កំពង់ធំ៖ ពលរដ្ឋដែលជួបរងគ្រោះដោយទឹកជំនន់ ជាង៤៣០គ្រួសារនៅស្រុកតាំងគោក ខេត្តកំពង់ធំ បានទទួលអំណោយសង្គ្រោះពីឯកឧត្កម ថោង ខុន ប្រធានក្រុមការងារចុះជួយមូលដ្ឋានស្រុក​តាំងគោគ ​ខណៈអាជ្ញាធរមូលដ្ឋាន បាននិងកំពុងដាក់សំណើរបន្ថែមទៀត ​រៀបចំពូជស្រូវ និង​គ្រាប់ពូជដំណាំរួមផ្សំនានា ដើម្បីត្រៀមចែកជូនពលរដ្ឋរងគ្រោះនៅពេលទឹកស្រក់ទៅវិញ។

តំណាងពលរដ្ឋមកពីភូមិផ្សេងៗនៅក្នុងឃុំទ្រាល ស្រុកតាំងគោក ​បានថ្លែងប្រាប់BTV នៅល្ងាចថ្ងៃទី ១៦ ខែតុលាថា ​អស់រយៈពេលច្រើនថ្ងៃមកហើយដែលលំនៅដ្ឋាន ​ដំណាំស្រូវ និងដំណាំរួមផ្សំ​នានារបស់អ្នកភូមិ ​នៅភូមិគោកត្របែក​ ភូមិរំចេក ​ភូមិទ្រាល ​ភូមិស្វាយម្សៅ ភូមិថ្មី និង​ភូមិនាងល្អ​ជាដើម ​បាននិងកំពុងរងជំនន់ទឹកភ្លៀង ​និងទឹកទន្លេ ដោយបង្កបញ្ហាប្រឈមជាច្រើន ដូចជា​កង្វះខាតស្បៀងអាហារ ​ខូចខាតផលដំណាំ ​សុខភាព ​និងសត្វពោះជាដើម។

តាមរបាយការណ៍អភិបាលស្រុកតាំងគោ​ គ្រោះទឹកជំនន់បង្កដោយជំនន់ទឹកភ្លៀង បង្កប៉ះពាល​ដំណាំស្រូវ ​និងដំណាំរួមផ្សំនានាមានប្រមាណ១០៤២ ហិចតា ក្នុងនោះខូចដំណាំស្រូវជាង ៥១០​ហិចតា ​ហើយគ្រួសាររងគ្រោះដោយទឹកជំនន់ប៉ះពាល់​ផ្ទះសំបែងមានប្រមាណ ​៤០០ គ្រួសារ ដោយ​បានទទួលអំណោយគ្រឿងបរិភោគ និងឧបភោគពីឯកឧត្តម ថោង ខុន ប្រធានក្រុមការងារ​រាជរដ្ឋាភិបាលចុះជួយស្រុកបារាយណ៍ ​និងស្រុកតាំងគោគ។

ក្នុងពេលចុះចែកអំណោយដល់ប្រជាពលរដ្ឋ ឯកឧត្តម ថោង​ ខុន បានថ្លែងអំពាវនាវ ឲ្យពលរដ្ឋ​បង្កើន​ប្រុងប្រយ័ត្ន ​ដូចជាបញ្ហាកូនតូចលង់ទឹក ​បញ្ហាសុខភាព​ជាពិសេស​បញ្ហារាគរុស ​និង​រោគ​ឆ្លងនានា បញ្ហាសត្វពោះក្អែបជាដើម​ នៅពេលពេលវេលាទាំងអស់គ្នា។

ជាមួយគ្នានេះ ឯកឧត្តម ថោង ខុន ក៏បានណែនាំអាជ្ញាធរមូលដ្ឋានបង្កើនការចុះតាមដាន​ស្ថានការ​រស់​នៅរបស់ប្រជាពលរដ្ឋ ​ និងត្រៀមសម្ភារជួយសង្គ្រោះបន្ទាន់ ដើម្បីត្រៀមឆ្លើយតបទាន់ពេលវេលា​នៅពេលពលរដ្ឋ ​ជួបគ្រោះថ្នាក់ផ្សេងៗ​ដោយសារទឹកជំនន់នេះ៕ អត្ថបទ ស៊ុម សុខជា