​បាល់ទាត់៖ ​ខ្សែប្រយុទ្ធ​ប្រេ​ស៊ី​ល Neymar បាន​និយាយប្រាប់​អង្គ​ជំនុំ​ជម្រះថា ខ្លួន​មិនបាន​ចូលរួម​ក្នុង​ការចរចា​ជុំវិញការផ្ទេរ​ពី Santos ទៅកាន់ Barcelona កាលពី​ឆ្នាំ២០១៣ នោះឡើយ គ្រាន់តែ​យល់ព្រម​ចុះហត្ថលេខា​ផ្ទេរ និង​ធ្វើតាម​អ្វីដែល​ឪពុក​របស់ខ្លួន​ប្រាប់​។

​​Neymar រួមជាមួយ​ចុងចោទ ៨នាក់​ផ្សេងទៀត​បានបង្ហាញ​ខ្លួន​នៅ​តុលាការ​អេ​ស្ប៉ា​ញ ​ជុំវិញ​រឿង​ដែល​បាន​ចោទប្រកាន់ថា​ មាន​បញ្ហា​ពុករលួយ​ជុំវិញ​ការផ្ទេរ​កាលពី​ឆ្នាំ២០១៣ នោះ​។ ​Neymar បាន​និយាយថា ផ្ទេរ​មកកាន់ Barcelona កាលពី​ឆ្នាំ២០១៣ គឺជា​ក្តី​ស្រមៃ​របស់ខ្លួន និង​មិន​បានគិត​អ្វី​ទាំងអស់​ក្រៅពី​ធ្វើតាម​ឪពុក​របស់ខ្លួន​។ ​​ក្រុមហ៊ុន​វិនិយោគ​ប្រេ​ស៊ី​ល DIS គឺជា​ម្ចាស់​សិទ្ធិ ៤០ភាគរយ​នៃ​ការផ្ទេរ​របស់ Neymar តែ​ក្រុមហ៊ុន​មួយ​នេះ​បាន​បញ្ជាក់ថា ខ្លួន​បាន​បាត់បង់​ផលប្រយោជន៍​ជាច្រើន​ដោយសារតែ​ការផ្ទេរ​មានតម្លៃ​ទាប​ពេក​។ ​​ចុងចោទ​ផ្សេងទៀត​គឺ​ឪពុកម្តាយ​របស់ Neymar ក្លឹប​ទាំងពីរ​អតីត​ប្រធាន​ក្លឹប Barcelona លោក Josep Maria Bartomeu និង Sandro Rosell និង​អតីត​ប្រធាន Santos Odilio Rodrigues៕

​អត្ថបទ​៖​នាង សុភា​វុ​ធ