ភ្នំពេញ៖ សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា បានបញ្ជាទៅកាន់ក្រសួងស្ថាប័ន​ពាក់ព័ន្ធត្រូវចែកពូជស្រូវ និងដំណាំផ្សេងៗភ្លាមៗទៅប្រជាពលរដ្ឋ ដែលរងគ្រោះដោយសារ​ទឹកជំនន់ ​ក្នុងតំបន់នីមួយៗ​ ក្រោយពីបានវាយតម្លៃរួចរាល់ ។

ក្នុងពេលអញ្ជើញជាអធិបតីដ៏ខ្ពង់ខ្ពស់ចែកសញ្ញាបត្រដល់និស្សិត ​នៃសាលកវិទ្យាល័យជាតិគ្រប់គ្រង នៅថ្ងៃទី១៧ ខែតុលា នេះ សម្ដេចតេជោ ហ៊ុន សែន ​នាយករដ្ឋមន្ត្រី ​មានប្រសាសន៍ថា បច្ចុប្បន្ន នៅ​ក្នុងប្រទេសកម្ពុជា ​កំពុងប្រឈមបញ្ហាទឹកជំនន់ ​ហើយការខូចខាតបានបង្កើតនូវស្ថានភាពដ៏លំបាក ដល់ប្រជាពលរដ្ឋ ដូច្នេះសម្ដេច បានបញ្ជាឲ្យក្រសួង ស្ថាប័នពាក់ព័ន្ធ​ ត្រូវវាយតម្លៃជាបន្ទាន់ និង​ទាន់ពេលវេលា នៃការបង្កបង្កើនផលរបស់ប្រជាពលរដ្ឋ ​បន្ទាប់ពីទឹកស្រកទៅ ។

សម្ដេចតេជោ ​បានបន្តថា កន្លែងណាវាយតម្លៃរួចរាល់ ​ត្រូវដឹកស្រូវពូជ ​ឬពូជដំណាំដទៃទៀត ទៅ​ចែក​ជូនប្រជាពលរដ្ឋ ​មិនត្រូវរង់ចាំនោះទេ​ ព្រោះពូជ បានត្រៀមរៀបចំរួចហើយ ព្រោះកម្ពុជា​មាន​ស្តុកយុទ្ធសាស្ត្រ គឺពូជដំណាំ ហើយតំបន់ណាអាចធ្វើស្រូវឡើងវិញបាន​ ត្រូវផ្ដល់ពូជស្រូវ បើមិន​អាចទេ ត្រូវពិនិត្យថាតំបន់នោះអាចដាំពូជអីបាន ​ត្រូវផ្ដល់ពូជនោះឲ្យពលរដ្ឋ ​ដើម្បីស្ដារការ​ខូចខាតឡើងវិញ ។

គួរបញ្ជាក់ថា បច្ចុប្បន្ន គណៈកម្មាធិការជាតិគ្រប់គ្រងគ្រោះមហន្តរាយ​ សហការជាមួយក្រសួង​ស្ថាប័ន​ពាក់ព័ន្ធ ​និងអាជ្ញាធរខេត្ត ​បានចាប់ផ្ដើមចែកពូជស្រូវ ​និងពូជដំណាំផ្សេងៗ​ ដល់ពលរដ្ឋ ដែល​រងគ្រោះ​ ដោយសារទឹកជំនន់ហើយ ដើម្បីឲ្យពួកគេអាចយកទៅបង្កបង្កើនស្ដារឡើងវិញ ៕អត្ថបទ៖ បាន សុខរិទ្ធិ