កំពង់ឆ្នាំង៖ នៅរសៀលថ្ងៃទី១៩ ខែតុលា ឆ្នាំ២០២២ ឯកឧត្តម គុយ សុផល ទេសរដ្ឋមន្ត្រី រដ្ឋមន្ត្រីក្រសួងព្រះបរមរាជវាំង តំណាងដ៏ខ្ពង់ខ្ពស់សម្តេចព្រះនរោត្តម សីហមុនី និងក្រុមការងារ បានចុះសួរសុខទុក្ខ និងផ្តល់ព្រះរាជអំណោយដ៏ថ្លៃថ្លារបស់ព្រះករុណាជូនប្រជាពលរដ្ឋ៣០០គ្រួសារ ក្នុងឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង ក្រោយពីពួកគាត់បានជួបប្រទះនឹងទឹកទន្លេសាបជន់លិចផ្ទះសម្បែងរួចមក។

ឯកឧត្តម គុយ សុផល បានថ្លែងថា ៖ ក្រោយពីសម្តេចម៉ែ និងសម្តេចព្រះនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា បានទទួលព័ត៌មាន និងរបាយការណ៍ពីក្រុមការងារគណៈបក្សប្រជាជនរួចមកថា ប្រជាពលរដ្ឋនៅក្នុងឃុំត្រពាំងចាន់ ស្រុកបរិបូណ៌ ខេត្តកំពង់ឆ្នាំង បានរងផលប៉ះពាល់ដោយជំនន់ទឹកទន្លេសាប សម្តេចម៉ែ និងសម្តេចព្រះនរោត្តម សីហមុនី ព្រះមហាក្សត្រនៃកម្ពុជា បានចាត់អោយឯកឧត្តម និងក្រុមការងារ ចុះផ្តល់ជូនព្រះរាជអំណោយរបស់​ព្រះអង្គភ្លាមៗជូនប្រជាពលរដ្ឋរងគ្រោះ​ទាំង៣០០គ្រួសារផងដែរ។ នៅក្នុងពិធីនោះ ឯកឧត្តមទេសរដ្ឋមន្ត្រី បានផ្ដាំផ្ញើដល់បងប្អូនប្រជាពលរដ្ឋ ត្រូវចេះគិតគូរដោយខ្លួនឯង ក្នុងការប្រកបរបរចិញ្ចឹមជីវិត ព្រោះព្រះរាជអំណោយទាំងនេះ គឺជាការដោះស្រាយបានតែមួយគ្រាតែប៉ុណ្ណោះ មិនមែនជារបបប្រចាំថ្ងៃ ឬប្រចាំខែនោះទេ គឺយើងត្រូវការចែករំលែកព្រះរាជអំណោយនេះនៅទូទាំងខេត្ត ព្រោះភាពរងគ្រោះមានច្រើនណាស់។ ឯកឧត្តមក៏បានអំពាវនាវដល់បងប្អូនពុកម៉ែប្រជាពលរដ្ឋ សូមមានការប្រុងប្រយ័ត្នខ្ពស់ ពិសេសក្មេងតូចៗ កុំឱ្យលេងទឹក និងត្រូវចេះថែរក្សាសុខភាព អនាម័យខ្លួនប្រាណ ដោយរស់នៅស្អាត ហូបស្អាត ផឹកស្អាត ជាប្រចាំ និងចេះការពារជំងឺរាតត្បាតផ្សេងៗ ដូចជាជំងឺកូវីត-១៩ជាដើម។

ប្រជាពលរដ្ឋទាំង៣០០គ្រួសារ ដែលរងផលប៉ះពាល់ដោយទឹកជំនន់ទន្លេសាប បានទទួលយកព្រះរាជអំណោយដ៏ថ្លៃថ្លានេះ និងបានអរព្រះគុណ ជូនពរដល់សម្តេចម៉ែ និងសម្តេចសម្តេចព្រះនរោត្តម សីហមុនី ព្រះមហាក្សត្រនៃព្រះរាជាណាចក្រកម្ពុជា ដែលបានដឹងពីសុខទុក្ខរបស់ប្រជាពលរដ្ឋរបស់ព្រះអង្គ អោយព្រះអង្គ និងក្រុមការងារ ជួបប្រទះតែក្តីសុខចម្រើន អាយុយឺនយូរ គង្គជាម្លប់ដល់កូនចៅ ចៅទួតទាំងអស់គ្នា៕ អត្ថបទ ៖ ហុង វាស្នា