ភ្នំពេញ៖ ក្រសួងសុខាភិបាល បានរៀបចំកិច្ចពិភាក្សាទ្វេភាគី លើវិស័យសុខាភិបាល រវាងក្រសួង​សុខាភិបាល​កម្ពុជា និងសាធារណរដ្ឋសហព័ន្ធអាល្លឺម៉ង់, នារសៀលថ្ងៃទី១៧ ខែតុលា ឆ្នាំ២០២២ នៅ​ទីស្តីការក្រសួង។

កិច្ចប្រជុំពិភាក្សាទ្វេភាគីនេះ ប្រារព្ធឡើងក្រោមអធិបតីភាព លោកជំទាវវេជ្ជបណ្ឌិត យក់ សម្បត្តិ រដ្ឋ​លេខាធិការ តំណាងដ៏ខ្ពង់ខ្ពស់ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រី​ក្រសួង​សុខាភិបាល និងមានការចូលរួមពីតំណាងក្រសួងសេដ្ឋកិច្ច និងហិរញ្ញវត្ថុ ក្រុមប្រឹក្សា​អភិវឌ្ឍន៍​កម្ពុជា​សហប្រធានជាមួយ ឯកឧត្តម Udo Weber ទីប្រឹក្សាគោលនយោបាយជាន់ខ្ពស់ ទទួល​បន្ទុក​តំបន់​អាស៊ីអាគ្នេយ៍ នៃក្រសួងសហប្រតិបត្តិការសេដ្ឋកិច្ច និងអភិវឌ្ឍន៍សហព័ន្ធ នៃ​សាធារណ​រដ្ឋ​សហព័ន្ធអាល្លឺម៉ង់ ដោយមានការចូលរួមពី តំណាងស្ថានទូតអាល្លឺម៉ង GIZនិង KfW។

ជាកិច្ចចាប់ផ្តើម លោកជំទាវរដ្ឋលេខាធិការក្រសួងសុខាភិបាល បាន​សម្តែង​នូវ​ការ​ស្វាគមន៍​យ៉ាង​កក់​ក្តៅ​ដល់គណៈប្រតិភូអាល្លឺម៉ង់ និងថ្លែងអំណរ​គុណ​ចំពោះ​ការ​ឧបត្ថម្ភ​គាំទ្រ​ដល់​វិស័យ​សុខាភិបាល​ទាំង​បច្ចេកទេស និងហិរញ្ញប្បទានឥតសំណង តាមរយៈអង្គការ GIZ (ជីអាយហ្ស៊ិត) ដែល​បានជួយកម្ពុជាតាំងពីឆ្នាំ១៩៩៤ លើការកសាងសមត្ថភាព​មន្រ្តី​សុខាភិបាល និងកម្មវិធីគាំពារសុខភាពសង្គមនៅខេត្តកំពង់ធំ កំពត និងកែប ព្រមទាំង​ធនាគារ​អភិវឌ្ឍ​​អាល្លឺម៉ង់(KfW)។ លោកជំទាវវេជ្ជបណ្ឌិត យក់ សម្បតិ្ត បានជម្រាបជូនភាគីមិត្តថា ក្រសួង​សុខាភិបាលបានដាក់ស្នើសុំគម្រោងទៅភាគីអាល្លឺម៉ង់ចំនួនពីរគម្រោងរួចហើយ គឺ​គម្រោង​គាំពារ​សុខ​ភាពសង្គម ជាជំនួយបច្ចេកទេស និងគម្រោងសុខភាពតែមួយ (One health) ជា​ជំនួយ​ហិរញ្ញប្បទានឥតសំណង តាមរយៈក្រុមប្រឹក្សាអភិវឌ្ឍន៍កម្ពុជា។

ឯកឧត្តម Udo Weber បានថ្លែងអបអរសាទរ និងកោតសរសើររាជរដ្ឋាភិបាលកម្ពុជា និងក្រសួង​សុខាភិបាល ក្នុងកិច្ចខិតខំប្រឹងប្រែងគ្រប់គ្រង ទប់ស្កាត់ការរីករាលដាលជំងឺកូវីដ-១៩ នៅកម្ពុជា​ក្នុង​រយៈ​ពេលជាង២ឆ្នាំកន្លងមកនេះបានទទួលជោគជ័យ ក្រោមការដឹកនាំ​ដ៏​ឈ្លាស​វៃ​ប្រកប​ដោយ​គតិ​បណ្ឌិតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃ​ព្រះ​រា​ជា​ណា​ចក្រ​កម្ពុជា ជាអគ្គមេ​បញ្ជាការ​ដឹកនាំ​ចង្អុល​បង្ហាញ​ផ្ទាល់​ដែល​អាច​ឱ្យ​កម្ពុជា​បើ​ក​ដំណើរ​ការ​ប្រទេស​ទាំង​សេដ្ឋកិច្ច និងសង្គមឡើងវិញ។ ឯកឧត្តម Udo Weber ក៏បានថ្លែង​អំណរ​គុណ​ចំពោះ​ក្រសួងសុខាភិបាល ដែលបានសហការសម្របសម្រួល និងគាំទ្រអង្គការ​ជា​ដៃគូ​របស់​អាល្លឺម៉ង់​ក្នុង​ការអនុវត្តគម្រោងនានា ជាពិសេសគម្រោង​លើក​កម្ពស់​គុណភាព និង​សមធម៌​សុខាភិបាល។

ភាគីទាំងពីរ​ក៏បានពិភាក្សាអំពីកិច្ចសហការបន្ត ជាពិសេសទៅលើគម្រោងពីរគឺ៖ គម្រោង​គាំពារ​សុខ​ភាព​សង្គម និងគម្រោងសុខភាពតែមួយ (One health) ដែលនឹងត្រូវ​ដាក់​ចូល​ក្នុង​កិច្ច​ប្រជុំ​ពិគ្រោះយោ​បល់រវាងរាជរដ្ឋាភិបាលកម្ពុជា និងរដ្ឋាភិបាលនៃសាធារណរដ្ឋសហព័ន្ធអាល្លឺម៉ង់ ដែលនឹង​ប្រព្រឹត្តិ​ទៅពីថ្ងៃទី១៩ ដល់ថ្ងៃទី២០ ខែតុលាឆ្នាំ២០២២ ខាងមុខ នៅក្រុមប្រឹក្សា​អភិវឌ្ឍន៍​កម្ពុជា។ កិច្ចពិភាក្សាទ្វេភាគីបានបញ្ចប់ដោយលទ្ធផលគួរជាទីមោទនៈក្នុងស្មារតីសាមគ្គីភាព មិត្តភាពនិងកិច្ចសហប្រតិបត្តិការ៕ អត្ថបទ៖ រដ្ឋា