ភ្នំពេញ៖ តំបន់លិចទឹកជំនន់តាមបណ្តាខេត្តមួយចំនួនក្នុងប្រទេសកម្ពុជាមិនរាំងស្ទុះដល់ដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២២ ដែលចាប់ផ្តើមពីថ្ងៃស្អែកតទៅនោះទេ។ នេះបើតាមន្ត្រីគ.ជ.ប មានប្រសាសន៍ក្នុងកិច្ចប្រជុំនៅព្រឹកមិញ។
មួយថ្ងៃ មុនការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២២ អគ្គលេខាធិការដ្ឋាននៃគណៈកម្មាធិការជាតិរៀបចំការបោះឆ្នោត ដែលហៅកាត់ថា គ.ជ.ប នៅថ្ងៃទី១៩ ខែតុលានេះ បានរៀបចំកិច្ចប្រជុំផ្សព្វផ្សាយជាមួយភាគីពាក់ព័ន្ធ ក្រោមអធិបតីភាពឯកឧត្តម មាន សទិ សមាជិកគ.ជ.ប និងជាប្រធានដឹកនាំកិច្ចប្រជុំ ដោយពិភាក្សាក្រោមប្រធានបទចំនួន៤រួមមាន៖ទី១.ការចាប់ផ្តើមការពិនិត្យបញ្ជីឈ្មោះ និងការចុះឈ្មោះបោះឆ្នោតតាមឃុំ សង្កាត់។ទី២.នីតិវិធីចុះឈ្មោះបោះឆ្នោតនៅតាមឃុំ សង្កាត់ និងការបញ្ជូនទិន្ន័យមកគ.ជ.ប។ ទី៣.ការដាក់ ការទទួល និងការដោះស្រាយពាក្យបណ្តឹងទាក់ទងនឹងការចុះឈ្មោះបោះឆ្នោត ។ និងទី៤.លទ្ធផលបណ្ដោះអាសន្ននៃការចែកលិខិតអញ្ជើញអ្នកមានឈ្មោះក្នុងបញ្ជីបោះឆ្នោតផ្លូវការ ឆ្នាំ២០២២។
នៅក្នុងឱកាសកិច្ចប្រជុំនោះ ឯកឧត្តម មាន សទិ សមាជិកគ.ជ.ប បានលើកឡើងថា ការពិនិត្យបញ្ជីឈ្មោះ និងការចុះឈ្មោះបោះឆ្នោត ឆ្នាំ២០២២ ដែលមានរយៈពេល៥០ថ្ងៃ គឺចាប់ពីថ្ងៃទី២០ខែតុលា រហូតដល់ថ្ងៃទី៨ខែធ្នូ ឆ្នាំ២០២២ រៀងរាល់ថ្ងៃ រួមទាំងថ្ងៃសៅរ៍ និងថ្ងៃអាទិត្យ ដែលពេលព្រឹកចាប់ពីម៉ោង៧:០០នាទី ដល់ម៉ោង១១:៣០នាទី និងពេលរសៀលចាប់ពីម៉ោង២:០០នាទី ដល់ម៉ោង៥:៣០នាទី នៅតាមសាលាឃុំ សង្កាត់។
ជាមួយគ្នានេះ ឯកឧត្តម ទេព នីថា អគ្គលេខាធិការគ.ជ.ប មានប្រសាសន៍ដែរថា តំបន់លិចទឹកជំនន់តាមបណ្តាខេត្តមួយចំនួនក្នុងប្រទេសកម្ពុជាមិនរាំងស្ទុះដល់ដំណើរការពិនិត្យបញ្ជីឈ្មោះ និងការចុះឈ្មោះបោះឆ្នោតឆ្នាំ២០២២ ដែលចាប់ផ្តើមពីថ្ងៃស្អែកតទៅនោះទេ។ ឯកឧត្តមបញ្ជាក់ថា ករណីទឹកជន់លិចមិនកើតឡើងនៅគ្រប់ខេត្តទាំងអស់នោះទេ គឺភាគច្រើនកើតឡើងនៅតាមបណ្តាខេត្តជាប់ដងទន្លេ ខេត្តជាប់ព្រំដែនមួយចំនួន និងជាពិសេសខេត្តកំពង់ធំ ហើយបច្ចុប្បន្ននៅតាមតំបន់ទាំងអស់នោះ ទឹកបានស្រកអស់ពីឃុំ សង្កាត់អស់ហើយ។
ដើម្បីចុះឈ្មោះបោះឆ្នោតបាន ប្រជាពលរដ្ឋត្រូវបំពេញលក្ខខណ្ឌដូចជា៖ ត្រូវបង្ហាញខ្លួន និងមានអត្តសញ្ញាប័ណ្ណសញ្ជាតិខ្មែរ ដែលមានសុពលភាព ឯកសារបញ្ជាក់អត្តសញ្ញាណបម្រើឲ្យការចុះឈ្មោះបោះឆ្នោត ឆ្នាំ២០២២ នៅចំពោះមុខ ក្រុមចុះឈ្មោះបោះឆ្នោត ដែលទទួលបន្ទុកជាមន្ត្រីចុះឈ្មោះបោះឆ្នោត ក្នុងអំឡុងពេលនៃការពិនិត្យបញ្ជីឈ្មោះ និងការចុះឈ្មោះបោះឆ្នោតនៅការិយាល័យចុះឈ្មោះបោះឆ្នោតណាមួយក្នុងឃុំ សង្កាត់ដែលខ្លួនកំពុងរស់នៅ។ ត្រូវមានអាយុពី១៨ឆ្នាំឡើង គិតត្រឹម ថ្ងៃទី២៣ ខែកក្កដា ឆ្នាំ២០២៣ ដែលជាថ្ងៃបោះឆ្នោត ពោលគឺត្រូវកើតមុន ឫត្រឹមថ្ងៃទី២៤ខែកក្កដា ឆ្នាំ២០០៥ និង មានលំនៅឋាន ឫទីសំណាក់ក្នុងឃុំ/សង្កាត់ដែលសាមីខ្លួនត្រូវចុះឈ្មោះបោះឆ្នោតជាដើម៕អត្ថបទ៖ទូច សោភ័ណ
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
