​ក្រចេះ៖ ឯកឧត្តម វ៉ា ថន អភិបាលខេត្តក្រចេះ បានចុះជូបសំណេះសំណាល និងនាំយកពូជស្រូវ​របស់​រាជរដ្ឋាភិបាល ចំនួន ៥២,៧០០គីឡូក្រាម ​ចែកជូនប្រជាកសិករ ​ចំនួន៦៩២គ្រួសារ ស្ថិតក្នុងឃុំចំនួនបី ក្នុងស្រុកចិត្របុរី ។

ឯកឧត្តម វ៉ា ថន អភិបាលខេត្តក្រចេះ កាលពីថ្ងៃទី១៧ខែតុលាម្សិលមិញ ក្នុងពិធីសំណេះសំណាល បានលើកឡើង ពូជស្រូវ ដែលទទួលបានពីរាជរដ្ឋាភិបាល ​នាពេលនេះ​ គឺជាប្រភេទពូជស្រូវថ្មី ជា​ពូជស្រូវស្រាល មិនប្រកាន់រដូវ មានរយៈពេលតែ១១៥ថ្ងៃប៉ុណ្ណោះ​ សម្រាប់ដាំដុះ ​និងប្រមូលផល ។

រាជរដ្ឋាភិបាលកម្ពុជា ​បានសម្រេចផ្ដល់នូវពូជស្រូវប្រមាណជា៧ម៉ឺន៦ពាន់គីឡូក្រាម​ ចែកជូន ប្រជាកសិករ ​ចំនួន៩៤០គ្រួសារ​ នៅស្រុកព្រែកប្រសព្វ ស្រុកចិត្របុរី ​និងក្រុងក្រចេះ ដែល​ទទួលរងផលប៉ះពាល់ដោយសារជំនន់ទឹកភ្លៀង​ និងជំនន់ទន្លេមេគង្គ ដើម្បីមានលទ្ធភាពស្តារឡើងវិញ ។

ឯកឧត្តម វ៉ា ថន បានបញ្ជាក់ថា រដ្ឋាភិបាលកម្ពុជា ​ដែលមានសម្តេចតេជោ​ ហ៊ុន សែន ជា​នាយករដ្ឋមន្ត្រី បានគិតគូរពីសុខទុក្ខរបស់ប្រជាពលរដ្ឋគ្រប់កាលៈទេសៈ ​គ្រប់ស្ថានភាព ពិសេស​អំឡុងពេលជួប គ្រោះទឹកជំនន់នេះ ​បានគិតគូរពីការបង្ករបង្កើនផលដំណាំកសិកម្ម ដើម្បីស្តារឡើងវិញ ។

ឯកឧត្តម បានបញ្ជាក់ថា ការផ្ដល់គ្រាប់ពូជស្រូវនេះ ​ជាជំហានដំបូង ​គឺដោះស្រាយជូនប្រជាពលរដ្ឋ ដែលមានជីវភាពខ្វះខាតជាចម្បង ​និងបន្តចែកជូនប្រជាពលរដ្ឋរងគ្រោះដោយសារទឹកជំនន់​ឲ្យបាន​គ្រប់ៗគ្នា ​និងទាន់ពេលវេលា ។

ឯកឧត្តម វ៉ា ថន អភិបាលខេត្តក្រចេះ ស្នើសុំឲ្យប្រជាពលរដ្ឋ ត្រូវជួយថែរក្សាទីតាំង​ដីទួល​សុវត្ថិភាព​ឲ្យ​បានគង់វង្ស សម្រាប់ប្រើប្រាស់​ជាប្រយោជន៍រួមក្នុងមូលដ្ឋាន សម្រាប់ជួយដោះស្រាយនាពេល​មាន​គ្រោះមហន្តរាយ ​ចៀសវាងការរំលោភយកដីសម្បត្តិរួម​ និងណែនាំដល់ប្រជាពលរដ្ឋ ឱ្យដាំ​ដុះស្រូវឲ្យមានការប្រុងប្រយ័ត្នខ្ពស់ ​ដាំដុះតាមបច្ចេកទេសកសិកម្ម ​ឱ្យបានល្អប្រសើរ ៕អត្ថបទ៖ សេង ម័រ