កំពង់ឆ្នាំង៖ នៅរសៀលថ្ងៃទី១៤ ខែតុលា ឆ្នាំ២០២២នេះ ឯកឧត្តម ភួង សោភា រដ្ឋលេខាធិការក្រសួងអភិវឌ្ឍន៍ជនបទ ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំង ​ លោក ជិន រដ្ឋា ប្រធានមន្ទីរអភិវធ្ឍន៍ជនបទ លោក សេង វិចិត្រ អភិបាលស្រុករលាប្អៀរ បានដឹកនាំក្រុមការងារចុះពិនិត្យស្រាវជ្រាវប្រជាពលរដ្ឋដែលរងផលប៉ះពាល់នៅក្នុងស្រុករលាប្អៀរ ក្នុងនោះបានរកឃើញប្រជាពលរដ្ឋ១៤១៧គ្រួសារ បានរងផលប៉ះពាល់ និង២៣០គ្រួសារបានជម្លៀសមកកាន់ទីទួលសុវត្ថិភាព។

 ឯកឧត្តម ស៊ុន សុវណ្ណារិទ្ធិ អភិបាលខេត្តកំពង់ឆ្នាំងបានថ្លែងថា៖ ក្រោយពីតាមដាន ស្រាវជ្រាវពីសំណាក់ក្រុមការងារ ជាលទ្ធផលឃើញថាមានប្រជាពលរដ្ឋចំនួន១៤១៧គ្រួសារបានរងផលប៉ពាល់ និងប្រជាពលរដ្ឋចំនួន២៣០គ្រួសារ បានជម្លៀសមកកាន់ទីទួលសុវត្ថិភាព។ ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ បានយកចិត្តទុកដាក់អោយមន្ត្រីគ្រប់រូប ឆ្លៀតពេលពីការងារនៅក្រសួង ចុះមកតាមបណ្តាស្រុកដែលលិចទឹកទាំងអស់របស់ខេត្តកំពង់ឆ្នាំង ដើម្បីពិនិត្យមើលហេដ្ឋារចនាសម្ព័ន្ធផ្លូវ និងប្រជាពលរដ្ឋដែលរងផលប៉ះពាល់នៅតាមមូលដ្ឋានដែលកំពុងរងផលប៉ះពាល់ពីជំនន់ទន្លេសាបនេះផងដែរ។ ក្នុងពេលចុះបំពេញការងារនោះ ក្រុមការងារ ក៏បាននាំយកអំណោយរបស់ឯកឧត្តមបណ្ឌិតសភាចារ្យ អ៊ុក រ៉ាប៊ុន រដ្ឋមន្ត្រីក្រសួងអភិវឌ្ឍន៍ជនបទ ប្រគល់ជូនប្រជាពលរដ្ឋ២០គ្រួសារ ដែលរងផលប៉ះពាល់ខ្លាំងជាងគេនៅក្នុងភូមិកោះកែវ ឃុំស្វាយជ្រុំ។

លោក សេង វិចិត្រ អភិបាលស្រុករលាប្អៀរបានអោយដឹងថា៖ នៅឆ្នាំ២០២២នេះ ជំនន់ទន្លេសាបបានធ្វើអោយប៉ះពាល់ដល់ផ្លូវថ្នល់ជាង៣៥គីឡូម៉ែត្រ ស្ពានលូ៤១កន្លែង ។ ដោយឡែកប្រជាពលរដ្ឋជាង១៤០០គ្រួសារបានរងផលប៉ះពាល់ និង២៣០គ្រួសារត្រូវបានជម្លៀសមកកាន់ទីទួលសុវត្ថិភាព។ ទោះបីជាយ៉ាងណាក៏ដោយ ក្រុមការងារ បានពិនិត្យស្រាវជ្រាវយ៉ាងល្អិតល្អន់ពាក់ព័ន្ធនឹងជំនន់ទន្លេសាបឆ្នាំនេះ និងស្រូវប៉ះពាល់ចំនួន៣៩៨ុំ៤៦ហិកតា៕ អត្ថបទ​ ៖ ហុង វាស្នា