ភ្នំពេញ៖ ឯកឧត្តម ហ៊ុន ម៉ាណែត គិតត្រឹមថ្ងៃទី ២០ ខែតុលា ឆ្នាំ ២០២២នេះជាគម្រប់វ័យ ៤៥ ឆ្នាំ ចូល ៤៦ឆ្នាំ។ ឯកឧត្តម ជាថ្នាក់ដឹកនាំវ័យមួយរូប ដែលសព្វថ្ងៃទទួលបានការកោតសសើរ គោរពស្រលាញ់ និងទទួលបានជឿទុកចិត្តបោះឆ្នោតជាបេក្ខភាពនាយករដ្ឋមន្រ្តីនាពេលអនាគត។ សម្រាប់យុវជន មើលឃើញនិងពេញចិត្តជាខ្លាំង ចំពោះភាពសាមញ្ញ និងសមត្ថភាពរបស់អ្នក​បន្តវេនរូបនេះ។

ឯកឧត្តម ហ៊ុន ម៉ាណែត បច្ចុប្បន្នជាថ្នាក់ដឹកនាំវ័យក្មេងមួយរូប ​ដែលមានតួនាទី ជា​អគ្គមេបញ្ជា​ការង និងជាមេបញ្ជាការកងទ័ពជើងគោក ​នៃកងយោធពលខេមរភូមិន្ទ។

ឯកឧត្តម ក៏ទទួលបានការជឿទុកចិត្តបោះឆ្នោត ឱ្យក្លាយជាបេក្ខភាពនាយករដ្ឋមន្រ្តីសម្រាប់​គណបក្ស​ប្រជាជនកម្ពុជា ​នាពេលអនាគតផងដែរ។ ​ជាថ្នាក់ដឹកនាំវ័យក្មេងដ៏មានសក្ដានុពល ឯកឧត្តម ហ៊ុន ម៉ាណែត គឺ​ទទួលបានប្រជាប្រិយភាព ​និងមានការគាំទ្រ​ជាច្រើន​ពីប្រជាពលរដ្ឋ​កម្ពុជា។

សម្រាប់យុវជនមើលឃើញថា ឯកឧត្តម ជាថ្នាក់ដឹកនាំមួយរូប ​ដែលមាន​ភាព​សាមញ្ញ ពោរពេញ​ដោយ​ចំណេះដឹងសមត្ថភាព និងបានបំពេញកិច្ចការជាច្រើន ​ជាពិសេសក្នុងគ្រាវិបត្តកូវីដ-១៩ ដោយ​ឯកឧត្តម បានដឹកនាំក្រុមគ្រូពេទ្យស្ម័គ្រចិត្ត ធីតា​ ជួយសង្រ្គោះជីវិតប្រជាពលរដ្ឋកម្ពុជា ចេញ​ពីគ្រោះជំងឺកាចសាហាវ។

តាមរយៈសៀវភៅ កូនប្រុសច្បងនាយករដ្ឋមន្រ្តី ដំណើរឆ្ពោះទៅបន្តវេន​ ហ៊ុន ម៉ាណែត សរសេរ បញ្ជាក់ថា ឯកឧត្តម ហ៊ុន ម៉ាណែត ជាបញ្ញវន្តដែលមាន​កម្រិត​ចំណេះ​ដឹងខ្ពង់ខ្ពស់។​ ឆ្នាំ ១៩៩៥ ដល់ឆ្នាំ ១៩៩៩ ឯកឧត្តម ​បានសិក្សានៅសាលាបណ្ឌិត្យសភាយោធាអាម៉េរិក។

ឯកឧត្តម ជាកូនខ្មែរ ដំបូងគេបង្អស់ដែលបានសិក្សា និងទទួលសញ្ញាបត្រនៅសាលាមួយនេះ។ ឆ្នាំ ២០០២ ឯកឧត្តម ក៏ទទួលបានសញ្ញាបត្រថ្នាក់អនុបណ្ឌិតសេដ្ឋកិច្ច ​នៅសាកលវិទ្យាល័យ New York របស់ប្រទេសអាម៉េរិក ​ហើយនៅឆ្នាំ២០០៨ គឺឯកឧត្តម ទទួលបានសញ្ញាបត្រថ្នាក់បណ្ឌិត​សេដ្ឋកិច្ច​នៅសាកលវិទ្យាល័យ ​Bristol នៃចក្រភពអង់គ្លេស។

ក្រៅពីជាថ្នាក់ដឹកនាំពោរពេញដោយសមត្ថភាព ចំណេះដឹងខ្ពស់ ​ដឹកនាំការងារល្អ ឯកឧត្តម​ក៏តែងតែ​ចូលរួម​សកម្មភាពធ្វើការងារសង្គមជាច្រើនជួយដល់ប្រជាពលរដ្ឋផងដែរ៕ អត្ថបទ៖ គឹមហុក