ភ្នំពេញ៖ នៅព្រឹកថ្ងៃទី១៤ ខែតុលា ឆ្នាំ២០២២ ឯកឧត្ដមបណ្ឌិត អូស្មាន ហាស្សាន់ ទេសរដ្ឋមន្ដ្រីទទួលបន្ទុកបេសកកម្មពិសេស អញ្ជើញជួបសម្ដែងការគួរសម និងពិភាក្សាការងារ ជាមួយ ឯកឧត្ដមបណ្ឌិត Masagos Zulkifli bin Masgos Mohamad រដ្ឋមន្ត្រីក្រសួងអភិវឌ្ឍន៍សង្គម និងគ្រួសារ, រដ្ឋមន្ត្រីទី២ សុខាភិបាល និងជារដ្ឋមន្ត្រីទទួលបន្ទុកកិច្ចការសាសនាឥស្លាម នៃប្រទេសសិង្ហបុរី។
ជំនួបនេះ ធ្វើឡើងនៅទីស្នាក់ការគណរដ្ឋមន្ត្រី ក្នុងឱកាសដែល ឯកឧត្ដមបណ្ឌិតរដ្ឋមន្ត្រីក្រសួងអភិវឌ្ឍន៍សង្គម និងគ្រួសារនៃសិង្ហបុរី អញ្ជើញចូលរួមកិច្ចប្រជុំក្រុមប្រឹក្សាសហគមន៍សង្គម-វប្បធម៌អាស៊ាន លើកទី២៨ នៅរាជធានីភ្នំពេញ។
ក្នុងឱកាសនោះ ទេសរដ្ឋមន្ត្រី អូស្មាន ហាស្សាន់ បានលើកឡើងថា កម្ពុជាក្រោមការដឹកនាំរបស់រាជរដ្ឋាភិបាល ដែលមានសម្តេចតេជោ ហ៊ុន សែន ជានាយករដ្ឋមន្ត្រី បានធ្វើឲ្យសាសនាទាំងអស់នៅកម្ពុជា ទទួលបានសុខដុមនីយកម្ម គ្មានជម្លោះសាសនា គ្មានការរើសអើង និងជាពិសេសសហគមន៍ឥស្លាម ក៏ទទួលបាននូវការយកចិត្តទុកដាក់ និងការផ្តល់ជូនជាច្រើន ដែលបានធ្វើឲ្យមានការរីកចម្រើនទាំងវិស័យអប់រំ និងសេដ្ឋកិច្ចសង្គម ប្រែមុខមាត់ដូចប្រជាជនទូទៅ។
ឯកឧត្តមទេសរដ្ឋមន្ត្រី ក៏បានលើកសំណើដល់ភាគីសិង្ហបុរី សូមឲ្យមានកម្មវិធីដំណើរទស្សនកិច្ចទៅប្រទេសសិង្ហបុរី សម្រាប់មន្រី្តជំនាញកម្ពុជា ដើម្បីធ្វើការស្វែងយល់ និងចែករំលែកពីវប្បធម៌ទៅវិញទៅមករវាងប្រទេសទាំងពីរ។
ជាមួយគ្នានោះ ឯកឧត្តមបណ្ឌិត Masagos Zulkifli bin Masgos Mohamad ក៏បានថ្លែងអំណរគុណ និងកោតសរសើរចំពោះ រាជរដ្ឋាភិបាលកម្ពុជា ដែលបានកំពុងធ្វើឲ្យមានសុខដុមនីយកម្មជាតិសាសន៍ និងដឹកនាំប្រទេសទទួលបាន សុខសន្តិភាព គ្មានអំពើហិង្សា គ្មានការរើសអើង មានការរីកចម្រើន និងការអភិវឌ្ឍលើគ្រប់វិស័យ។
ឯកឧត្តមបណ្ឌិតរដ្ឋមន្ត្រីក្រសួងអភិវឌ្ឍន៍សង្គម និងគ្រួសារ ក៏បានឯកភាព និងស្វាគមន៍ចំពោះមន្ត្រីជំនាញ ក៏ដូចជាថ្នាក់ដឹកនាំកម្ពុជា ក្នុងការបំពេញ ទស្សនកិច្ចនៅប្រទេសសិង្ហបុរី ដើម្បីសិក្សាស្វែងយល់បន្ថែមពីវប្បធម៌កម្ពុជា-សិង្ហបុរី។ ឯកឧត្តមបណ្ឌិត បានសង្ឃឹមយ៉ាងមុតមាំថា ទំនាក់ទំនងកិច្ចសហប្រតិបត្តិការទ្វេភាគីរវាងកម្ពុជា-សិង្ហបុរី មានភាពកាន់តែរឹងមាំ និងល្អប្រសើរឡើងបន្ថែមទៀត៕ អត្ថបទ៖ ប៊ុនថៃ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
