ឧត្ដរមានជ័យ៖ មន្ដ្រីជាន់ខ្ពស់ក្រសួងមហាផ្ទៃ បានឱ្យដឹងថា អាជ្ញាធរកម្ពុជា បានធ្វើប្រតិបត្ដិការជួយ​សង្គ្រោះជនបរ ទេសចម្រុះជាតិសាសន៍​ ចំនួន៧៥នាក់ ចេញពីអូរស្មាច់​ ក្នុងខេត្ដឧត្ដរមានជ័យ ដែលគេសង្ស័យថា ពួកគេ ត្រូវបានធ្វើការជួញដូរមកពីក្រៅប្រទេស ​តាមការអូសទាញពីមេខ្សល់ និងទំនាក់ទំនងគ្នាតាមអនឡាញ ​ក្រោមរូបភាពតម្លៃការងារខ្ពស់នៅកម្ពុជា។

លោកជំទាវ ជូ ប៊ុនអេង រដ្ឋលេខាធិការក្រសួងមហាផ្ទៃ និង​ជាអនុប្រធានអចិន្ដ្រៃយ៍​គណៈកម្មាធិការជាតិប្រយុទ្ធប្រឆាំងអំពើរជួញដូរមនុស្ស ​បានឱ្យដឹងកាលពីថ្ងៃទី១៦ ខែតុលា ម្សិលមិញថា ជនបរទេសចំនួន៧៥នាក់ ត្រូវបានអាជ្ញាធរធ្វើប្រតិបត្ដិការរកឃើញ ​នៅអូរស្មាច់ កាលពីថ្ងៃទី១៥ ខែតុលា នេះ ​ដែលជនរងគ្រោះទាំង នោះ ត្រូវ​បាន​អូសទាញមកពី​ប្រទេស​វៀតណាម ចិន ឥណ្ឌា ម៉ាឡេស៊ី​ និងឥណ្ឌូនេស៊ី ដើម្បីធ្វើការងារ ​នៅកាស៊ីណូអូរស្មាច់។ ជនរងគ្រោះទាំងអស់ បច្ចុប្បន្ន ​កំពុងត្រូវបានដាក់ឱ្យស្នាក់នៅបណ្ដោះអាសន្ន នៅខេត្ដសៀមរាប ខណៈអ្នកជំនាញកំពុងស៊ើបអង្កេតរកជនល្មើស។

លោកជំទាវ បានបញ្ជាក់ថា ប្រតិបត្ដិការនេះ ​ជនរងគ្រោះ បានដាក់បណ្ដឹង​ចូល​ផេក​សម្ដេច​ក្រឡា ហោម ស ខេង ​ឧបនាយករដ្ឋមន្ដ្រី រដ្ឋមន្ដ្រីក្រសួងមហាផ្ទៃ។

លោកជំទាវ បានបន្ថែមថា កម្ពុជាមិនមែនជាទីកន្លែងជួញដូរមនុស្សទេ ​ហើយបើសិនជារកឃើញថា​មានការ​ជួញដូរមនុស្សនៅកម្ពុជា ​កម្ពុជាមិនអត់ឱនឱ្យជាដាច់ខាត៕អត្ថបទ៖ ឈិត សាវី