អឺរ៉ុបខាងលិច៖ ពលរដ្ឋជាង ៦០% ក្នុងប្រទេសនិមួយៗនៃប្រទេសចំនួន៧ ក្នុងអឺរ៉ុបខាងលិច ត្រូវបានអះអាងដោយក្រុមហ៊ុនស្រាវជ្រាវទិន្នន័យ YouGov ដែលលើកឡើងថា រដ្ឋាភិបាលរបស់ពួកគេពុំបានដោះស្រាយជីវភាពរស់នៅរបស់ពលរដ្ឋឲ្យបានសមរម្យនោះទេ។
ពលរដ្ឋភាគច្រើនត្រូវបានបង្ខំឲ្យកាត់បន្ថយការចំណាយក្នុងផ្ទះរបស់ពួកគេ និងរំពឹងថានិន្នាការនេះនៅតែបន្ត។ ប្រទេសទាំងនោះបានវិភាគនៅក្នុងការស្ទង់មតិនេះរួមមានចក្រភពអង់គ្លេស អ៊ីតាលី អាល្លឺម៉ង់ អេស្ប៉ាញ បារាំង ស៊ុយអែត និងដាណឺម៉ាក។ ការមិនសប្បាយចិត្តពីប្រជាពលរដ្ឋដ៏ច្រើនលើសលុបនេះ ត្រូវបានបញ្ជាក់ដោយក្រុមអ្នកឆ្លើយតបជនជាតិអង់គ្លេស និងអ៊ីតាលី។ ប្រមាណ ៨២% នៅក្នុងប្រទេសទាំង២ នេះវាយតម្លៃថា ការប៉ុនប៉ងគ្រប់គ្រងការចំណាយរបស់រដ្ឋាភិបាលពួកគេមិនល្អ ដោយមានត្រឹម ១០% ទៅ ១៣% ប៉ុណ្ណោះដែលនិយាយថា មេដឹកនាំពួកគេកំពុងដឹកនាំប្រទេសបានល្អហើយ។
ទោះយ៉ាងណាក៏ដោយ ក្រុមអ្នកបង់ពន្ធមកពីបណ្ដាប្រទេសអឺរ៉ុបខាងជើង បានបង្ហាញអត្រាការសប្បាយចិត្តខ្ពស់ជាង។ ខណៈដែល ៦៥% នៅក្នុងប្រទេសស៊ុយអែត និង ៦២% នៅក្នុងប្រទេសដាណឺម៉ាកមានការមិនសប្បាយចិត្ត ២៧% នៅក្នុងប្រទេសទាំង២ នេះបាននិយាយថា រដ្ឋាភិបាលទាំងនោះកំពុងបំពេញការងារបានល្អ ក្នុងការដោះស្រាយបញ្ហាជីវភាពរស់នៅរបស់ពលរដ្ឋ។ ក្រុមហ៊ុន YouGov បាននិយាយថា មិនតិចជាង ៨០% ទេសម្រាប់ពលរដ្ឋនៅក្នុងប្រទេសនិមួយៗបានកាត់បន្ថយការចំណាយប្រចាំថ្ងៃ ឬជឿថាពួកគេត្រូវតែធ្វើបែបនេះ កើនឡើងដល់ ៩៣% នៅក្នុងប្រទេសអ៊ីតាលី។ ការចំណាយលើថាមពល និងជីវភាពរស់នៅប្រចាំថ្ងៃនៅអឺរ៉ុបបានកើនឡើងយ៉ាងខ្លាំង ស្របពេលដែលជម្លោះអ៊ុយក្រែននៅតែបន្ត៕
អត្ថបទ៖ សុខមាន
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
