​​សូ​ម៉ាលី​៖ កសិករ​នៅ​ភាគ​កណ្តាល​ប្រទេស​សូ​ម៉ាលីបាន​ចូលរួម​ការប្រយុទ្ធ ​ក្នុង​ប្រតិបត្តិ​ការបន្ត​ប្រឆាំង​ក្រុម​ជ្រុលនិយម​អ៊ីស្លាម al-Shabab​។ ​ក្រុម al-Shabab ដែល​ប្រឆាំង​រដ្ឋាភិបាល​សហព័ន្ធ និង​វត្តមាន​របស់​កងកម្លាំង​រក្សា​សន្តិភាព និង​កងកម្លាំង​បរទេស​ផ្សេងទៀត​នៅលើ​ទឹកដី​ប្រទេស​សូ​ម៉ាលី បាន​ដណ្តើមយក​ទឹកដី​ក្នុងប្រទេស​ក្នុង​ប៉ុន្មាន​ឆ្នាំ​ថ្មីៗ​នេះ ដោយ​ទាញយក​ផលប្រយោជន៍​ពី​ភាពវឹកវរ​ផ្នែក​សន្តិសុខ​របស់​ប្រទេស​សូ​ម៉ាលី និង​ភាព​ខ្វែងគំនិត​គ្នា​រវាង​អាជ្ញាធរ​សហព័ន្ធ និង​មេដឹកនាំ​ក្នុង​តំបន់​។

ប្រធានាធិបតី​សូ​ម៉ាលី​កាល​ពី​ពេល​ថ្មីៗ​នេះ​បានប្រកាស​សង្គ្រាម​ប្រឆាំង​ក្រុម al-Shabab បន្ទាប់ពី​ការវាយប្រហារ​ដ៏​ឃោរឃៅ​ទៅ​លើ​សណ្ឋាគារ​មួយកន្លែង​ក្នុង​ទីក្រុង Mogadishu កាលពី​ខែ​សីហា​។ ​ផ្នែក​មួយ​នៃ​ការឆ្លើយតបគឺ​ត្រូវ​ជ្រើសរើស​កសិករ​ទៅ​ប្រយុទ្ធ​នៅក្នុង​តំបន់​ដែលក្រុម al-Shabab បាននឹងកំពុង​ធ្វើ​ប្រតិបត្តិការ​។ នៅ​តំបន់ Hiraan ជា​កន្លែង​ដែល​ការប្រយុទ្ធ​គ្នា​ខ្លាំង​បំផុត​បាននឹងកំពុង​កើតឡើង កសិករ​បាន​ក្លាយជា​អ្នក​ប្រយុទ្ធ​ដែល​បាន​បង្កើតជា​កងជីវពល​មួយក្រុម។​ មេបញ្ជាការ​កងជីវពល​លោក Abdelsalam MualimMohamed និយាយ​ថា កងជីវពល​ប្រមាណ ៣០០ ទៅ ៤០០​នាក់​កំពុង​ព័ទ្ធជុំវិញ​ក្រុម al-Shabab នៅពេលនេះ​។ ក្រុម​កងជីវពល​ទាំងនេះ​បានធ្វើការ​នៅលើ​ដែនដី​របស់​ពួកគេ ​ដែល​ត្រូវបាន​គាំទ្រ​ដោយ​កងទ័ព​ជាតិ​សូ​ម៉ាលី រួមជាមួយ​កាំភ្លើង​ធំ​ធុន​ធ្ងន់​ពី​បេសកកម្ម​អន្តរកាល​អាហ្វ្រិក​នៅក្នុង​ប្រទេស​សូ​ម៉ាលី៕

អត្ថបទ៖ សុខមាន