បាល់ទាត់៖ ការប្រកួតក្របខណ្ឌលីគកំពូលកម្ពុជាសប្ដាហ៍ទី៤ រវាងក្លិបបាល់ទាត់វិសាខា និងក្លិបអគ្គិសនីកម្ពុជាដែលគ្រោងប្រកួតកាលពីថ្ងៃទី១០ ខែមេសាចុងសប្ដាហ៍កន្លងទៅត្រូវបានខកខានវិញ បន្ទាប់ពីគណៈកម្មការប្រកួតបាល់ទាត់ជាតិកម្ពុជា-CNCC បានប្រកាសលើកពេលមុនការប្រកួត ១ថ្ងៃ។
ជុំវិញការចេញលិខិតកែសម្រួលកម្មវិធីប្រកួតទាំងតក់ក្រហល់នេះ គណៈកម្មការប្រកួតបាល់ទាត់ជាតិកម្ពុជាមិនបានបង្ហាញមូលហេតុ នាំឲ្យឈានដល់ការលើកពេលការប្រកួតនោះទេ គ្រាន់តែបញ្ជាក់ថា ដើម្បីសម្រួលការប្រកួតនេះឲ្យដំណើរការរលូន និងទទួលបានជោគជ័យ ទើបមានការកែសម្រួលដូចគ្នា។ ប៉ុន្តែអ្វីដែលគួរឲ្យចាប់អារម្មណ៍ការប្រកួតជើងទី១ នៃលីគកំពូលកម្ពុជា ដែលក្លិបអគ្គិសនីកម្ពុជាត្រូវទទួលសិទ្ធធ្វើម្ចាស់ផ្ទះ នៅកីឡដ្ឋានអគ្គិសនីកម្ពុជា ត្រូវបានប្ដូរទៅប្រកួតនៅកីឡដ្ឋានព្រីនស៍ទឹកដីរបស់ក្លិបវិសាខាវិញ។ គួរដឹងថា ជំនួបក្នុងសប្ដាហ៍ទី៤ នេះដំបូងឡើយត្រូវប្រកួតនៅថ្ងៃទី១៣ ខែមេសា តែដោយមានការឯកភាពពីភាគីក្លិបទាំងពីរ ក៏សម្រេចលើកទៅប្រកួតនៅថ្ងៃទី១០ ខែមេសា មុនគណៈកម្មការប្រកួតបាល់ទាត់ជាតិកម្ពុជា សម្រេចធ្វើការកែសម្រួលកម្មវិធីប្រកួតថ្មី ដោយលើកមកប្រកួតនៅថ្ងៃទី១៨ ខែមេសាចុងសប្ដាហ៍នេះវិញ។
សូមបញ្ជាក់ថា មកទល់ពេលនេះវិសាខាទើបប្រកួតបានម្ដងប៉ុណ្ណោះ ដោយប្រកួតស្មើក្រុមភ្ញៀវកងយោធពលខេមភូមិន្ទ ០-០ កាលពីដើមខែមីនា នឹងមាន ១ពិន្ទុក្នុងដៃឈរលេខរៀងទី៩ បណ្ដោះអាសន្ន។ ចំណែកក្រុមអគ្គិសនីកម្ពុជាបានឆ្លងកាត់ ៣ប្រកួតរួចមកហើយ ដោយឈ្នះ១ និងចាញ់២ រកបាន ៣ពិន្ទុឈរលេខរៀងទី៨ បណ្ដោះអាសន្ន៕
អត្ថបទ៖ លី ឈុនឡា
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
