ភ្នំពេញ៖ សម្តេចតេជោ ហ៊ុន សែន នាយករដ្ឋមន្ត្រីកម្ពុជា​ថ្លែងបញ្ជាក់ថា នៅអាស៊ាន មា​ន​សោក​នា​ថ​កម្មធំៗចំនួន៣ រួចមក​ហើយ នៅឆ្នាំ២០២២នេះ ក្នុងនោះមានការរត់ជាន់គ្នានៅឥណ្ឌូនេស៊ី, ករណី​បាញ់ប្រហារ​នៅ​ប្រទេសថៃ និងករណីលិចទូកដចម្លង នៅប្រទេសកម្ពុជា ដែលទាម​ទារ​អោយ​យើង​​ប្រុងប្រយ័ត្ន​ខ្ពស់​លើ​សុខសុវត្ថិភាព​របស់ប្រជាពលរដ្ឋ។

សម្ដេចតេជោ ហ៊ុន សែន បានថ្លែងយ៉ាងដូច្នេះ ក្នុងឱកាសដែលសម្ដេច អញ្ជើញ​ប្រគល់​សញ្ញាបត្រដ​​ល់និស្សិតនៃសាកលវិទ្យាល័យជាតិគ្រប់គ្រងប្រមាណជាង ៦ពាន់នាក់ នៅ​ព្រឹក​ថ្ងៃ​ទី​១៧​ ខែតុលា ឆ្នាំ២០២២នេះ។

សម្តេចតេចតេជោ ហ៊ុន សែន បានសម្តែងសមានទុក្ខ និងស្មឹងស្មាត គោរពវិញ្ញាណក្ខន្ធកុមារា កុមារី ដែលទទួលមរណភាពដោយលិចទូក-ដចម្លង កាលពីថ្ងៃទី១៣ ខែតុលា ឆ្នាំ២០២២ នៅឃុំកំពង់ភ្នំ ស្រុកលើកដែក ខេត្តកណ្តាល។

ជាមួយគ្នានេះដែរសម្តេចតេជោ ហ៊ុន សែន នៅតែបន្តអំពាវនាវដល់ប្រជាពលរដ្ឋប្រុងប្រយ័ត្នខ្ពស់ ចំពោះសុវត្ថិភាពខ្លួនឯង ហើយអាជ្ញាធរក៏ប្រឹងប្រែងដើម្បីប្រជាពលរដ្ឋ ជាពិសេស​ប្រជាពលរដ្ឋ​រស់​នៅ​តាម​ដងទន្លេ ស្ទឹង ដែលត្រូវឆ្លងទឹក ដើម្បីប្រកបរបរចិញ្ចឹមជីវិតប្រចាំថ្ងៃ។