ភ្នំពេញ៖ ក្នុងរយៈពេល ៥ឆ្នាំ គឺចាប់ពីឆ្នាំ២០១៨ ដល់២០២២ ក្រសួងការពារជាតិបានសហការ​បង្ក្រាប​បទ​ល្មើស​នានា នៅទូទាំងប្រទេសបានចំនួនជាង ១ម៉ឺនលើក ហើយ​ឃាត់​ខ្លួន​ជន​សង្ស័យ​ជាង​ ១៥០០០នាក់ និងរឹបអូសបានវត្ថុតាំងមួយចំនួន ។

នៅក្នុងសន្និសីទសារព័ត៌មានស្តីពី សមិទ្ធផលសម្រេចបានរយៈពេល ៥ឆ្នាំ របស់​ក្រសួង​ការពារ​ជាតិ នៅថ្ងៃទី១៨ ខែតុលា ឆ្នាំ២០២២ នាយឧត្តមសេនីយ៍ ឈុំ សុជាតិ រដ្ឋលេខាធិការ និង​ជា​អ្នក​នាំ​ពាក្យ​ក្រសួង មានប្រសាសន៍ថា បច្ចុប្បន្នស្ថានការណ៍យោធា នៅតាម​តំបន់​ព្រំដែន​មាន​សភាព​ស្ងប់​ស្ងាត់ ពុំមានអ្វីធំដុំគួរឲ្យកត់សម្គាល់ ប៉ុន្តែនៅបន្តពង្រឹងសមត្ថភាព និងត្រៀមខ្លួនជាប់ជានិច្ច ដើម្បី​ឆ្លើយ​តប​ទៅនឹ​ងសភាពការណ៍ណាមួយ ដែលអាចកើតឡើងជាយថាហេតុ ។

នាយឧត្តមសេនីយ៍ ឈុំ សុជាតិ បន្តថា ក្រៅពីការងារនៅតាមព្រំដែន កង​យោធពលខេមរភូមិន្ទ​បាន​ម្ចាស់​ការ​សហការចូលរួមយ៉ាងសកម្មបំផុត ក្នុងការគ្រប់គ្រងពង្រឹងការអនុវត្តច្បាប់ ក្នុងនោះ មានការកសាងភូមិឃុំមានសុវត្ថិភាព ការពារសន្តិសុខ សណ្ដាប់ធ្នាប់សាធារណៈ ការពារ​ស្ថិរភាព​នយោបាយ ទប់ស្កាត់ និងបង្ការបង្ក្រាបសកម្មភាពល្មើសគ្រប់ប្រភេទ ភាពអនាធិបតេយ្យ ព្រម​ទាំង​អនុវវត្ត​បទបញ្ជារបស់ប្រមុខរាជរដ្ឋាភិបាល ។

អ្នកនាំពាក្យក្រសួងការពារជាតិ បានបន្ថែមថា ក្នុងរយៈពេល៥ឆ្នាំមកនេះ កងយោធពល​ខេមរ​ភូមិន្ទ បានស្រាវជ្រាវ និងបង្ក្រាបបទល្មើសឧក្រិដ្ឋ បទល្មើសមជ្ឈិមបានចំនួនជាង ១ម៉ឺនលើក ឃាត់​ខ្លួន​ជនសង្ស័យជាង ១៥ ០០០នាក់ (រកឃើញជនពាក់ព័ន្ធចំនួនជាង ១៤ ០០០​នាក់​បញ្ជូន​ទៅ​តុលាការ) បានរឹបអូសគ្រឿងញៀនជាច្រើនគីឡូក្រាម និងវត្ថុតាងមួយចំនួនទៀត ។

ឯកឧត្តមបានបន្តទៀតថា ក្នុងរយៈពេលដូចគ្នានេះ មណ្ឌល​ស្ដារ​នីតិ​សម្បទាន​អ្នក​ញៀន​គ្រឿង​ញៀន កងរាជអាវុធហត្ថខេត្តបាត់ដំបង បន្ទាយមានជ័យ ព្រះសីហនុ និងកងពលតូចលេខ៣១ យោធ​ភូមិភាគទី៣ បានទទួលអ្នកញៀនគ្រឿងញៀនមកធ្វើការអប់រំ និងបន្សាប់សារធាតុញៀន ជា​សះស្បើយត្រឡប់ទៅលំនៅដ្ឋានវិញ បានចំនួន ៥ ១៩៩នាក់ ៕ អត្ថបទ៖ បាន សុខរិទ្ធិ