នៅព្រឹកថ្ងៃទី១៨ ខែតុលា ឆ្នាំ២០២២នេះ លោកជំទាវ ម៉ាន ចិន្តា រដ្ឋលេខាធិការ​ក្រសួង​កិច្ចការនារី, លោក អម សុភា អភិបាលរងខេត្តកំពង់ឆ្នាំង, លោក ចេង ចាន់ដូណា អភិបាល​ស្រុកបរិបូណ៌ បានចុះផ្តល់អំណោយសម្តេចតេជោ ហ៊ុន សែន នាយករដ្ឋមន្ត្រី ផ្តល់ជូន​ប្រជាពលរដ្ឋ​២០០គ្រួសារ ស្ថានភាពផ្ទះរបស់គាត់ ត្រូវបានលិចទឹក ដែលរងផល​ប៉ះពាល់​ដោយ​ទឹក​ទន្លេសាបឡើងខ្ពស់ខ្លាំង នៅក្នុងភូមិយុគគន្ធរ ឃុំឆ្នុកទ្រូ ស្រុកបរិបូណ៌ ខេត្តកំពង់ឆ្នាំង។

លោកជំទាវ ម៉ែន ចិន្តា បានមានប្រសាសន៍ថា : ក្រោមការដឹកនាំរបស់សម្តេចតេជោ ហ៊ុន សែន នាយករដ្ឋមន្ត្រី តែងយកចិត្តទុកដាក់​ខ្ពស់​លើ​សុខទុក្ខ​បង​ប្អូន​ប្រជាពលរដ្ឋ​ដែល​រ​ង​គ្រោះ​គ្រប់​ប្រភេទ​ទាំងអស់ ដោយសម្តេចបានអោយកូនចៅថ្នាក់ក្រោម ពិនិត្យមើលគ្រប់ទីកន្លែង។

ក្រុម​​ការងារ បានចុះផ្ដល់អំណោយតាមខ្នងផ្ទះ ជូនពលរដ្ឋចំនួន១៤ គ្រួសារ ផ្សេងទៀត ដែល​រស់​នៅ​តំបន់នោះ ។ អំណោយទាំងអស់ជាទឹកចិត្តដ៍ថ្លៃថ្លារបស់សម្តេចតេជោ ហ៊ុន សែន ដែល​បាន​ផ្តល់​ជូន​ដោយលោកជំទាវ ម៉ែន ចិន្តា និងស្វាមី ។ ការផ្ដល់​ជូន​នេះ​មិន​មាន​ការ​ប្រកាន់​ពូជ​សាសន៍​នោះ​ឡើយ ខ្មែរ និងខ្មែរឥស្លាម គឺជាជនជាតិខ្មែរតែមួយ ស្ថិតនៅក្រោមម្លប់សន្តិភាពតែមួយ។

លោក អម សុភា បានពាំនាំនូវការផ្តាំសួរសុខទុក្ខពីសំណាក់ឯកឧត្តម ស៊ុន សុវណ្ណារិទ្ធិ អភិបាល​ខេត្ត​កំពង់ឆ្នាំង ដែលជានិច្ចជាកាល ឯកឧត្តម តែងយកចិត្តទុកដាក់លើសុខទុក្ខរបស់ប្រជាពលរដ្ឋ គ្រប់​ទី​កន្លែង​ក្នុងខេត្តផងដែរ៕ ហុង វាស្នា