ភ្នំពេញ៖ លោកជំទាវបណ្ឌិត ពេជ ចន្ទមុន្នី​អនុប្រធានក្រុមប្រឹក្សាភិបាលសមាគមគ្រូពេទ្យ​ស្ម័គ្រចិត្ត​យុវជន​សម្ដេចតេជោ (TYDA) ​បានបន្តដឹកនាំក្រុមការងារ និងកម្លាំងស្ម័គ្រចិត្តចុះពិនិត្យ​ព្យាបាល​ជំងឺទូទៅ និងជំងឺមាត់ធ្មេញ ​ជូនដល់បងប្អូនប្រជាជនក្នុងសហគមន៍ក្រីក្រនៅក្នុងតំបន់ទួលសំបូរ សង្កាត់ព្រៃវែង ខណ្ឌដង្កោរ។

ថ្លែងនៅក្នុងឱកាសនោះ លោកជំទាវបណ្ឌិត ពេជ ចន្ទមុន្នី បានលើកឡើងថា សម្ដេចតេជោ ហ៊ុន សែននិងសម្ដេចកិត្តិព្រឹទ្ធបណ្ឌិតតែងតែយកចិត្តទុកដាក់គិតគូរអំពីសុខភាពរបស់បងប្អូនប្រជាពលរដ្ឋតាមរយៈការបង្ខិតសេវាព្យាបាលប្រជាពលរដ្ឋដោយឥតគិតថ្លៃ។

ជាក់ស្ដែងសមាគមគ្រូពេទ្យស្ម័គ្រចិត្តយុវជនសម្ដេចតេជោ (TYDA) ​បានចុះព្យាបាលបងប្អូន​ប្រជាពលរដ្ឋ​នៅ​តាមបណ្ដាខេត្តសហគមន៍ ​អង្គការ ​មជ្ឈមណ្ឌលកុមារកំព្រា និងសាលារៀន​ជាដើមដូច​ជាភ្លៀងរលឹម។

លោកជំទាវ បានបញ្ជាក់បន្ថែមទៀតថា នេះជាសកម្មភាពថ្មីក្នុងការចុះពិនិត្យព្យាបាលដល់ប្រជាជន​ក្នុង​សហគមន៍ក្រីក្រជាយរាជធានីភ្នំពេញ ​ដែលពីមុនមកសកម្មភាពនេះ ជា​សកម្មភាពចុះអប់រំ​សុខភាព​តាមខ្នង​ផ្ទះដល់សហគមន៍ ហើយនេះជាលើកទី២ហើយដែលចុះព្យាបាលដល់សហគមន៍​ក្រីក្រ​ដើម្បីបង្ខិតការផ្តល់សេវាសុខភាពជូនដល់ប្រជាជនដែលនៅក្នុងតំបន់សហគមន៍ក្រីក្រនោះ។

សមាគម TYDA ធ្លាប់បានចុះចុះទៅអប់រំសុខភាព និងចុះចែកអំណោយជូនដល់សហគមន៍ដែល​ទទួល​រងគ្រោះដោយទឹកជំនន់ព្រែកត្នោត និងបានចុះអប់រំសុខភាពមាត់ធ្មេញដល់សិស្សានុសិស្ស​នៅ​ក្នុងសាលាបឋមសិក្សាទួលសំបូរនេះផងដែរ។

សូមបញ្ជាក់ថា បានបញ្ជាក់ថា«សមាគមគ្រូពេទ្យស្ម័គ្រចិត្តយុវជនសម្តេចតេជោ(TYDA) បើគិតត្រឹម​ឆ្នាំ២០២២នេះ មានអាយុ ១០ឆ្នាំហើយ ​ និងបានធ្វើសកម្មភាពមនុស្សធម៌ទូទាំងប្រទេស ដោយបាន​ផ្ដល់​នូវជីវិតទីពីរ សុភមង្គល​ និងស្នាមញញឹមជូនប្រជាពលរដ្ឋ ​និងក្រុមគ្រួសារ។ លទ្ធផលជាក់ស្ដែងគឺព្យាបាលប្រជាពលរដ្ឋបានចំនួនជិត៣៥ម៉ឺននាក់ ក្នុងនោះអ្នកជំងឺធ្ងន់ធ្ងរជាង៦ពាន់​នាក់​ត្រូវបានបញ្ជូនមកព្យាបាលបន្តនៅរាជធានីភ្នំពេញ និង​អ្នកជំងឺ​បេះដូងធ្ងន់ធ្ងរ​ចំនួន៥៨នាក់ ត្រូវបានវះកាត់ដោយជោគជ័យក្រោមការឧបត្ថម្ភរបស់​សម្តេចតេ​ជោ​ហ៊ុន សែន និងសម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន»៕ អត្ថបទ៖ បាន ចក់