ឧត្តរមានជ័យ៖ នាថ្ងៃទី១៩ ខែតុលាឆ្នាំ២០២២នេះ អាជ្ញាធរខេត្តឧត្តរមានជ័យ បានកិច្ចប្រជុំសាមញ្ញលើកទី៤០ របស់ក្រុមប្រឹក្សាខេត្តឧត្តរមានជ័យ ស្តីពីបញ្ហាប្រឈមនានា និងផលប៉ះពាល់ដោយជំនន់ទឹកបានស្រក នៅតាមបណ្តាលក្រុងស្រុកទាំងប្រាំ ដើម្បីធ្វើការស្ដារឡើងវិញ ឱ្យបានទាន់ពេលវេលា។

ក្នុងកិច្ចប្រជុំនោះដែរឯកឧត្តម ប៉ែន កុសល្យ អភិបាលខេត្តឧត្តរមានជ័យ មានប្រសាសន៍ថា ស្ថិតក្នុងស្ថានភាពបន្ទាប់ពីជំនន់ទឹកភ្លៀងបានស្រកទៅវិញ នៅតាមបណ្តាលក្រុងស្រុកទាំងប្រាំ របស់ខេត្តឧត្តរមានជ័យ រាល់ហេដ្ឋារចនាសម្ព័ន្ធនានា​តាម​មូលដ្ឋាន​កន្លែងខ្លះ​បានទទួលរងការ​ខូចខាត​និងមានផលប៉ះពាល់ខ្លះៗ​លើ​ផលដំណាំកសិកម្ម ​ផ្នែក​លើដំណាំដំឡូងមី និង​ដំណាំ​ស្រូវ​របស់​ប្រជាពលរដ្ឋ រួមទាំងផ្លូវក្នុងមូលដ្ឋានផងដែរ។

ឯកឧត្តម បន្តថា ពាក់ព័ន្ធបញ្ហាទាំងអស់នេះ មន្ទីរកសិកម្ម, មន្ទីរអភិវឌ្ឍន៍ជនបទ, មន្ទីរធនធានទឹក, មន្ទីរដែនដី ត្រូវ​ធ្វើការរួមគ្នាពិនិត្យឡើងវិញរាល់បញ្ហាប្រឈមនានា​ និង​ផល​ប៉ះពាល់​ប្រយោជន៍រួម​របស់ប្រជាពលរដ្ឋ ក្នុងការស្ដារឡើងវិញឱ្យបានល្អប្រសើរ​ចំពោះ​ដំណាំ​ស្រូវ​ក៏​ដូចជា​ដំណាំ​ដំឡូងមី​ដើម្បី​ស្នើសុំពូជស្រូវទុកចែកជូនពលរដ្ឋ ដែល​រងផលប៉ះពាល់​ដោយ​ជំនន់​ទឹកភ្លៀង​កន្លងមក។

ទន្ទឹមគ្នានោះដែរ ឯកឧត្តមអភិបាលខេត្ត ​បាន​ជំរុញឲ្យមន្ទីរដែនដី​ធ្វើយ៉ាង​ណា​ត្រូវពន្លឿន​ការ​កំណាត់​ព្រំប្រទល់​ នៅ​តាមបណ្តាលស្រុកមួយចំនួន​ ដែល​មិន​ច្បាស់លាស់​ជាមួយ​ព្រំប្រទល់​ស្រុកជាប់គ្នា​​ ត្រូវ​កំណត់​បែងចែក​ព្រំ​ឱ្យ​បាន​ច្បាស់លាស់​ ដើម្បី​ងាយស្រួលក្នុងការ​គ្រប់គ្រង​របស់​ខេត្ត៕ អត្ថបទ៖ ឃិន សារិទ្ធ