ឧត្តរមានជ័យ៖ កំណាត់ផ្លូវកៅស៊ូមួយចំនួនក្នុងមូលដ្ឋានភូមិចំនួន២ គឺភូមិអូរក្រវ៉ាន់ និងភូមិឈូក ស្ថិតក្នុងសង្កាត់សំរោង ក្រុងសំរោងខេត្ត ឧត្តរមានជ័យ ដែលរងការខូចខាត ជាលក្ខណៈផ្លូវ​សំបុក​មាន់​កន្លងមក ត្រូវបានអាជ្ញាធរខេត្តឧត្តរមានជ័យ ចាប់ផ្ដើម​ធ្វើការ​ជួសជុល​ជាបណ្ដោះអាសន្ដ ដើម្បីសម្រួលដល់ការធ្វើដំណើររបស់ប្រជាពលរដ្ឋប្រកបដោយសុវត្ថិភាព នាព្រឹកថ្ងៃទី១៨ ខែតុលាឆ្នាំ២០២២នេះ។

ឯកឧត្តម ប៉ែន កុសល្យ អភិបាលខេត្តឧត្តរមានជ័យ បានឲ្យដឹងថា កំណាត់ផ្លូវ​ចំនួន២ភូមិ​ខាងលើកនេះ ដោយកន្លងមក​ ផ្លូវនេះ ទទួលរងការខូចខាត​ជា​លក្ខណៈសំបុកមាន់​ច្រើន​កន្លែង​ពិបាកក្នុងការធ្វើដំណើរ​របស់​ប្រជាពលរដ្ឋ​ឆ្លងកាត់​ដោយតែ​មាន​ភ្លៀងធ្លាក់​ជាប់ៗគ្នា​រាល់ថ្ងៃផងនោះ​ធ្វើឲ្យការ​ជួសជុល​ជូន​ពលរដ្ឋមានការ​យឺតយ៉ាវ។

ឯកឧត្តម បន្តថា មកដល់ពេលនេះ ​ដោយសារស្ថានភាពអាកាសធាតុអំណោយ​ផល​ល្អ​មិនមាន​ភ្លៀងធ្លាក់​នោះទើបអាជ្ញាធរខេត្ត​ បានចាប់​ផ្តើម​ធ្វើការ​ជួសជុល​ឈូស​ឆាយ​ចាក់​ក្រួស​ក្រហម​លុបក្រឡុក​សំបុកមាន់ជាបណ្តោះអាសន្នឡើងវិញ ដើម្បី​សម្រួល​ដល់ការធ្វើរបស់ពលរដ្ឋក្នុង​មូលដ្ឋាន​ឲ្យ​មានភាពល្អប្រសើរជាងមុនជាបណ្តោះអាសន្ន។

ដោយឡែកចំពោះផ្លូវក្នុងមូលដ្ឋានទីតាំងភូមិផ្សេងៗទៀត អាជ្ញាធរខេត្ត​កំពុង​គិតគូរ​យកចិត្តទុក​ដាក់ខ្ពស់​ក្នុងការ​ជួយ​សម្រួលការ​ជួសជុល​ជូនបងប្អូន​ប្រជាពលរដ្ឋដូចៗគ្នា​នូវ​ហេដ្ឋា​រចនា​សម្ព័ន្ធ​នានា​ក្នុងមូលដ្ឋាន​របស់​បងប្អូនប្រជាពលរដ្ឋ​ដែល​ទទួល​រងការខូចខាត​កន្លងមក​។

គួរបញ្ជាក់ថា កំណាត់ផ្លូវក្នុងមូលដ្ឋាន​ដែលរងការខូចខាត​ខាង​លើ​នេះ ​អាជ្ញាធរខេត្ត​និង​គិតគូរ​ធ្វើការ​ចាក់កៅស៊ូឡើងវិញ នៅពេលក្រោយបន្ទាប់ពីគម្រោងថ្មីបានមកដល់​នោះ៕ អត្ថបទ៖ ឃិន សា​រិទ្ធ