ភ្នំពេញ៖ យុវជនតំណាងប្រទេសអាស៊ានទាំង១០ ដែលបានធ្វើដំណើរមកចូលរួមការប្រកួត​ប្រជែង​យុវជនអាស៊ាន ព្រឹត្តិការណ៍អមនៃកិច្ចប្រជុំASCCលើកទី២៨ បានបង្ហាញពីចំណាប់អារម្មណ៍ពេញ​ចិត្ត​ដំ​ណើរកំសាន្តរបស់ពួកគេនៅកម្ពុជា និងប្តេជ្ញាថា នឹងផ្សព្វផ្សាយពលរដ្ឋរបស់ពួកគេមក​កម្ពុជា​ឆ្នាំ២០២៣ ដើម្បីចូលរួមគាំទ្រលើកចិត្តកីឡាករកីឡាការនីប្រកួតយកមេដាយក្នុងព្រឹត្តិការណ៍SEA GAME ឆ្នាំ២០២៣។

បើតាមតំណាងក្រុមយុវជនអាស៊ានមកពីប្រទេសម៉ាឡេស៊ី ឡាវ ជាដើម បានលើកឡើងថា ជាក់​ស្តែង​គ្រប់ការប្រកួតកីឡា​ គឺទាមទាមការគាំទ្រ ​ការលើកទឹកចិត្តកីឡាករ កីឡាការិនី​ដើម្បីយកប្រៀប​លើ​ដៃគូប្រកួត​ នឹងដណ្តើមមេដាយជូនជាតិ ​ដូចនេះនៅពេលត្រឡប់ដល់ប្រទេសពួកគេវិញ នឹង​ចូលរួមផ្សព្វផ្សាយ ​អំពាវនាវឲ្យប្រជាជន ​ជាពិសេសក្រុមយុវជន ​នាំគ្នាទស្សនាកម្ពុជា ឆ្នាំ២០២៣ ដើម្បីចូលរួមផ្តល់កំលាំងចិត្តដល់កីឡាករ ​នៅក្នុងព្រឹត្តិការណ៍SEA GAME ២០២៣ ដែលកម្ពុជា​ទទួល​ធ្វើជាម្ចាស់ផ្ទះលើកដំបូងក្នុងប្រវត្តិសាស្ត្រ។

ក្រុមយុវជនឆ្នើមរបស់​ប្រទេសអាស៊ានទាំងនោះ ថ្លែងថា តាមរយៈការមកចូលរួមប្រកួតជជែក​ដេញ​ដោលយុវជនអាស៊ានឆ្នាំ២០២២ ​និងកម្មវិធីផ្សេងៗទៀតនៅ​កម្ពុជានាពេលនេះ ពួកគេចាប់​អារម្មណ៍លើ ​ការមកស្នាក់នៅ​ ដើរកម្សាន្តនៅរាជធានីភ្នំពេញ ​តំលៃសេវាស្នាក់នៅ តំលៃម្ហូបអាហារ​តាមភោជនីយដ្ឋាន ​គឺមិនសូវថ្លៃខ្លាំងណាស់ណានោះទេ ​ហើយមានសេវាល្អសំបូរបែប ជាពិសេស​ពលរដ្ឋខ្មែរ​ញញឹម​រាក់ទាក់​ ធ្វើឲ្យយើងមកស្នាក់នៅកម្ពុជា ​មានភាពកក់ក្តៅ ហើយធ្វើយើង​មាន​អារម្មណ៍ដូចបងប្អូននៅក្នុងគ្រួសារតែមួយ ។ ពួកគេនឹងមកមកលេងកម្ពុជា​ម្តងទៀត ពិសេស​ចង់ទៅលេងអង្គរវត្ត។

សូមបញ្ជាក់ថា ការលើកឡើងរបស់ក្រុមយុវជនឆ្នើមប្រទេសអាស៊ាន អោយមានអ្នក​មកទស្សនា​កម្ពុជា ឆ្នាំ២០២៣ ​គឺបានធ្វើឡើងស្របពេល ​ប្រមុខថ្នាក់ដឹកនាំរាជរដ្ឋាភិបាលកម្ពុជា ប្រកាស​អនុវត្តយុទ្ធនាការទស្សនា​កម្ពុជា ឆ្នាំ២០២៣ ​ខណៈពេលដែលកម្ពុជារៀបចំធ្វើ​ជាម្ចាស់ការ​ប្រកួត​កីឡាSEA GAME និងប្រកួតកីឡាPARA Gameឆ្នាំ២០២៣ ​ហើយក្រសួងទេសចរណ៍រំពឹងថា ព្រឹត្តិការណ៍​នេះ នឹងមានទេសចរអន្តរជាតិ មកទស្សនាកម្ពុជា​ ប្រមាណពី ២៥ម៉ឺនទៅ៥០ម៉ឺននាក់៕ អត្ថបទ៖ ស៊ុម សុខជា