ភ្នំពេញ៖ លោកវេជ្ជបណ្ឌិត ឈៀង សែ ប្រធានមនី្ទរពេទ្យបង្អែកកម្ពុជា-ចិន សែនសុខ ប្រាប់BTV ព័ត៌មាននារសៀលថ្ងៃទី១៩ ខែតុលា ឆ្នាំ២០២២នេះ បច្ចុប្បន្នមនី្ទរពេទ្យ កំពុងធ្វើទំនើបកម្មហេដ្ឋារចនាសម្ព័ន្ធ និងសម្ភារៈបរិក្ខារវេជ្ជសាស្រ្ត ដើម្បីឆ្លើយតបនឹងតម្រូវការរបស់ប្រជាពលរដ្ឋ និងទប់ស្កាត់ជំងឺមិនឆ្លង។

​លោកវេជ្ជបណ្ឌិត ឈៀង សែ បានបន្ថែមទៀតថា មនី្ទរពេទ្យបង្អែកមិត្តភាពកម្ពុជា-ចិន សែនសុខ ស្ថិតក្នុងភូមិអន្លង់ក្ងាន សង្កាត់ឃ្មួញ ខណ្ឌសែនសុខ រាជធានីភ្នំពេញ ត្រូវបានបង្កើតឡើងក្នុងឆ្នាំ២០១២ គិតមកដល់ពេលនេះ មានអាយុកាល១០ឆ្នាំមកហើយ មានបុគ្គលិកសុខាភិបាល ចំនួន៦២នាក់ និងមន្រី្តកិច្ចសន្យាចំនួន៤នាក់ ទន្ទឹមនោះមនី្ទរពេទ្យ បានផ្តល់សេវាសុខាភិបាលជាច្រើន ជូនប្រជាពលរដ្ឋ ២៤ម៉ោង លើ២៤ម៉ោង ដូចជាជំងឺទូទៅ ផ្នែកមនុស្សចាស់ និងកុមារ ផ្នែកសម្ពព ផ្នែករោគស្រី្ត ផ្នែកពិគ្រោះជំងឺក្រៅ ផ្នែកសង្រ្គោះបន្ទាន់ ផ្នែកវះកាត់តូច ឆ្លុះអេកូ ផ្នែកមនី្ទរពិសោធន៍ ផ្នែកជំងឺមាត់-ធ្មេញ ផ្នែកជំងឺផ្លូវចិត្ត និងបំពានគ្រឿញៀន និងសេវាបញ្ជូន ផ្នែកជំងឺទឹកនោមផ្អែម រួមនឹងផ្នែកដទៃជាច្រើនទៀត។ ចំណែកការផ្តល់សេវានៅមនី្ទរពេទ្យ គឺមានបណ្ណប.ស.ស, បណ្ណមូលនិធិក្រីក្រ និងអ្នកបង់ថ្លៃសេវាក្នុងតម្លៃទាប ប៉ុន្តែក្នុងករណីប្រជាពលរដ្ឋក្រីក្រ គាត់បានមកទទួលសេវារួច គ្មានលទ្ធភាពបង់ថ្លៃ (អត់មានបណ្ណក្រីក្រ អត់មានបណ្ឌប.ស.ស) យើងនឹងលើកលែងការបង់ថ្លៃជូនគាត់ ដោយពិនិត្យមើលតាមទិដ្ឋភាពជាក់ស្តែង។ និយាយជារួមមនី្ទរពេទ្យ គឺផ្តល់សេវាជូនបងប្អូនប្រជាពលរដ្ឋទាំងអស់ សំខាន់ពេលអ្នកជំងឺមកដល់ ត្រូវតែជួយសង្រ្គោះអាយុជីវិតជាមុនសិន នេះជាគោលការណ៍ដ៏ចាំបាច់បំផុតរបស់មនី្ទរពេទ្យ។

ចំណែកបងប្អូនប្រជាពលរដ្ឋ មកពីគ្រប់តំបន់ក្នុងមូលដ្ឋានខណ្ឌសែនសុខ បានមកពិនិត្យ ពិគ្រោះ ព្យាបាលជំងឺ ព្រមទាំងពិនិត្យជំងឺទឹកនោមផ្អែម បានបង្ហាញពីការជឿជាក់ក្នុងការផ្តល់សេវារបស់មនី្ទរពេទ្យ ព្រោះពួកគាត់បានមកទទួលសេវាពិនិត្យ ព្យាបាលជំងឺ ជាច្រើនឆ្នាំណាស់មកហើយចាប់តាំងពីមនី្ទរពេទ្យបង្កើតឡើងមក ក្រៅពីនោះក្រុមគ្រូពេទ្យក៏បានចុះដល់សហគមន៍ខ្នងផ្ទះរបស់ពួកគាត់ ដោយធ្វើការចាក់វ៉ាក់សាំងបង្ការជំងឺកូវីដ-១៩ និងវ៉ាក់សាំងបង្ការជំងឺកុមារ១១មុខ ព្រមទាំងពិនិត្យ និងណែនាំបន្ថែមអំពីវិធានការអនាម័យរស់នៅស្អាត ដើម្បីទប់ស្កាត់ការរីករាលដាលជំងឺកូវីដ-១៩ និងជំងឺឆ្លងនានា។

លោកវេជ្ជបណ្ឌិត ឈៀង សែ ក៏សុំសំណូមពរចំពោះប្រជាពលរដ្ឋទាំងអស់ ដែលអញ្ជើញមកទទួលសេវាពិនិត្យ ពិគ្រោះ ព្យាបាលជំងឺនៅមនី្ទរពេទ្យបង្អែកមិត្តភាពកម្ពុជា-ចិន សែនសុខ នៅពេលបុគ្គលិកសុខាភិបាលណាម្នាក់ ផ្តល់សេវាជូនទៅមានការខ្វះចន្លោះ សុំឲ្យមានការផ្តល់ជាយោបល់ ទាំងល្អ និងមិនល្អ ត្រង់ចំនុចណាមិនល្អ គ្រូពេទ្យរបស់យើងធ្វើការកែប្រែ។ ប៉ុន្តែចំពោះការផ្តល់សេវា គឺមន្រី្តសុខាភិបាលរបស់យើងសប្បាយចិត្ត ដោយឋិតក្រោមការដឹកនាំគ្រប់គ្រងរបស់រាជរដ្ឋាភិបាល ក៏ដូចជាក្រសួងសុខាភិបាល មនី្ទរសុខាភិបាល នៃរដ្ឋបាលរាជធានីភ្នំពេញ អាជ្ញាធរខណ្ឌ ជាពិសេសយកចិត្តទុកដាក់ចំពោះសុខុមាលភាពរបស់បងប្អូនប្រជាពលរដ្ឋទូទាំងប្រទេស មិនមែនថាតែមនី្ទរពេទ្យយើងនោះទេ។ ដូច្នេះក្រុមការងារគ្រូពេទ្យរីករាយចំពោះកិច្ចការលើកកម្ពស់ការផ្តល់សេវាថែទាំសុខភាព មានគុណភាព សុវតិ្ថភាព ប្រសិទ្ធភាព និងប្រកបដោយសមធម៌ជូនប្រជាជនកម្ពុជា នៅក្នុងគ្រប់ភូមិសាស្រ្តរាជធានីភ្នំពេញ។ លោកវេជ្ជបណ្ឌិត រួមនឹងបុគ្គលិកសុខាភិបាលនៃមនី្ទរពេទ្យបង្អែក សូមថ្លែងអំណរគុណជូនចំពោះប្រមុខរាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា៕ អត្ថបទ ៖ រដ្ឋា