតិ។
លោកជំទាវកិត្តិបណ្ឌិត អ៊ឹង កន្ថាផាវី រដ្ឋមន្ត្រីក្រសួងកិច្ចការនារី លើកឡើងនៅក្នុងវេទិការនិងពិធីប្រគល់ពាន់រង្វាន់ សហគ្រិនស្ត្រីអាស៊ាន នៅថ្ងៃទី១៣ ខែតុលា ឆ្នាំ២០២២ នេះថា នៅក្នុងការរីករាលដាលនៃជំងឺរាតត្បាតកូវីដ-១៩ យើងបានមើលឃើញពីភាពរឹងមាំ និងភាពប៉ិនប្រសប់ របស់សហគ្រិនស្ត្រីនៅក្នុងអាស៊ាន ខណៈដែលវេទិកាឌីជីថលបានក្លាយជាដំណោះស្រាយភ្លាមៗ និងយូរអង្វែងសម្រាប់សហគ្រិនស្ត្រីជាច្រើន ដែលអាចចាប់យកឱកាសនៃការលេចចេញជារូបរាងឡើង ជាក់ស្តែងពានរង្វាន់ពិសេសអាស៊ានរបស់សហគ្រិនស្ត្រី ដែលរៀបចំឡើង ជាផ្នែកនៃកិច្ចប្រជុំកំពូលស្ត្រីអាស៊ានលើកទី២ មានគោលបំណងបង្ហាញពីសារៈសំខាន់ នៃភាពជាសហគ្រិនរបស់ស្ត្រី ក្នុងការអភិវឌ្ឍន៍សេដ្ឋកិច្ច និងការងើបឡើងវិញនៃអាស៊ាននៅគ្រប់កម្រិត, ហើយវាក៏បម្រើឱ្យការទទួលស្គាល់សមិទ្ធិផលរបស់សហគ្រិនស្ត្រី មកពីគ្រប់ប្រភេទ នៃកិច្ចខិតខំប្រឹងប្រែងអាជីវកម្ម និងពីគ្រប់មជ្ឈដ្ឋាន នេះជាកម្លាំងចិត្តសម្រាប់អាស៊ានទាំងអស់គ្នា និងសម្រាប់ក្មេងជំនាន់ក្រោយនៃប្រទេស និងតំបន់របស់យើងផងដែរ។
លោកជំទាវ បន្តថា ជាការពិតពានរង្វាន់នេះ គឺជាសក្ខីភាពមួយចំពោះការប្តេជ្ញាចិត្តយ៉ាងមុតមាំរបស់កម្ពុជា និងអាស៊ានក្នុងការដោះសោរ ភាពជាសហគ្រិនស្ត្រី និងដើម្បីលើកកម្ពស់ការអភិវឌ្ឍសហគ្រិនភាពរបស់ស្ត្រី ដែលជាកត្តាសំខាន់នៃវិធីសាស្ត្រ ក្នុងការពង្រឹងសេដ្ឋកិច្ចរបស់ស្ត្រី, ជាក់ស្តែងពានរង្វាន់ពិសេសនេះ មានលក្ខណៈប្លែកពីគេ ដោយសារវាមិនមែនជាពានរង្វាន់ឯកត្តជន ប៉ុន្តែជាផ្នែកសំខាន់មួយ នៃកិច្ចប្រជុំកំពូលស្ត្រីអាស៊ានលើកទី២ ដែលប្រធានបទនេះគឺផ្តោតលើស្ត្រីភាពជាសហគ្រិន ដូច្នេះហើយម្ចាស់ពានរង្វាន់កំពុងបង្កើតកំណត់ត្រា និងប្រវត្តិសាស្ត្រអាស៊ាន ជាមួយកម្ពុជា ដែលជាប្រធានអាស៊ាននៅឆ្នាំ២០២២។
លោកជំទាវកិត្តិបណ្ឌិត អ៊ឹង កន្ថាផាវី បញ្ជាក់ថា ក្នុងកិច្ចប្រជុំកំពូលស្ត្រីអាស៊ានលើកទី២ នេះ ស្ត្រីត្រូវបានចាត់ទុកជាភ្នាក់ងារនៃការផ្លាស់ប្តូរ និងកម្លាំងផ្លាស់ប្តូរក្នុងការស្តារសេដ្ឋកិច្ច និងក្នុងការបង្កើតភាពធន់យូរអង្វែងក្នុងជីវិត និងជីវភាពរស់នៅរបស់គ្រួសារសហគមន៍ និងសង្គម ដោយយើងទាំងអស់គ្នាបានដឹងថា ដើម្បីចាប់ផ្តើមអាជីវកម្ម និងជំរុញកំណើន និងនិរន្តរភាពនៃភាពជាសហគ្រិនរបស់ស្ត្រី ការទទួលបានការអប់រំប្រកបដោយគុណភាពខ្ពស់ និងភាពជាសហគ្រិន និងជំនាញអភិវឌ្ឍន៍អាជីវកម្មគឺចាំបាច់។ ជុំវិញបញ្ហានេះ លោកជំទាវសង្ឃឹមថា ស្ត្រីដែលជាសហគ្រិនអាស៊ានទាំងអស់ បន្តគាំទ្រ និងធ្វើការរួមគ្នាដើម្បីជួយស្ត្រីផ្សេងទៀតដូចជា ស្ត្រីជនបទ ស្ត្រីពិការ និងស្ត្រីជនជាតិភាគតិច តាមរយៈការអនុវត្តអាជីវកម្មដែលរួមបញ្ចូល និងនិរន្តរភាព និងតាមរយៈការពង្រីកការរួមសហការ និងការសហការគ្នាជាដើម៕ អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
