ភ្នំពេញ៖ ក្រុមហ៊ុនវិនិយោគទុនអានិកជនកម្ពុជាហៅកាត់ថា អូស៊ីអាយស៊ី (OCIC) និងក្រុមហ៊ុនសុវណ្ណាភូមិឡាយហ្វ៍ (SVL) បានសហការគ្នារៀបចំព្រឹត្តិការណ៍ជិះកង់ Family Fun Bike លើកដំបូងរបស់ខ្លួននៅថ្ងៃទី១៦ ខែតុលា ក្នុងគោលបំណងប្រមូលថវិកា ដើម្បីបរិច្ចាកទៅកាន់ Sipar Cambodia និងមន្ទីពេទ្យកុមារអង្គរ។

ព្រឹត្តិការណ៍ Family Fun Bike នេះពោរពេញទៅដោយភាពសប្បាយរីករាយ ដោយមានការជិះកង់ជាលក្ខណៈគ្រួសារ និង ជាក្រុមផងដែរ ដើម្បីប្រមូលថវិការជួយដល់កុមារកម្ពុជាដែលក្នុងស្ថាប័នទាំងពីរនេះ។ គួរបញ្ជាក់ផងដែរថា នេះជាកិច្ចខិតខំប្រឹងប្រែងរបស់ក្រុមហ៊ុន OCIC និងសុវណ្ណាភូមិឡាយហ្វ៍ ក្នុងការលើកកម្ពស់សុខមាលភាព ក៍ដូចជាអាចឧបត្ថម្ភថវិការដែលប្រមូលបាន ដើម្បីទិញសម្ភារៈសិក្សាផ្សេងៗទៀតជូនដល់កុមាកម្ពុជាផងដែរ។   

កម្មវិធីនេះបានធ្វើនៅ Sakura Avenue ស្ថិតនៅទីក្រុងរណបជ្រោយចង្វារ ដែលជាតំបន់ដ៏មានសក្ដានុពល ក៏ដូចជាមានគំរោងរបស់ក្រុមហ៊ុន OCIC ជាច្រើន ដូចជា Food Palace, Car City និង ជាសាកលវិទ្យាល័យខេមតិចជាដើម។ កម្មវិធីនេះបានទទួលបានការសហការគាំទ្រដោយ InterCare Medical Center, Canadia Bank, Dara Hotels, LM Car, The Elysee, The Olympia Mall, Sorya Center Point, ICE Electronics, Dinosaurs Alive, Coconut Park, Ratana Plaza, Dara Insurance, Dara Ventures, Dara Safe Cambodia, Brilliant Advertising, Go on Tailor, NTL and Cana Concrete ដែលគិតជាទឹកប្រាក់ជាង $6,000 ដើម្បីចែករំលែកស្មើៗគ្នាទៅកាន់មន្ទីរពេទ្យកុមារអង្គរ និងស៊ីប៉ាកម្ពុជា។

បច្ចុប្បន្ន OCIC គឺជាក្រុមហ៊ុនអភិវឌ្ឍន៍អចលនទ្រព្យធំជាងគេ និងឈានមុខគេក្នុងប្រទេសកម្ពុជា តាមរយៈទំហំវិនិយោគ និងចំនួនគម្រោងដែលបានអភិវឌ្ឍ។ ជំនាញស្នូលរបស់ក្រុមហ៊ុន គឺនៅក្នុងការអភិវឌ្ឍន៍អចលនទ្រព្យ ទីក្រុងរណប និងការគ្រប់គ្រងអចលនទ្រព្យ ជាមួយនឹងគម្រោងសំខាន់ៗដូចជា អាកាសយានដ្ឋានអន្តរជាតិភ្នំពេញថ្មី ទីក្រុងកោះពេជ្រ កោះនរា ទីក្រុងរណបជ្រោយចង្វារ និង Olympia City Complex ជាដើម៕​ អត្ថបទ ៖ បូរ៉ាវី