ពោធិ៍សាត់ ៖ ដោយមើលឃើញពីការលំបាករបស់ប្រជាពលរដ្ឋក្នុងខេត្តពោធិ៍សាត់ រងគ្រោះដោយទឹកជំនន់ទឹកភ្លៀង និងទឹកជំនន់ទឹកទន្លេ បង្កអោយខូចខាតទ្រពសម្បត្តិ ស្រែចំការ បណ្តាលអោយប៉ះពាលដល់ជីវភាពរស់នៅប្រចាំថ្ងៃ សម្តេចអគ្គមហាសេនាបតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន បានផ្តល់អង្ករចំនួន១០០តោន​តាមរយៈ ឯកឧត្តម ស៊ុយ សែម ប្រធានក្រុមការងាររាជរដ្ឋាភិបាលចុះជួយខេត្តពោធិ៍សាត់ អោយធ្វើការបែងចែកជូនដល់ដៃប្រជាពលរដ្ឋរងគ្រោះអោយបានឆាប់រហ័ស ជាបន្ទាប់ដើម្បីជួយសម្រាលការលំបាករបស់ប្រជាពលរដ្ឋ ។

ក្រោយពីទទួលបាន អង្ករចំនួន១០០តោនភ្លាមពីសម្តេចទាំងទ្វេ ឯកឧត្តម ស៊ុយ សែម រួមនិងក្រុមការងារបានពិភាក្សា​ដោយបែងចែក​អង្ករ​ចំនួន៥០តោន​ទៅ​ស្រុកកណ្តៀង​ និង៥០តោនទៀតទៅស្រុកបាកាន ព្រោះស្រុកទាំង២នេះរងផលប៉ះពាល់ដោយគ្រោះទឹកជំនន់ធ្ងន់ធ្ងរជាងគេក្នុងខេត្តពោធិ៍សាត់ ដែលទាមទាអោយមានការជួយជាបន្ទាប់ដល់ប្រជាពលរដ្ឋដែលកំពុងខ្វះខាតជីវភាព ។

ជាក់ស្តែង នាថ្ងៃទី១៨ តែតុលា នេះក្រុមការងាររាជរដ្ឋាភិបាលចុះជួយតាមឃុំនីមួយៗ ក្នុងស្រុកបាកាន បាននាំយកអំណោយអង្ករ៥០តោន រួមនិងអំណោយបន្ថែមពី ឯកឧត្តម ស៊ុយ សែម និង លោកជំទាវ មានមី ត្រីខ ទឹកត្រី ទឹកស៊ីអ៊ីវ ចែកជូនប្រជាពលរដ្ឋតាមបណ្តាលឃុំចំនួន៦ ក្នុងស្រុកបាកាន ដែលរងផលប៉ះពាលដោយទឹកជំនន រួមមានឃុំស្នាមព្រះ ឃុំអូរតាប៉ោង ឃុំមេទឹក ឃុំបឹងបត់កណ្តោល ឃុំស្វាយដូនកែវ និងឃុំរំលេច សរុបប្រជាពលរដ្ឋចំនួន ១២៧០គ្រួសារ ។

ក្រោយទទួលបានអំណោយ ប្រជាពលរដ្ឋដែលកំពុងមានជីរវភាពខ្វះខាត ដោយសារតែទឹកជំនន់ បានសម្តែងក្តីរំភើបយ៉ាងខ្លាំង រហូតខ្លះអួលដើម-ក ខ្លះស្រក់ទឹកភ្នែក ចំពោះការទទួលបានការយកចិត្តទុកដាក់ពីសម្តេច ហ៊ុនសែន និង សម្តេច ប៊ុន រ៉ានី ហ៊ុនសែន ។

បើតាមការបញ្ជាក់របស់លោក ផាយ ឡេង អភិបាលស្រុកបាកាន បានអោយដឹងថា ក្នុងចំណោមឃុំទាំង៩ក្នុងស្រុកបាកាន មានឃុំចំនួន៦ស្មើរនិង៤៤ភូមិ បានរងផលប៉ះពាលដោយជំនន់ទឹកភ្លៀង និងជំនន់ទឹកទន្លេ ធ្វើប៉ះពាលដល់ស្រែចំការប្រជាពលរដ្ឋចំនួនប្រមាណ៣៦០០ហិកតា ក្នុងនោះខូចខាតទាំងស្រុងមិនអាចស្រោចស្រង់បានវិញមានចំនួនប្រមាណ១២០០ហិកតា ហើយធ្វើអោយខូចខាតផ្លូវ ចំនួន១៤ខ្សែ មានប្រវែងសរុបប្រមាណ៩០០០ម៉ែត្រ លិចសាលារៀនចំនួន៨ទីតាំងក្នុងនោះសាលាចំនួន៥បានផ្អាក់ការសិក្សាជាបណ្នោះអាសន្ន លិចវត្តអារាមចំនួន៤ និងលិចវិហារឥស្លាមចំនួន១ ហើយលិចលង់ផ្ទះប្រជាពលរដ្ឋធ្ងនធ្ងរជិត៤០០ខ្នងផ្ទះ ៕អត្ថបទ ៖ ពៅ ភារុណ