​អង់គ្លេស៖ បណ្ដា​មេដឹកនាំ​ពិភពលោក​បាន​បង្ហាញ​ការ​សោកស្ដាយ​ និង​ចូលរួម​រំលែក​ទុក្ខ​ចំពោះ​ការ​យាង​ចូល​ទិវង្គត​របស់​ព្រះអង្គម្ចាស់ Philip ជា​ព្រះ​ស្វាមី​របស់​ម្ចាស់ក្សត្រី Elizabeth II ដែល​បាន​សោយទិវង្គត​ក្នុង​ព្រះជន្ម ​៩៩​ព្រះវស្សាកាលពី​ថ្ងៃ​សុក្រ​ម្សិលមិញ​។​

​លោក​ប្រធានាធិបតី​បារាំង Emmanuel Macron បាន​ចូលរួម​រំលែក​ទុក្ខ និង​គោរព​ព្រះ​វិញ្ញាណក្ខន្ធព្រះ​អង្គម្ចាស់ Philip តាម​បណ្ដាញ​សង្គម​ធ្វី​ត​ធ័​រ និង​និយាយ​ថា​ ព្រះអង្គ​គឺជា​គំរូ​នៃ​ភាព​អង់អាច​ក្លាហាន ក្នុង​ការ​បំពេញ​ព្រះ​រាជកិច្ច​ និង​ការ​តាំង​ព្រះទ័យ​ដ៏​មុតមាំចំពោះ​យុវជន និង​បរិស្ថាន​។​ នាយករដ្ឋមន្ត្រី​ប៉ា​គី​ស្ថាន លោក Imran Khan បាន​និយាយ​ថា ចក្រភព​អង់គ្លេស​បាន​បាត់បង់​មនុស្ស​រៀមច្បង​ដ៏​ឈ្លាស​វៃ ដែល​ត្រូវ​បាន​ជ្រួត​ជ្រាប​ពី​ស្មារតី​តែមួយគត់នៃ​ការ​ផ្ដល់​សេវា​សាធារណៈ​។

​ប្រធាន​គណៈកម្មការ​សហភាព​អឺរ៉ុប លោកស្រី Ursula von der Leyen, លោក​ប្រធានាធិបតី​អេហ្ស៊ីប Abdel Fattah el-Sissi និង​អនុ​ប្រធានាធិបតី​អារ៉ាប់​រួម លោក Sheikh Mohammed bin Rashid Al Maktoum ក៏បាន​ចូលរួម​រំលែក​ទុក្ខ​ដល់​ព្រះរាជ​វង្ស​របស់​ព្រះអង្គ​ផង​ដែរ​។ ស្ថាន​ទូត​អង់គ្លេស​ប្រចាំ​ទីក្រុង​រ៉ូម​ប្រទេស​អ៊ីតាលី បាន​បង្ហូត​ទង់​ជាតិ​ពាក់កណ្ដាល​ដង បន្ទាប់ពី​ការ​សោយ​ទិវង្គត​របស់​ព្រះអង្គម្ចាស់ Philip ត្រូវ​បាន​ប្រកាស​៕

អត្ថបទ៖ សុខមាន