កំពង់ឆ្នាំង៖ នៅថ្ងៃទី១៨ ខែតុលា ឆ្នាំ២០២២នេះ ប្រជាពលរដ្ឋចំនួន២២០គ្រួសារ រស់នៅ​ក្នុង​ឃុំ​ទឹកហូត ឃុំស្វាជ្រុំ ឃុំគោកបន្ទាយ ឃុំជ្រៃបាក់ និងឃុំភ្នំក្រាំងដីមាស ស្រុករលាប្អៀរ ខេត្ត​កំពង់​ឆ្នាំង ដែលបានជម្លៀសមករស់នៅលើទីទួលសុវត្ថិភាព២កន្លែងក្នុងស្រុករលាប្អៀរ បាន​ទទួល​អំណោយ​មនុស្សធម៌កាកបាទក្រហមកម្ពុជា ពីឯកឧត្តម ស៊ុន សុវណ្ណារិទ្ធិ ប្រធាន​គណៈកម្មាធិការ​សាខា​កាក​បាទក្រហមកម្ពុជា, លោកជំទាវ កែ ច័ន្ទមុនី អនុប្រធានកិត្តិយស​សាខាកា​កបាទ​ក្រហម​ខេត្ត, និងឯកឧត្តម អ៊ុក ពញ្ញា ប្រធានកិត្តិយសអនុសាខាកាកបាទក្រហមស្រុករលាប្អៀរផងដែរ។

 ឯកឧត្តម ស៊ុន សុវណ្ណារិទ្ធិ បានថ្លែងថា៖ ដោយសារឆ្នាំ២០២២នេះ ទឹកទន្លេសាបបានកើនឡើងខ្ពស់ ទើបបណ្ដាលឱ្យផ្ទះបងប្អូនប្រជាពលរដ្ឋមួយចំនួនបានជន់លិច បងប្អូនដែលបានសង់ផ្ទះខ្ពស់មិនមានបញ្ហានោះទេ ក៏ប៉ុន្តែបងប្អូនប្រជាពលរដ្ឋដែលមានផ្ទះទាប គឺទឹកទន្លេសាបបានជន់លិច ធ្វើអោយបងប្អូន​បាន​ជម្លៀស​មក​រស់​នៅ​លើ​ទីទួល​សុវត្ថិភាព​បែបនេះ។ នៅក្នុងការជម្លៀសមករស់នៅទីទួលសុវត្ថិភាពនាពេលនេះ មានមកពីឃុំទឹកហូតចំនួន៩៩គ្រួសារ, ឃុំគោកបន្ទាយ៥គ្រួសារ, ឃុំស្វាយជ្រុំ៦៣គ្រួសារ, ឃុំជ្រៃបាក់៥គ្រួសារ, និងឃុំក្រាំងដីមាសចំនួន៤៨គ្រួសារ សរុបទាំងអស់មានចំនួន២២០គ្រួសារ ដែលបានទទួលអំណោយមនុស្សធម៌របស់សាខាកាកបាទក្រហមកម្ពុជាខេត្តកំពង់ឆ្នាំងនាពេលនេះ។

នៅក្នុងពេលនោះ ឯកឧត្តម ស៊ុន សុវណ្ណារិទ្ធិ បានជម្រាបជូនថា៖ យោងតាមអនុសាសន៍ណែនាំ របស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា ឱ្យសាខាកាកបាទក្រហមត្រូវតែគិតគូរយកចិត្តទុកដាក់ ដល់បងប្អូន​ប្រជាពលរដ្ឋ​ដែលរងគ្រោះ​ដោយ​គ្រោះមហន្តរាយផ្សេងៗ និងប្រជាពលរដ្ឋងាយរងគ្រោះគ្រប់ពេលវេលា ដោយមិនទុកឱ្យ​នរណា​ម្នាក់​រងទុក្ខវេទនា ដោយសារយើងមិនបានគិតគួរនោះឡើយ។ ក្រោយពីមើល​ឃើញ​ពី​ការ​លំបាក​ខ្វះ​ខាត​របស់បងប្អូនប្រជាពលរដ្ឋ ដែលរងគ្រោះដោយជំនន់ទឹកទន្លេសាបនោះ ទើបថ្ងៃនេះ​ក្នុង​នាម​គណៈកិត្តិយសសាខា និងគណៈកម្មាធិការសាខា សហការ​ជាមួយ​អនុសាខា​ស្រុក​រលាប្អៀរ បានរៀបចំផ្តល់អំណោយមនុស្សធម៌ជូនដល់បងប្អូនប្រជាពលរដ្ឋចំនួន២២០គ្រួសារ ។

ឯកឧត្តមសូមផ្ដាំផ្ញើដល់បងប្អូនប្រជាពលរដ្ឋ ត្រូវចេះគិតគូរដោយខ្លួនឯង ក្នុងការ​ប្រកប​របរ​ចិញ្ចឹម​ជីវិត ព្រោះអំណោយទាំងនេះ គឺជាការដោះស្រាយបានតែមួយគ្រាតែប៉ុណ្ណោះ មិនមែន​ជា​របរ​ប្រចាំ​ថ្ងៃ ឬប្រចាំខែនោះទេ គឺយើងត្រូវការចែករំលែកអំណោយមនុស្សធម៌នេះនៅទូទាំងខេត្ត ព្រោះភាព​រង​គ្រោះ​មាន​ច្រើនណាស់។ 

ថ្នាក់ដឹកនាំក៏បានអំពាវនាវដល់បងប្អូនពុកម៉ែប្រជាពលរដ្ឋ សូមមានការប្រុងប្រយ័ត្នខ្ពស់ ពិសេសក្មេងតូចៗ កុំឱ្យលេងទឹក និងត្រូវចេះថែរក្សាសុខភាព អនាម័យខ្លួនប្រាណ ដោយរស់នៅស្អាត ហូបស្អាត ផឹកស្អាត ជាប្រចាំ និងចេះការពារជំងឺរាតត្បាតផ្សេងៗ ដូចជាជំងឺកូវីត-១៩ជាដើម៕ ហុង វាស្នា