ភ្នំពេញ៖ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុថា អាល្លឺម៉ង់បានដើរតួនាទីយ៉ាងសំខាន់ ក្នុងការផ្តល់ហិរញ្ញប្បទានអភិវឌ្ឍន៍ផ្លូវការដល់កម្ពុជា ទាំងជំនួយបច្ចេកទេស ទាំងហិរញ្ញប្បទានឥតសំណង និងជាហិរញ្ញសម្បទានដោយ បានឆ្លើយតបទៅនឹងតម្រូវការរបស់កម្ពុជា បានទាន់ពេល នឹងចំសភាពការណ៍បច្ចុប្បន្ន។
ឯកឧត្ដមអគ្គបណ្ឌិតសភាចារ្យ អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ លើកឡើងក្នុងពិធីចុះហត្ថលេខាលើកិច្ចព្រមព្រៀងឥតសំណង សម្រាប់គម្រោងលើកកម្ពស់គុណភាព និងសមធម៌សុខាភិបាលដំណាក់កាលទី ៣ រវាងកម្ពុជា-អាល្លឺម៉ង់ នៅថ្ងៃទី១៧ ខែ តុលា ឆ្នាំ ២០២២ នេះថា ទំនាក់ទំនងមិត្តភាព និងកិច្ចសហប្រតិបត្តិការដ៏ស្និទ្ធស្នាលរវាងប្រទេសទាំងពីរ កំពុងផ្តល់នូវភាពរឹងមាំ និងស៊ីជម្រៅ និងបានរួមមចំណែកយ៉ាងសកម្ម ក្នុងការអភិវឌ្ឍន៍សង្គម សេដ្ឋកិច្ចកម្ពុជា, ជាក់ស្តែងចាប់ពីឆ្នាំ ២០១៦ មក សាធារណៈរដ្ឋសម្ព័ន្ធអាល្លឺម៉ង់ បានផ្តល់ហិរញ្ញប្បទានឥតសំណង់សរុបចំនួន ៣៩លានអឺរ៉ូ សម្រាប់ការអនុវត្តគម្រោងជាបន្តបន្ទាប់ ជាក់ស្តែងក្នុងដំណាក់កាលទី៣ នេះ មានទំហំទឹកប្រាក់ ១៦ លានអឺរ៉ូផងដែរ។
ចំពោះគម្រោងដំណាក់កាលទី៣ នេះ គឺអនុវត្តកម្មវិធីចំនួន ៣រួមមាន ការរួមចំណែកដល់សេវាសុខភាពប្រកបដោយសមធម៌ និងគុណភាពខ្ពស់ ដល់ប្រជាជនក្រីក្រដែលងាយរងគ្រោះ, ធ្វើឲ្យប្រសើរឡើងនូវកិច្ចការពារ ការព្យាបាលជំងឺ តាមរយៈសមធម៌សុខភាព, ការអន្តរាគមន៍ជាយុទ្ធសាស្ត្រប្រកបដោយប្រសិទ្ធភាពខ្ពស់ លើករណីបញ្ហាសុខភាពផ្សេងៗ ដោយធ្វើការកែលម្អគុណភាព និងសមមាសភាពនៃការថែទាំសុខភាពសាធារណៈ និងការផ្តល់ការគាំទ្រផ្នែកបច្ចេកទេស និងកែលម្អសមភាពយេនឌ័រ និងបរិយាប័ន្នសង្គម។
ចំពោះគម្រោងដំណាក់កាលទី៣ នេះដែរ, ឯកឧត្តមឧបនាយករដ្ឋមន្ត្រី លើកឡើងបន្តថា គម្រោងនេះគឺបានឆ្លើយតបទៅនឹងសេចក្តីត្រូវការជាអាទិភាព ក្នុងវិស័យសុខាភិបាល ស្របតាមមុំ៣នៃយុទ្ធសាស្ត្រចតុកោណ, មុំ៣នៃចតុកោណទី១ ស្តីពីការលើកកម្ពស់សុខភាពសាធារណៈ និងអាហាររូបត្ថម្ភ នៃយុទ្ធសាស្ត្រចតុកោណដំណាលទី ៤ របស់រាជរដ្ឋាភិបាល ពោលគឺ លើកកម្ពស់គុណភាព ប្រសិទ្ធភាព សមធម៌ និងសុខភាពប្រជាជន និងអាហារូបបត្ថម្ភ ដើម្បីគាំទ្រដំណើរការអភិវឌ្ឍន៍ធនធានមនុស្ស និងជម្រុញកំណើន សេដ្ឋកិច្ចប្រកបដោយចីរភាព តាមរយៈការចូលរួមអភិវឌ្ឍន៍ផែនការមួយចំនួនរួមមាន៖ ផែនការយុទ្ធសាស្ត្រសុខាភិបាល, ក្របខណ្ឌយុទ្ធសាស្ត្រនៃកម្មវិធីស្តារ និងជម្រុញកំណើនសេដ្ឋកិច្ចកម្ពុជា ក្នុងការរស់នៅជាមួយកូវីដ ១៩ តាមគន្លងប្រក្រតីភាពថ្មី និងផែនការគ្រប់ដណ្ដប់អង្គភាពជាសកល។
សូមបញ្ជាក់ថា៖ ចំពោះក្របខណ្ឌសហប្រតិបត្តិការរវាងកម្ពុជា-អាល្លឺម៉ង់ ចាប់ពីឆ្នាំ១៩៩៣ មកដល់បច្ចុប្បន្ន សាធារណៈរដ្ឋសម្ព័ន្ធអាល្លឺម៉ង់ បានផ្តល់ហិរញ្ញប្បទានអភិឌ្ឍន៍ផ្លូវការ ប្រមាណជាង ៨០០ លានដុល្លារអាមេរិក ក្នុងនោះមានហិរញ្ញប្បទានឥតសំណង ចំនួន ៧៣៣ លានដុល្លារអាមេរិក ដែលបានរួមចំណែកយ៉ាងសំខាន់ ក្នុងការកាត់បន្ថយភាពក្រីក្រនៅកម្ពុជា ដោយគ្រប់ដណ្តប់លើវិស័យសំខាន់មួយចំនួនដូចជា វិស័យអប់រំ ការដោះមីន អភិបាលកិច្ច អភិវឌ្ឍន៍ជនបទ ថាមពល សុខភាព និងគាំពារសង្គម៕អត្ថបទ៖ សុន រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
