សៀមរាប៖ ក្រុមការងារជំនាញ មកពីក្រសួងស្ថានប័នពាក់ព័ន្ធ បានបន្តយុទ្ធនាការលើកទី៣ ក្នុងការផ្ទៀងផ្ទាត់ឈ្មោះជូនប្រជាពលរដ្ឋមានបណ្ណសមធម៌ថ្មី ​និងប្តូរបណ្ណជូនពលរដ្ឋ ដែលស្ម័គ្រចិត្ត​ទៅរស់នៅក្នុង ​ឃុំរុនតាឯក ឃុំពាក់ស្នែង ។

ជាការអនុវត្តតាមបទបញ្ជា របស់សម្តេច នាយករដ្ឋមន្រ្តី កាលពីថ្ងៃទី១ ខែតុលា ឆ្នាំ២០២២ ក្រុម​ការងារមូល​និធិជាតិ​ជំនួយ​សង្គម​ នៃក្រសួងសង្គមកិច្ច ​ដោយមានការសហការគាំទ្រ​ពី​អគ្គលេខាធិការដ្ឋានក្រុមប្រឹក្សាជាតិ​គាំពារ​សង្គម ​និង​ក្រសួងផែនការ ​បានបន្តយុទ្ធនាការលើកទី៣ ក្នុងការ​ផ្ទៀងផ្ទាត់ឈ្មោះជូនប្រជាពលរដ្ឋមានបណ្ណសមធម៍ថ្មី និងប្តូរបណ្ណជូនគ្រួសារ​ទៅរស់នៅ​ភូមិរុនតាឯក ឃុំរុនតាឯក​ និងពលរដ្ឋទៅរស់នៅឃុំពាក់ស្នែង ​ដើម្បីទទួលបាន ប្រាក់ឧបត្ថម្ភ​ពីកម្មវិធីឧបត្ថម្ភសាច់ប្រាក់ជូនគ្រួសារក្រីក្រ ​និងងាយរងគ្រោះ ក្នុងអំឡុងពេលប្រយុទ្ធនឹងជំងឺកូវីដ-១៩ និងចុះឈ្មោះជូនស្រ្តីមានផ្ទៃពោះ ​និងកុមារអាយុក្រោម២ឆ្នាំ។

គិតត្រឹមម៉ោង ១៨:០០ នាទី ថ្ងៃទី១៧ ខែតុលា ឆ្នាំ២០២២ ទទួលបាន ​លទ្ធផលដូចខាងក្រោម៖

- គ្រួសារក្រីក្រផ្ទៀងផ្ទាត់​ និងបើកប្រាក់បានចំនួន ១,៤២៨ គ្រួសារ ចំណាយអស់ទឹកប្រាក់សរុប ៤៦៥,៨០០,០០០រៀល

- គ្រួសារប្តូរបណ្ណមានចំនួន ២៩០គ្រួសារ ដែលគ្រួសារទាំងនេះនឹងត្រូវបន្តបើកសាច់ប្រាក់​ឧបត្ថម្ភ​ខែតុលា ចាប់ពីថ្ងៃទី ២៥ ខែតុលា ឆ្នាំ២០២២ ​ដោយសារគ្រួសារនេះបានបើកខែកញ្ញារួចហើយ

- ស្រ្តីមានផ្ទៃពោះ ១១នាក់ ​និងកុមារអាយុក្រោម ២ឆ្នាំ ចំនួន ៧នាក់ ចំណាយថវិកាចំនួន ៧២០,០០០រៀល

» ក្រុមការងារនឹងបន្តផ្ទៀងផ្ទាត់គ្រួសារ នៅសល់ចំនួន ៣,០៧៥ ទៀត ៕ អត្ថបទ៖គឹមហុក