ភ្នំពេញ៖ ក្រុមប្រឹក្សាស្ដារអភិវឌ្ឍន៍វិស័យកសិកម្ម និងជនបទ បានជួបពិភាក្សាជាមួយអង្គការដៃគូនានា មានអង្គការដើម្បីស្វែងរកចំណុចខ្វះខាត ដើម្បីពង្រឹងការផ្ដល់អាហារូបត្ថម្ភ ដល់កុមារនៅតាមជនបទ ដែលបង្កឲ្យមានបញ្ហាជំងឺមួយចំនួន ចំពោះកុមារទាំងអស់នោះ ។
ក្នុងសិក្ខាសាលាស្តីពី “ការធ្វើការរួមគ្នាបំពេញកង្វះខាតផែនការសកម្មភាពសកល ដើម្បីឆ្លើយតបចំពោះបញ្ហាស្គមស្គាំងរបស់កុមារ” នៅព្រឹកថ្ងៃទី១៨ ខែតុលា ឆ្នាំ២០២២នេះ ឯកឧត្តម ឧបនាយករដ្ឋមន្ត្រី យឹម ឆៃលី ប្រធានក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ មានប្រសាសន៍ថា វិស័យសន្តិសុខស្បៀង និងអាហារូបត្ថម្ភ បានដើរតួនាទីយ៉ាងសំខាន់ក្នុងការរួមចំណែកអភិវឌ្ឍន៍មូលធនមនុស្ស បង្កើនប្រសិទ្ធភាពការងារ ជំរុញកំណើនសេដ្ឋកិច្ច និងវឌ្ឍនភាពសង្គមជាដើម។
ឯកឧត្តមបន្តថា ប្រសិនបើគ្មានការយកចិត្តទុកដាក់លើសុខភាព សន្តិសុខស្បៀង និងអាហារូបត្ថម្ភនោះទេ ផលលាភដែលបានមកពីការអភិវឌ្ឍសេដ្ឋកិច្ចនឹងត្រូវធ្លាក់ចុះ ដោយសារការខាតបង់ដែលមិនអាចមើលរំលងពីបញ្ហាកង្វះអាហារូបត្ថម្ភ និងបន្ទុកចំណាយលើការថែទាំ និងព្យាបាលជំងឺមិនឆ្លងនានា ដូចជាជំងឺទឹកនោមផ្អែម ជំងឺដាច់សរសៃឈាមខួរក្បាល និងជំងឺបេះដូងជាដើម។
ឯកឧត្តមឧបនាយករដ្ឋមន្ត្រី បានបន្ថែមថា ពាក់ព័ន្ធបញ្ហាសន្តិសុខស្បៀង និងអាហារូបត្ថម្ភនេះ ទើបភាគីពាក់ព័ន្ធ រៀបចំឲ្យមានសិក្ខាសាលានេះ គោលបំណងកៀរគរថវិកា ដើម្បីពន្លឿនវឌ្ឍនភាពនៃការបង្ការ ការព្យាបាលភាពស្គមស្គាំងរបស់កុមារ និងពង្រឹង ពង្រីកកិច្ចសហប្រតិបត្តិការពហុវិស័យ ដើម្បីរួមគ្នាលើកកម្ពស់វិស័យសន្តិសុខស្បៀង និងអាហារូបត្ថម្ភនៅកម្ពុជា។
ជាមួយនេះ ឯកឧត្តម យឹម ឆៃលី បានអំពាវនាវភាគីពាក់ព័ន្ធ ចូលរួមសហការជាមួយ ក្រុមប្រឹក្សាស្តារអភិវឌ្ឍន៍វិស័យកសិកម្ម និងជនបទ បង្កើនការខិតខំប្រឹងប្រែងរួមគ្នា កៀរគរធនធានពីប្រភពនានា អនុវត្តនូវផែនការសកម្មភាពអាទិភាពក្នុងផែនទីបង្ហាញផ្លូវ ស្តីពីផែនការសកម្មភាពសកល ដើម្បីឆ្លើយតបចំពោះបញ្ហាស្គមស្គាំងរបស់កុមារ, យុទ្ធសាស្ត្រជាតិស្ដីពីសន្តិសុខស្បៀងនិងអាហារូបត្ថម្ភ លើកទី២ ឆ្នាំ២០១៩-២០២៣ និងឯកសារគតិយុត្តិនានា។
គួរបញ្ជាក់ថា កាលពី២០ឆ្នាំមុន កម្ពុជាជាប្រទេសមានបញ្ហាអសន្តិសុខស្បៀង តែបច្ចុប្បន្ន បានក្លាយជាប្រទេសនាំស្បៀងចេញ ហើយពិន្ទុសន្ទទស្សន៍ នៃភាពអត់ឃ្លានសកលបានធ្លាក់ចុះមកត្រឹម២០.៦% នៅឆ្នាំ២០២០ និងបញ្ហាក្រិសក្រិនកុមារអាយុក្រោម៥ឆ្នាំ បានធ្លាក់ចុះពី៥០% នៅឆ្នាំ២០០០ មកត្រឹម២២% នៅឆ្នាំ២០២២ ៕ អត្ថបទ បាន សុខរិទ្ធិ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
