កោះកុង៖ មន្ទីរទេសចរណ៍ខេត្តកោះកុង សហការជាមួយអាជ្ញាធរស្រុកមណ្ឌលសីមា បន្តរួមគ្នា​បំផុសសារត្មី អាជីវករ ​និងពលរដ្ឋគ្រប់ទិសទី ​ចូលរួមគ្រប់គ្រង​សំណល់សំរាមរឹងរាវ នៅតំបន់ឆ្នេរសមុទ្រ ​ដើម្បីលើកកម្ពស់​បរិស្ថាន​សោភ័ណភាព​កាន់តែស្រស់បំព្រង។

លោក សុខ ភិរម្យ​​ អភិបាលស្រុកមណ្ឌលសីមា ​បានឱ្យដឹងនៅថ្ងៃទី១៩ ខែតុលា នេះថា ការ​ពញ្ញាក់​ស្មារតី​ដល់អាជីវករ អ្នកទេសចរ និងយុវជនឱ្យចូលរួមថែរក្សាសម្អាតបរិស្ថានតាមឆ្នេរ​សមុទ្រប៉ាក់ខ្លង​នៅពេលនេះ ក្នុងន័យធ្វើយ៉ាងណាវេចខ្ចប់សំរាមទាំងឡាយទុកក្នុងធុងសំរាមឱ្យត្រឹមត្រូវ ចៀសវាង​បោះចោល ពាសវាលពាសកាលគ្មានសណ្តាប់ធ្នាប់។

លោកអភិបាលស្រុកមណ្ឌលសីមា បានអះអាងថា យន្តការអប់រំណែនាំដល់ភាគីពាក់ព័ន្ធពីការ​ចូលរួម​ទុកសំរាមនេះ ធ្វើឡើងច្រើនណាស់មកហើយ ​ប៉ុន្តែពលរដ្ឋ​ និងអ្នកទេសចរមួយចំនួន នៅ​តែបន្តបោះសំរាមតាមតំបន់ឆ្នេរសមុទ្រដដែល។

លោក សុខ ចាន់គ្រឹះស្នា ប្រធានមន្ទីរទេសចរណ៍ខេត្តកោះកុង បានចាត់ទុកថា ការ​ទទួល​អាហាររួចរាល់ហើយទុកសំរាមចោលគ្មានការទទួលខុសត្រូវ ជារឿងមិនគួរឱ្យ​កើតមានដដែលនោះទេ​ ខណៈរដ្ឋបាលខេត្ត ​មន្ទីរជំនាញ ​និងអាជ្ញាធរមូលដ្ឋាន ប្រឹងប្រែង​បំផុសចលនាអប់រំ។

ក្រុមយុវជន ដែលចូលរួមប្រមូលសំរាមនៅតំបន់ឆ្នេរសមុទ្រប៉ាក់ខ្លង បានយល់ឃើញថា សំរាមតែង​កើតមាននៅតំបន់ឆ្នេរ ព្រោះតែអ្នកចោលសំរាមមិនទម្លាប់ដៃយកទៅបោះចោលក្នុងធុង ដែលធ្វើឱ្យសោភ័ណភាពនៅរមណីយដ្ឋានទេសចរណ៍មួយនេះ មិនល្អ ។ ដើម្បីឱ្យសម្រស់រមណីយដ្ឋានទេសចរស្អាត លុះត្រាមានស្មារតីទទួលខុសត្រូវទុក​ដាក់សំរាមឱ្យ​មានរបៀបរៀបរយល្អ ។

បញ្ហា​សំរាម​គ្រប់ទិសទី ចាំបាច់​ទាមទារ​ឲ្យ​មានការ​សហការ​គ្នាគ្រប់​ភាគីពាក់ព័ន្ធ ដើម្បីលើក​កម្ពស់​សោភ័ណភាពតំបន់ទេសចរណ៍​ និងទទួល​បានចំណូលពីវិស័យនេះ​ ក្រោយជំងឺកូវីដ-១៩​បានធូរស្រាលដើម្បីស្តារសេដ្ឋកិច្ចប្រទេសឡើងវិញ ៕អត្ថបទ៖ ឈឹម មករា