ភ្នំពេញ៖ កងពលតូចលេខ៧០ នៅថ្ងៃទី១៥ ខែតុលា ឆ្នាំ២០២២នេះ បាន​ប្រារព្ធ​ពិធី​ខួប​អនុស្សាវរីយ៍​លើកទី២៨ឆ្នាំ ជាថ្ងៃកំណើតកងពល (១៥ តុលា ១៩៩៤-១៥ តុលា ២០២២) ដោយកម្មវិធីនេះ បាន​ប្រព្រឹត្តិទៅក្រោមអធិបតីភាព​ឧត្តមសេនីយ៍ឯក ម៉ៅ សុផាន់​ មេបញ្ជាការកងពលតូចលេខ៧០ នៅទីបញ្ជាការកងពល ។

ថ្លែងនៅក្នុងកម្មវិធីនោះឧត្តមសេនីយ៍ឯក ម៉ៅ សុផាន់ បានលើកឡើងថា ចាប់តាំងពីថ្ងៃបង្កើតកង​ពល​រហូត​មក​ដល់​ថ្ងៃនេះគឺមានរយះពេល២៨ឆ្នាំ​ ហើយកងពលបានខិតខំប្រឹងប្រែងអភិវឌ្ឍន៍ ដោយ​បានកសាងអគារស្នាក់នៅ ​អគារមន្ទីរពេទ្យអគារចំណតរថយន្ត អគារអាហារដ្ឋាន អគារហាត់ប្រាណ មណ្ឌលសុខភាព ហេដ្ឋារចនាសម្ព័ន ផ្លូវថ្នល់ ទំនប់បង្ហៀរទឹក ការជួយ​សង្គ្រោះ​ប្រជាពលរដ្ឋ ទប់ស្កាត់គ្រោះមហន្តរាយ ការជួយព្យាបាល និងសម្រាលលំហែមាតុភាពដល់ ប្រជាជនដោយមិនគិតថ្លៃផងដែរ។

លោកមេបញ្ជាការកងពល បានបន្ថែមទៀតថា កងពលបានប្តេជ្ញាការពារ បូរណភាពទឹកដី ការពារ រដ្ឋធម្មនុញ្ញការពាររាជរដ្ឋាភិបាលស្របច្បាប់ និងគាំទ្រយ៉ាងម៉ឺងម៉ាត់ ចំពោះគោលជំហររបស់​រាជ​រដ្ឋាភិបាល ​ដែលមានសម្តេចតេជោ ហ៊ុន សែន នាយករដ្ឋមន្ត្រី ជាអ្នកដឹកនាំនិងប្រឆាំងដាច់ខាត មិនអោយមានការធ្វើ​បដិវត្តពណ៍​ផ្តួល​រំលំរាជរដ្ឋាភិបាលនោះឡើយ។

លោក បានបន្តទៀតថា ​សម្រាប់ទិសដៅ ឆ្នាំ២០២៣កងពលមានផែនការបន្ថែមលើការហ្វឹកហ្វឺន​ដើម្បី​បង្កើនសមត្ថភាពដល់នាយទាហាន ​នាយទាហានរង និង ពលទាហានហើយកងពលបាន​ត្រៀមខ្លួន​ជាស្រេចអនុវត្តដាច់ខាតនូវបទបញ្ជារបស់ប្រមុខរាជរដ្ឋាភិបាល​ ក្រសួងការពារជាតិ អគ្គបញ្ជាការនៃកងយោធពលខេមរភូមិន្ទ ​និងបញ្ជាការដ្ឋានកងទ័ពជើងគោកជាដើម។

ជាមួយគ្នានោះដែរលោកឧត្តមសេនីយ៍ឯក ម៉ៅ សុផាន់ ​បានសំណូមពរដល់យោធិនទាំងអស់ ត្រូវរក្សា​អនាម័យអនុវត្តវិធានការ«៣កុំ៣ការពារ» ដើម្បីចូលរួមប្រយុទ្ធប្រឆាំងការរីករាលដាល​ជំងី​កូវីដ-១៩ ដែលអាចនឹងកើតមានឡើងជាថ្មី ​ ស្របតាមការណែនាំរបស់ក្រសួងសុខាភិបាល និង​បានថ្លែង​អំណរគុណ​កោតសរសើរដល់យោធិនគ្រប់រូប ​និងជូនពរអោយបំពេញការងារ​ទទួល​បានលទ្ធផលល្អ ​ជោគជ័យ​គ្រប់ភារកិច្ចដែល​កង​ពលបានប្រគល់ជូន៕ អត្ថបទ៖ បាន ចក់