ក្រចេះ៖ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ បានជំរុញដល់មន្រ្តីជំនាញឱ្យសិក្សាពីការកាត់បន្ថយការចំណាយ​លេីការប្រេីប្រាស់ជី​​ក្នុងពេលបង្កបង្កេីនផលដំណាំស្រូវ។ ថ្លែងប្រាប់BTV​អំឡុង​ពេល​អញ្ជេីញចុះពិនិត្យ​ការ​បង្កបង្កេីន​ផល​ដំណាំ​ស្រូវឡេីង​វិញរបស់ប្រជាកសិករ ក្នុងក្រុងក្រចេះ នៅថ្ងៃទី១៩ ខែតុលា ឆ្នាំ២០២២ ឯកឧត្តម ឌិត ទីណា រដ្ឋមន្រ្តីក្រសួងកសិកម្ម រុក្ខាប្រមាញ់ និងនេសាទ ​មានប្រសាសន៍​​ពាំនាំ​នូវការ​សាក​សួរសុខទុក្ខ ​អាណិតស្រលាញ់ពីសម្តេចតេជោ ហ៊ុន សែន នាយករដ្ឋមន្រ្តី និងសម្តេចកិត្តិព្រឹទ្ធ ប៊ុន រ៉ានី ហ៊ុន សែន ជូនចំពោះបងប្អូនជនរួមជាតិ ដែលរងគ្រោះដោយ​ទឹកជំនន់ពេលនេះ​ ហេីយទោះ​ជាទឹកបន្តស្រក​ទៅវិញជាបណ្តើរៗ ​ក៏សម្តេចទាំងពីរ​នៅតែ​បន្តយកចិត្តទុកដាក់​ខ្ពស់​ចំពោះ​ទុក្ខលំបាក​របស់​បងប្អូន​ជានិច្ច។​​​

ជាក់ស្តែង​ការផ្តល់ពូជស្រូវនាពេលនេះ ឯកឧត្តម បញ្ជាក់ថា តបតាមអនុសាសន៍របស់សម្តេចតេជោ ហ៊ុន សែន នាយករដ្ឋមន្រ្តី​ស្តីពីការត្រួតពិនិត្យ​លេី​ផលប៉ះពាល់​ដំណាំ​ស្រូវ ​និង​ដំណាំ​រួមផ្សំ​ដែល​ខូចខាត​ដោយទឹកជំនន់​គឺចាំបាច់​ត្រូវពន្លឿន ​និង​ជំរុញ​នៃការ​បង្កបង្កេីនផល​របស់ប្រជាកសិករក្នុងគ្រួសារនីមួយៗ។

អំឡុងពេលចុះទីតាំងស្រូវរបស់ប្រជាកសិករ​ក៏មានសំណូមពរ​របស់ប្រជាពលរដ្ឋអំពី​បន្ទុកចំណាយ​លេីការ​ប្រេីប្រាស់ជី​​នាឱកាសនោះ​ឯកឧត្តមរដ្ឋមន្រ្តី​នឹងជំរុញឱ្យមន្រ្តីជំនាញសិក្សា ​និងផ្តល់វិធីសាស្រ្តបន្ថែមលេីការប្រេីប្រាស់ជីរបស់ប្រជាកសិករ ដេីម្បីជួយកាត់បន្ថយការចំណាយ។

ជាមួយគ្នានេះ ឯកឧត្តម បញ្ជាក់ទៀតថា ពាក់ព័ន្ធបញ្ហាតម្លៃស្រូវនឹងពិនិត្យព្រមគ្នា ដេីម្បីធានាថាអ្នកផលិត និងអ្នកប្រេីប្រាស់ទទួលបានផលប្រយោជន៍ស្មេីគ្នា។គិតមកទល់ពេលនេះ ក្នុងចំណោម​ខេត្តទាំង២១​ដែលមាន​ដំណាំស្រូវប៉ះពាល់​ និងខូចខាត​ដោយ​សារទឹកជំនន់នោះ​ត្រូវបានរាជរដ្ឋាភិបាលបញ្ចេញពូជស្រូវជូនប្រជាកសិករ​ជាបន្តបន្ទាប់ ទៅតាមស្ថានភាពជាក់ស្តែងដែលជួបប្រទះគ្រោះមហន្តរាយទឹកជំនន់នាពេលកន្លងទៅ៕ អត្ថបទ ៖ សេក ឧត្តម