កំពង់ឆ្នាំង៖ ឯកឧត្តម ស៊ុន សុវណ្ណារិទ្ធិ ប្រធានគណៈកម្មាធិការ សាខា​កាកបាទ​ក្រហម​កម្ពុជា​ខេត្តកំពង់ឆ្នាំង រួមនិងមន្ត្រីសាខា និងអនុសាខាកាកបាទក្រហម នាថ្ងៃទី២០ ខែតុលា ឆ្នាំ​២០២២​នេះ បានចុះសួរសុខទុក្ខ និងនាំយកអំណោយមនុស្សធម៌របស់សាខាកាកបាទក្រហម ទៅ​ចែក​ជូន​ដល់​បងប្អូនប្រជាពលរដ្ឋ ដែលរងគ្រោះដោយជំនន់ទឹកទន្លេសាប ចំនួន៣១២គ្រួសារ នៅ​ក្នុង​ឃុំ​ខុនរ៉ង ស្រុកបរិបូណ៌ ខេត្តកំពង់ឆ្នាំង។

ឯកឧត្តម ស៊ុន សុវណ្ណារិទ្ធិ បានជម្រាបជូនថា យោងតាមអនុសាសន៍ណែនាំ របស់​សម្តេច​កិត្តិ​ព្រឹទ្ធ​បណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា គឺឱ្យសាខា​ត្រូវ​តែ​គិតគូរ​យក​ចិត្ត​ទុកដាក់ ដល់បងប្អូនប្រជាពលរដ្ឋដែលរងគ្រោះដោយគ្រោះមហន្តរាយផ្សេងៗ និង​ប្រជាពលរដ្ឋ​ងាយ​រងគ្រោះគ្រប់ពេលវេលា ដោយមិនទុកឱ្យនរណាម្នាក់រងទុក្ខវេទនា ដោយសារ​យើង​មិន​បាន​គិតគួរ​នោះ​ឡើយ។ ជាក់ស្តែងដោយទទួលបានរបាយការណ៍ ពីលោកប្រធាន​អនុសាខា​ស្រុក​បរិបូណ៌ និងមើលឃើញពីការលំបាកខ្វះខាត របស់បងប្អូនប្រជាពលរដ្ឋ ដែលរង​គ្រោះដោយ​ជំនន់​ទឹក​ភ្លៀង​នោះ ទើបថ្ងៃនេះក្នុងនាមសាខា និងគណៈកម្មាធិការសាខា សហការ​ជា​មួយ​អនុសាខា​ស្រុក​បរិបូណ៌ បានរៀបចំផ្តល់អំណោយមនុស្សធម៌ ជូនដល់បងប្អូនប្រជាពលរដ្ឋ ចំនួន​៣១២​គ្រួសារ ដែលរស់នៅក្នុងឃុំខុនរ៉ង ស្រុកបរិបូណ៌ ខេត្តកំពង់ឆ្នាំង។

ឯកឧត្តមក៏បានអំពាវនាវដល់បងប្អូនពុកម៉ែប្រជាពលរដ្ឋ សូមមានការប្រុងប្រយ័ត្នខ្ពស់ ពិសេស​ក្មេង​តូច​ៗ កុំឱ្យលេងទឹក និងត្រូវចេះថែរក្សាសុខភាព អនាម័យខ្លួនប្រាណ ដោយរស់នៅស្អាត ហូបស្អាត ផឹកស្អាត ជាប្រចាំ និងចេះការពារជំងឺរាតត្បាតផ្សេងៗ ដូចជាជំងឺកូវីត-១៩ជាដើម៕ អត្ថបទ៖ ហុង វាស្នា