ភ្នំពេញ៖ ឯកឧត្តម កើតរិទ្ធិ រដ្ឋមន្ត្រីក្រសួងយុត្តិធ៌មបានបញ្ជាក់ថា មកដល់ពេលនេះក្រសួងយុត្តិធ៌មកំពុងរៀបចំឯកសារទស្សនទានដើម្បីត្រៀមបង្កើតនូវអង្គភាពវិជ្ជាជីវៈថ្មីមួយទៀតគឺ “សន្ធានការី” តាមរយះយន្តការសន្ធានកម្ម ដើម្បីចូលរួមចំណែកក្នុងការដោះស្រាយវិវាទក្រៅប្រពន្ធ័នៅកម្ពុជា។

បញ្ជាក់ប្រាប់អ្នកសារព័ត៌មានក្រោយពិធីបិទសន្និបាតលើកទី២៧របស់គណៈមេធាវីនៃព្រះរាជាណាចក្រកម្ពុជា នៅថ្ងៃទី​១៦ ខែតុលា ឆ្នាំ២០២២ ឯកឧត្តម កើត រិទ្ធិ រដ្ឋមន្ត្រីក្រសួងយុត្តិធ៌មបានអោយដឹងថា មកពេលនេះក្រសួងយុត្តិធ៌មកំពុងរៀបចំឯកសារ លិខិតបទដ្ឋានគតិយុត្តិ ដើម្បីបង្កើតអង្គភាពវិជ្ជាជីវៈថ្មីមួយបន្ថែមទៀតគឺ សន្ធានការី គឺជាអ្នកសម្របសម្រួលអាជីពដែលច្បាប់ទទួលស្គាល់ ដើម្បីសម្របសម្រួលវិវាទក្នុងទិសដៅសំខាន់នៃការកែទម្រង់វិស័យយុត្តិធ៌មនៅកម្ពុជា។ ឯកឧត្តមកើតរិទ្ធបានបន្តថា កិច្ចការនេះកំពុងស្ថិតនៅក្នុងដំណាក់កាលនៃការរៀបចំតាក់តែងគោលនយោ ច្បាប់លក្ខន្តិកៈមួយចំនួនទៀត ដែលអាចនឹងចេញរូបរាងនៅឆ្នាំ២០២៣ហើយ អាចនឹងអនុវត្តនៅឆ្នាំ២០២៤។

ឯកឧត្តមរដ្ឋមន្ត្រីបានបន្ថែមថា មូលហេតុសំខាន់ចំនួន២នៃការបង្កើតវិជ្ជាជីវៈថ្មីមួយនេះគឺទី១ មូលដ្ឋានគ្រឹះពីនយោបាយឈ្នះៗ របស់សម្តេចតេជោនាយករដ្ឋមន្ត្រី និង ទី២គឺវប្បធ៌មនៃសង្គមកម្ពុជាដែលតែងតែមានការយោគយល់គ្នា។ ការដោះស្រាយវិវាទក្រៅប្រពន្ធ័តុលាការតាមរយៈសន្ធានកម្មនេះ នឹងផ្តល់នូវផលប្រយោជន៍ចំនួន៣ចំនុចសំខាន់រួមមានទី១ គឺការបង្ខិតសេវាយុត្តិធ៌មអោយកាន់តែជិតប្រជាពលរដ្ឋនៅតាមទីជនបទ ទី២ ការរួមចំណែកកាត់បន្ថយការកកស្ទះសំណុំនៅតាមតុលាការ និងទី៣ផ្តល់នូវភាពសុខុដុមរមនានៃមហាគ្រួសារខ្មែរ ដែលគូភាគីទំនាស់ទទួលបានផលឈ្នះៗទាំងអស់គ្នា ។ 

យន្តការសន្ធានកម្មនេះគឺអាចដោះស្រាយបានត្រឹមតែរឿងក្តីរដ្ឋប្បវេណី ដូចជាទំនាស់ដីធ្លី ភ្លឺស្រែ ទំនាស់គ្រួសារ និង រឿងក្តីព្រហ្មទណ្ឌកម្រិតស្រាលតែប៉ុណ្ណោះ ហើយរាល់ការព្រមព្រៀងពីគូភាគីដែលសម្រេចតាមរយះសន្ធានការីគឺមានតម្លៃស្របច្បាប់យកទៅអនុវត្តបាន។ ចំណែកបុគ្គលដែលនឹងអាចក្លាយជាសន្ធានការី គឺត្រូវមានសមត្ថភាពខ្ពស់ផ្នែកច្បាប់ រួមនឹងសមត្ថភាពនៃការសម្របសម្រួលប្រកបដោយភាពអំណត់ចំពោះគ្រប់ភាគីពាក់ពន្ធ័។

សូមរំលឹកដែរថា ការដោះស្រាយវិវាទក្រៅប្រពន្ធ័តុលាការមិនមែនមានតែយន្តការសន្ធានកម្មនោះទេ កន្លងមកដោះស្រាយវិវាទក្រៅប្រពន្ធ័តុលាកាមានដូចជា ក្រុមប្រឹក្សាអាជ្ញាកណ្តាលដែលជាផ្នែកនៃវិវាទការងារ ការដោះស្រាយបញ្ហាដីធ្លីតាមរយៈគណៈកម្មការដីធ្លី វិស័យពាណិជ្ជកម្មដោះស្រាយតាមមជ្ឈត្តការជាដើម។

យោងតាមនិយមន័យច្បាប់សន្ធានកម្ម ឬការសម្រុះសម្រួលវិវាទ គឺជារបៀបនៃការដោះស្រាយវិវាទមួយធ្វើឲ្យគូវិវាទមានលទ្ធភាពអាចពិចារណា និងសំរេចដោយច្បាស់លាស់ ក្រោមការជួយជ្រុមជ្រែងពីអ្នកសម្រុះសម្រួល អព្យាក្រឹត៕

អត្ថបទ៖ សូដាវណ្ណ