ភ្នំពេញ៖ អនុរដ្ឋលេខាធិការ នៃក្រសួងវប្បធម៌ និងវិចិត្រសិល្បៈ ខណៈចូលរួមក្នុងពិធីការពារស្នាដៃ​បញ្ចប់ការសិក្សារបស់និស្សិតមហាវិទ្យាសិល្បៈសូនរូប​ នៃសាកលវិទ្យាល័យភូមិន្ទវិចិត្រសិល្បៈ បាន​លើកឡើងថា បច្ចុប្បន្នកម្ពុជា គឺត្រូវការនូវការបណ្ដុះធនធានមនុស្សបន្ថែមទៀតលើ ​សិល្បៈសូនរូប។

ក្នុងឱកាសចាប់ផ្ដើមការការពារស្នាដៃបញ្ចប់ការសិក្សារបស់និស្សិតនៅថ្ងៃនេះ ឯកឧត្តម គឹម ពីនន់ អនុរដ្ឋលេខាធិការនៃក្រសួងវប្បធម៌ វិចិត្រសិល្បៈ ​លើកឡើងថា ​និស្សិតទាំងនេះគឺជាធនធានសំខាន់ ជាអ្នកបន្តវេនពីអ្នកជំនាន់មុន​ ជាអ្នកការពារថែរក្សាអត្តសញ្ញាណជាតិ។

ឯកឧត្តម បន្តថា និស្សិតទាំងនេះជាធនធានសំខាន់ដែលថ្ងៃក្រោយអាចក្លាយមន្រ្តីរាជការ អាចក្លាយ​ជា​សាស្រ្តាចារ្យ ​ក្នុងការបន្តបណ្ដុះធនធានមនុស្ស ខណៈធនធានមនុស្សលើផ្នែកនេះពុំទាន់មាន​ភាព​គ្រប់គ្រាន់ពេញលេញនោះទេ។

ឯកឧត្តម បន្តថា ក្រសួងក៏ដូចជាសាកលវិទ្យាល័យ កំពុងស្វះស្វែងរក​អាហារូបករណ៍បន្ថែម សម្រាប់​និស្សិតអាចទៅសិក្សាថ្នាក់អនុបណ្ឌិត ​រឺថ្នាក់បណ្ឌិត ​នៅបរទេស ក្រោយពួកគាត់បញ្ចប់ថ្នាក់​បរិញ្ញាបត្រនេះ។

ពាក់ព័ន្ធនឹងការបណ្ដុះបណ្ដាលធនធានមនុស្សលើផ្នែកសិល្បៈសូនរូបនេះ សាលកលវិទ្យាល័យ​ភូមិន្ទវិចិត្រសិល្បៈ ក៏បានរៀបចំឱ្យនិស្សិតចំនួន ​១១២អ្នកដែលសិក្សា ​ឯកទេស តុបតែង​លម្អនៃស្ថាបត្យកម្ម ឯកទេសវិចិត្រកម្ម ឯកទេសគំនូរសារគមនាគមន៍ ​និងនិស្សិតសិក្សាឯកទេស ចម្លាក់ ​នៃមហាវិទ្យាសិល្បៈសូនរូប ​ឡើងការពារស្នាដៃបញ្ចប់ការសិក្សារបស់ខ្លួន ។

ជាការធានាថា ធនធានមនុស្សប្រកបដោយគុណភាពលោក សុផុន សំខាន់ ជាព្រឹទ្ធបុរសស្ដីទី នៃ មហា​វិទ្យាសិល្បៈសូនរូប លើកឡើងថា ​ការការពារស្នាដៃដើម្បីបញ្ចប់ការសិក្សានេះ គឺមហា​វិទ្យាល័យ​បានបង្កើតគណៈកម្មការតាមជំនាញនីមួយៗ ​ដើម្បីធ្វើការវាយតម្លៃ និងកែតម្រូវលើ​ប្រធានបទ ស្នាដៃរបស់និស្សិតជាបេក្ខជន​ និងកិច្ចការជាច្រើនទៀត។

កិច្ចការសំខាន់នេះ គឺប្រើរយៈពេលរហូតដល់ ៨ខែ ដោយនិស្សិតត្រូវឆ្លងកាត់វគ្គនីមួយៗ ទើបឈាន​ដល់ការឡើងការពារនៅថ្ងៃនេះ៕ អត្ថបទ៖ គឹមហុក